الأناقة مش بالفلوس.. ازاي تبقي شيك وتواكبي الموضة ببساطة وذكاء”

كتبت ستايلست / داليا حسام

في زمن السرعة والموضة اللي بتتغير كل يوم، بقى كتير من البنات حاسين إن لازم يشتروا جديد طول الوقت عشان يكونوا “على الموضة”. بس الحقيقة إن الأناقة مش محتاجة فلوس كتير، محتاجة ذوق، وذكاء، ونظرة صح للتفاصيل.
تعالي نشوف إزاي ممكن تكوني شيك جدًا، وتواكبي الموضة بأبسط الحاجات.

خلي عندك وعي باللي يليق عليك

الموضة مش معناها تقلدي اللي بتشوفيه على السوشيال ميديا، لكن إنك تفهمي جسمك وشخصيتك.
مش كل موضة تنفع لكل البنات. جرّبي، شوفي الألوان اللي بتفتح وشك، والقصات اللي بتناسب جسمك، وبعد كده قرري.
لما تعرفي إيه اللي يليق عليكي، هتقدري تختاري حتى من أبسط القطع وتعملي منها ستايلك المميز.

التنسيق هو السر
مش لازم تشتري لبس جديد، لكن اعيدي تنسيق اللي عندك.
مثلاً:
الجاكيت الكلاسيك ممكن يليق على بنطلون جينز للجامعة، أو على بنطلون قماش للشغل.
القميص الأبيض ممكن تلبسيه مفتوح على تيشيرت، أو تحطي عليه إكسسوار بسيط يتغير شكله تمامًا.
الموضة دلوقتي كلها في إعادة التوظيف الذكي، مش الكثرة.

لبس الجامعة
الجامعة محتاجة لبس عملي ومريح، وفي نفس الوقت أنيق.
اختاري جينز بسيط أو بنطلون قماش واسع مع تيشيرت سادة أو بلوزة خفيفة، وشنطة ظهر شيك.
مش لازم ماركات، المهم النظافة والترتيب، وريحة حلوة بسيطة.

لبس الشغل
في الشغل، المظهر بيعكس شخصيتك. اختاري ألوان هادية وقطع بسيطة:
جاكيت على بلوزة، بنطلون قماش، أو جيب متوسطة الطول.
اللي يميزك هنا هو الوقار والرقي، مش الماركة ولا السعر.
لبس النادي
النادي مكان للحركة والراحة، فاختاري لبس رياضي خفيف وألوان مبهجة.
بس خدي بالك، اللبس الرياضي مكانه النادي بس، ماينفعش تروحي بيه كافيه أو خروجة.

الخروجة مع صحابك
هنا ممكن تعيشي روح الموضة أكتر، تلبسي حاجة على ذوقك وشخصيتك، بس برضو حسب المكان.
خروجة كافيه غير خروجة كورنيش أو مول.
اللبس المناسب للمكان هو اللي بيخليكي تباني أنيقة من غير مجهود.
الإكسسوارات والتفاصيل الصغيرة
مش لازم يكون عندك دولاب مليان. أحيانًا حلق، نظارة شمس، شنطة مختلفة، أو طرحة بلون جديد يغيروا شكل اللبس تمامًا.
الإكسسوارات بتقول “أنا مهتمة بالتفاصيل” حتى لو لبسك بسيط جدًا.

 الأناقة أسلوب حياة
مش شرط تكوني لابسة أغلى حاجة، لكن دايمًا تكوني مرتبة، ولبسك نضيف، ومشيتك واثقة.
لما تهتمي بنفسك وباللي يناسبك، الموضة هتيجي لحدك من غير ما تجري وراها.

الأناقة مش إنك تلبسي أغلى لبس ولا تمشي ورا كل تريند.
الأناقة الحقيقية إنك تعرفي نفسك، وتلبسي اللي يعبر عنك من غير ما تقلدي حد.
كل بنت فيها جمال خاص، بس اللي بيظهره هو بساطتها وثقتها.
خلي لبسك يحكي عنك، مش عن الماركة اللي لابسها.
وإفتكري دايمًا
مش المهم تكوني لابسة جديد.. المهم تكوني دايمًا مرتاحة، وشيك بطريقتك.
ستايلك هو حكايتك