المخرج هانى كمال لأسرار المشاهير أعتز بمشوارى الفنى وانتظرونى فى مفأجاة جديدة .
المخرج هانى كمال لأسرار المشاهير أعتز بمشوارى الفنى وانتظرونى فى مفأجاة جديدة .
حوار صحفى : ليليان خليل
اليوم جريدة أسرار المشاهير تنتقل للدراما الحقيقية التى دخلت كل بيت حملت لنا الكثير من القيم والمبادىء التى أمتعتنا بالكثير والكثير من واقع نعيشه تعالوا لنعرف أسرار من ابو العروسة وجو مليء بالمفاجآت ونعرف أكثر عن مغامرات وبينا ميعاد
معنا المؤلف والمخرج الاستاذ هانى كمال .
حضرتك خريج كلية الهندسة..هل دراستك للهندسة فادتك فى اعمالك الفنية؟
*مقدرش أقول إن دراسة الهندسة فادتنى، أنا قعدت 11 سنة فى هندسة، كنت عايز أدخل معهد سينما ومكنتش حبيبها، لدرجة إنى، اشتغلت واتجوزت وأنا طالب .
لكن قدام كده، ربنا جاوبلى على الاسئلة دى، لأن أنا لما اشتغلت، كاتب مع مخرج أول حاجة فادتنى هى الفكر الهندسى.
الفكر بقى مرتب أنا اصلا كتبت علشان أخرج، فكل المحطات عيشتها فى حياتى فادتنى لقدام، رغم إنى كنت فى أول الموضوع شايف إن دى فيها تضييع وقت زى البرامج البروموشن، كنت بشتغل موظف فى قناة أون، وقناة الساعة، وقناة الأهلى.
كنت بعمل بروموشن فيهم، واكتشفت إن كل حاجة اشتغلت ونجحت فيها فادتنى قدام فى شغلتى.
يعنى البرومو مثلا لو انتى بتعملى برومو عن برنامج، محتاجة توصلى فكرة البرومو، فكرة البرنامج في 30 ثانية، فبقيت قادر أكتب المشاهد المكثفة وبقيت أتحكم فى أنا عايز أقول إيه من المشهد بسرعة.
فكل حاجة عديت بيها فى الأول وكنت شايفها إنها مش منطقية أنا عايز أجرى وأروح للمنطقة اللى أنا فيها، اكتشفت إن ده إعداد من ربنا.
كان بيمرنى، علشان يستخدمنى مظبوط.
قولنا استفدت ايه من عملك كمساعد مخرج للراحل العظيم يوسف شاهين خصوصا وإنك مدرسة إخراجية مختلفة ؟
*فكرة مساعد مخرج تحت التمرين فى فيلم واحد، اللى خرجت منه أنا عملت دبلومة إخراج وسيناريو فى قصر السينما، ده المكان الوحيد المتاح ساعتها، إنى أتعلم فيه وهو بيختار من مشاريع التخرج اللى استفدت منه إنى خرجت من المعادلة، دى عارف قدامى حلين: يا أساعد وأفضل أساعد علشان أخرج، يا إما أكتب علشان أخرج، واخترت اللى ربنا استخدمنى فيه اللى هى الكتابة لغاية لما أخرج.
فى إحساس طول الوقت إنك مهموم بالجانب التربوى، فى أعمالك وإنك عاوز تبعت رسايل، لإصلاح المجتمع.
كلمنى عن الموضوع ده ؟ وهل مخوفتش من اتهامك بالوعظ والتنظير ؟
*انا ليا رؤيه معينه في الدراما، عموما اللي مبين لك ده إن الصورة، اللي حواليا مش دى، لكن زمان لو المسلسلات دي نزلت كان هيبقى ده موضوع عادي، يعني ليالي الحلمية كان فيها كل الحاجات، ابو العلا البشري، كان فيها كل الحاجات
المال والبنون، كان فيه كل الحاجات .
المشكلة إن دول كلهم كانت صناعة ماشية متوازية، كل الناس دي الديركشن بتاعها .
فإنتى لما تيجي بالديركشن ده، في وسط دراما عبارة عن قتل، وسرقة وإنتقام، وإن الفقير مظلوم، وإن الغني بيطلع حيوان ظالم، بيطلع عين الفقير والغنى ياخذ حقه، ده كله بيخليكى لما تشوفي درامتي، تقولي أنت عايز تصلح ولا ليها دعوة بأي حاجة .
انا شغال على الصح، دي درامتنا ودي الدراما المصرية الحقيقية، الدراما التانيه دي دراما فورمات، متاخدة من أفلام للأسف لا تصلح 30 حلقة، ولا ال 15 حلقة.
الفكرة كلها إن إنتى بتسالي سؤال لنفسك أنهي مسلسل من دول تقدري تتفرجي عليه مرتين .
أنهي مسلسل من دول عايش .
فأنا مش مهموم بحاجة زيادة.
الأستاذ وحيد حامد، والأستاذ إسامة أنور عكاشة، والأستاذ محمد جلال عبد القوي، كل الناس دي كانت بتكتب دراما علاقية إجتماعية.
حتى لو في إطار مخابراتي زي رأفت الهجان حتى لو في إطار إجتماعي تاريخي، زي ليالى الحلمية، من أول جزء لغاية الجزء الخامس.
زي ما لما تتكلمي عن المال والبنون وابو العلا البشري نفس الكلام دي كانت الدراما بتاعتنا، الراية البيضاء دي دراما، ضمير أبلة حكمت دي دراما.
لكن اللي بيحصل واللي بشوفه ان دي دراما أفلام على فورمات، اللي مبين لك ايه مختلف هم مش انا.
لكن دي درامتنا انا معملتش حاجة زيادة، أنا من جوايا إن وسط السواد وٱن ما فيش حاجة بتروح للناس وإن الأيد الناعمة دي فن، مش واصلة.
انا أعمل حاجه زي ولاد ناس وأبو العروسة، وبينا ميعاد، وأحط أفكار تصلح للمجتمع، إنهم يعملوا بيه لأن الناس محتاجة حد يطبطب ويديها حلول .
النجاح الساحق لأعمالك بداية من أبو العروسة لحد وبينا ميعاد، هل ده بيديلك ثقة ولا مسئولية، ولا خوف من القادم ؟
*أنا مش بخاف، لأن ربنا معايا، فدى الثقة مش بعدلها مكان .
بيدينى مسئولية إن إعلامى مهم .
وقبل كل ده وده مش معناه إنى ملاك
يعنى أنا بتكلم، على الأمانة .
إدانى وزنة ليها دعوة بالكتابة والإخراج، فأنا بتعامل بالوزنة دى .
هتسائل على الوزنة دى .
وده بيخلينى دايما مسئول عن الفكرة إيه اللى هتسأل فيه ! .
كلمنا عن خطوة اتجاهك للإخراج بعد التأليف، خصوصا إنك نجحت كمؤلف؟
*أنا بالنسبالى كنت بخرج الفكرة كلها
كنت عايز أكون مخرج، وأخرجت أبو العروسة seconde unite
الجزء الأول من الباطن، التانى اشتغلت أكتر firest unite
عملته كله وعملت مسلسل سعودى وولاد ناس، وبينا ميعاد 1
وبينا ميعاد 2
*ده سابع مسلسل ليا إخراج وكتابة مع بعض، فالتجربة ناجحة ومهمة.
إن فى ظل اللى إحنا فيه دلوقتى
المخرج والمؤلف بيكون أسهل بكتير للإنتاج، وأسهل بكتير للممثل، وأسهل بكتير للعمل إنه يوصل .
فى كل الدراما الأسرية، ياترى استاذ هانى كمال بيطبق نفس المبادىء السامية دى مع أولاده فى الحقيقة ؟
*على فكرة معنديش حد فى المسلسلات ملاك، يعنى كل الناس بتغلط يعنى معنديش حد مثالى.
عندى أولادى يوسف وكارما انا لو مكنتش بعمل ده معاهم، هتبقى أكبر كارثة إنه هو بيتفرج ويقولى اما أنت مش ده يبقى ثقتى أنا هى اللى هتتهز فى البيت كأب.
فالفكرة كلها لو انا مش كده مع أولادى مش هعرف أكتب، لأن عينى استحالة الحاجة اللى توصلك حقيقية ومكنتش أنا بعيشها حقيقية، اكيد بضايق وبتعصب بس فاهم لأنى دارس علم نفس.
إيه خططك القادمة ؟وهل ممكن نشوف أجزاء تانية من وبينا ميعاد على غرار السلاسل الأجنبية ؟
*أنا بتمنى إنه لا ميكونش فى أجزاء .
أنا بشكر ربنا إن وبينا ميعاد 1
وبينا ميعاد 2 وصل للناس بنجاح كبير وبينا ميعاد 2 كمان أكتر من 1 .
نفسك فى إيه تحققه لتشعر بالإشباع ويقول أنا فعلت أثرت وأفدت المجتمع والفن ؟
*بالنسبة ليا لو مشيت وروحت السما يبقى سيبت أثر ونفسى إني أفضل كده، ربنا إداني حاجات ما استحقهاش، نفسي تبقى الحاجات عايشة على طول.
وبشكر ربنا إن أعمالي مش كثير بس ليها طعم وعايشة عند ناس كتيرة الحمد لله .
