بالكنافه بالمهلبيه مقدمه من الشيف المبدعة ندي العسال

الكنافة بالمهلبية
مقدمة من الشيف ندى العسال

مدة التحضير : 30 دقيقة
مدة الخبز : 30 دقيقة
المقادير :-
نص كيلو كنافة متفرزة قبلها بليلة
كوب وربع سمنة بلدى
هنحط معلقتين كبار سكر بودرة لو عاوزين الكنافة مقرمشة لو عاوزنها طرية مش هنحط السكر .

للحشو :
2 كوب لبن . 3 معالق ك نشا . 2 معلقة متوسطة سكر . فانيليا . رشة قرفة . معلقة كبيرة قشطة بلدى

للشربات :
2 كوب سكر . كوب ونص ماية . نص ليمونة . معلقة سمنة ك

الطريقة :-
● هتجهزى الشربات وتحطى كل المكونات عالنار بدون تقليب وتسبيه لحد مايغلى وتوطى وتسبيه مع نفسه 10 دقايق وتطفى وتسبيه يبرد تماما .
● هتجهزى الحشوة بانك هتقلبى النشا والسكر مع اللبن عالبارد كويس لحد ماتدوب تماما وبعد كدة ترفعيهم عالنار وتضيفى القشطة والفانيليا وتفضلى تقلبى لحد ماتغلى وتتقل معاكى وتطفى وتسيها تبرد خالص .
● هتجيبى الكنافة بقى من الفريزر على طول وتفتتيها بالكبة او بايدك وتحطلها مقدار السمنة كله وتدعكيها كويس مع بعض بايدك لحد ماتبقى زى المبلولة خالص .
● هتجيبى صينية وتدهنيها سمنة كويس وتفردى نص كمية الكنافة فى الصينية وتبططيها وتضغطى عليها كويس جدا بايدك وتحطى الحشو ومتوصلهوش للجوانب عشان بيسيح وميتحرقش وبعد كدة هتحطى باقى الكنافة وتوزعيها من غير ماتضغطى عليها اوى .
● هترشى سمنة سايحة عالوش بسيط كدة وتدخل فرن سخن على حرارة 200 درجة لحد ماتحمر من تحت والجوانب بعد كدة هتولعى الشواية 5 دقايق تحمر من فوق وتطفى .
● اول ماتطلع وهى سخنة تتسقى مقدار الشربات بااااارد كله . وبالهنا اتمنى تجربوووها وتعجبكم
تحياتى ،،،

مدير مطبخ اليوم الدولى أ. هبة متولى