بلح الشام مقدم من الشيف نهلة الطيب

بلح الشام
وأخيرا فعلتها بلح الشام حلو شرقي يجنن سهل وبسيط ولو عرفتوا الطريقة مش هتشتروه تاني من برة يلا بقي وبلاش رغي كتييير
المقادير
المقدار دة يكفي من ٥:٤أشخاص
كوب دقيق /رشة ملح
كوب ماء
١/٤كوب زيت
م ك نشا
م ك سكر
٢بيضة /رشة فانيليا
الشربات
٢كوب سكر
١/٢ ١كوب ماء
٢م ك عسل جلوكوز
عصير ليمونة /رشة فانيليا
الطريقة
نضع المية والزيت وملعقة السكر ونتركها تغلي عند بداية الغليان ننزل بالدقيق والنشا ورشة الملح دفعة واحدة ونقلب كويس اوي بملعقة خشب بعيد عن النار لحد ما نحصل على كرة عجين نرجعها على نار هادية ونسويها كويس حوالي ٥دقايق ونسيبها تبرد ونقلبها كل شوية لحد ما تدفى ننزل بالبيض والفانيليا واحدة ونقلب كويس لحد ما تختفي وننزل بالثانية ونقلب برضو لحد ما تختفي نضعها في كيس حلواني بيه قمع بلح الشام مقاس وسط ونقطعة في زيت غزير بارد تماما وبعدين نعلي عليه مع التقليب المستمر لحد اللون الذهبي ننزل بيه في شربات بارد لو عاوزينة مقرمش اوشربات دافي لو عاوزينة طري وكل مرة هنقلي نطفي عالزيت يبرد وبعدين نسخنه تاني ويقدم بألف هنا على فكرة المقدار دة بيعمل حوالي ٢٠قطعة من الحجم الوسط زي الصور تقدروا تفتحوة
بالسكينة من الجنب وتحشوة كريم شانتية او كريم باتيسير

تعتبر حلوى “بلح الشام ” سورية المنشأ، ولكن اختلفت الروايات التاريخية حول سبب تسميتها، حيث أرجع البعض أن سبب تسميتها بهذا الاسم، هو أنها تشبه التمر، لذلك أطلق عليها بلح الشام، وأرجع أخرون سبب التسمية إلى أن رجل من أهل الشام، كان يعمل خلال فصل الشتاء لساعات طويلة، مما جعله يشعر بالجوع الشديد، فأخذ يبحث فى كل مكان عن تمر، ليجعله يشعر بالشبع ويمده بالطاقة والحيوية، ليستمر فى العمل، لكنه لم يجد التمر، لذلك فكر فى صناعة حلوى تشبه التمر، وفى نفس الوقت تحتوى على سكر، لتجدد نشاطه، ومن هنا أطلق عليها اسم “بلح الشام”.

اشتهرت حلوى “بلح الشام” فى مختلف أنحاء البلاد العربية من مصر والعراق وبلاد الشام، وغيرها، ولكن اختلفت أسماؤها بين البلاد حيث يطلق عليها فى مصر اسم “بلح الشام” وفى العراق اسم ” داطلي “، وفى إيران ” باميه “، وفى تركيا “تولومبا”، وتعتمد طريقة بلح الشام على مكونات أساسية وهى الدقيق والزبدة ودقيق السميد الناعم وغيرها من المكونات الأخرى، كما يضاف عليها العسل بعد القلى أو شيكولاتة أو فتافيت المكسرات المختلفة، وتقدم للضيوف