مصممة الأزياء رانيا يوسف لآسرار المشاهير : أنا عصامية ورفضت المساعدة من أقرب الناس لى

إعداد وحوار :- مي إسماعيل محمد 

كما عودناكم أن نبحر معكم فى عوالم مختلفة لنتعرف على مبدعينها اليوم سنلتقى مع إحدى مصممى الأزياء التى وضعت لها بصمة كبيرة فى عالم الأزياء رغم الظروف الصعبة التى مرت بها فهيا نتعرف عليها أكثر ..

فى البداية أحب أن أخبرك إنى سعيدة جدا بعمل هذا الحوار معكى ونريد أن نتعرف عليكى أكثر فهل ممكن أن تخبرينا عن من تكون رانيا يوسف بإيجاز ؟ 

– أنا رانيا يوسف .. دراستى كانت ادارة اعمال وبعدها دبلومه فى ادارة الاعمال من الجامعه الامريكيه .ولكن طول عمرى هوايتى الرسم وده اللى خلانى ادخل مجال تصميم الازياء والرسم على الازياء .

– من الذى ساعدك فى تنمية موهبتك ؟

– محدش ساعدنى فى بداية مشوارى .. يمكن اكون انا اللى كنت برفض المساعده حتى من والدى ووالدتى .. علشان كنت حابه اكون عصاميه واعمل نفسى بنفسى . 

– ماهو برجك الفلكى ؟

– انا من مواليد برج العقرب .

– ماهو أجمل تعليق حصلت عليه ؟
– لا فى تعليقات كتير جميله .. وبسمع كلام جميل كتير اوى الحقيقه .. بس اكتر حاجه بتسعدنى لما حد بيناديتى ب يافنانه .

– ما هى الذكرى التى لن تنساه أبدا؟
– عمرى ماحنسى 27/12/2016 .. لأن ده كان تاريخ اليوم اللى انفجر فيه الاتيليه بتاعى .. بعد حوالى 18 سنه شغل فقدت كل حاجه ..وابتديت من الصفر وكأنى لسه فى اول المشوار .

 – ما مغنيكى و ممثليكى المفضلين ؟
– بشكل عام انا بحب الغناء والموسيقى وبحب مطربين كتير .. عمرو دياب بحبه جدا ..كاظم الساهر .. شيرين عبدالوهاب .. انغام والممثلين بحب جدا احمد حلمى و مى عز الدين .

– من قدوتك فالحياة ؟
– قدوتى ..فتاة اسمها هيلين كيلر .كانت صم وبكم وعمياء .. واصبحت من اكبر الكتاب فى العالم مع ان كل وسائل تواصلها بالعالم كانت مقطوعه لكنها لم تيأس وبقت كاتبه عالميه .

– ماالمكان الذى تتمنى أن تعرض به ؟
– من امنياتى اعمل عرض ازياء فى باريس والهند .

– هل الحب له مكان بحياتك ؟
– مافيش خد يقدر يعيش من غير حب .. لكن لو تقصدى حب رجل ل أمرأه فالاجابه لأ ..لكن انا بحب امى .. اهلى .. اصدقائى عالفيس وهما بيحبونى جدا ..وبعتبرهم عيلتى الكبيره ..وبحب الحيوانات جدااا واى كأن ضعيف . اما الرجل فممكن تقولى ان كرهى ليه وفشلى معاه هوا سبب نجاحى .

– كيف دخلت عالم تصميم الأزياء ؟
– بعد التخرج اشتغلت فى مجال دراستى ..بس كان دايما عندى احساس بالملل وان مش ده اللى المفروض اعمله ..ولا ده طموحى فقررت اسيب الشغل وافتح اتيليه صغير وبدأت فيه بالرسم على الطرح وبعدها الازياء وبعدها تصميم القطعه من الالف الى الياء من اختيار موديل وقماش وتصميم ورسمه .

– ماهى صيحات الموضة المفضلة لديك ؟
– مافيش صيحات موضه مفضله لى . انا كل مره بعمل فيها كولكشن بسيب نفسى لاحساسى .. اللى حاسه انى عاوزه اعمله .. بعمله .. سواء موديل او اتجاه الكولكشن او حتى اللوانه .

– مارأيك فى برامج تصميم الأزياء على التلفاز ؟
– للاسف البرامج اللى بتهتم بالازياء فى مصر قليله جدا جدا .. ومنهم برنامج او اتنين هما الاساس والباقى كله مقلد ..وكمان احنا بنعانى من قلة البرامج التعليميه ..اللى تعلم السيده او الانسه ازاى لو عندها موهبه تنميها او ازاى تعمل اعادة تدوير لشغلها او حتى تتعلم خياطه او ديكوباج او اى نوع من الهاند ميد .

– من المصممون المفضلون لديك ؟
– دولشى اند جابانه .. ايلى صعب .. ديسيجوال . بعشقهم .

– ماالنصيحة التى تقدمها للسيدات عند أختيار فستانا لها ؟
– دايما بانصح السيدات بالتغيير وانها تجرب وتسال وتشوف نفسها فى المرايه بعين حياديه وماترفضش موديل غير لما تشوفه على نفسها .. وماتجريش ورا الموضه وخلاص ..لا لازم تختار اللى يناسبها ويناسب جسمها ومكانتها الاجتماعيه وظروفها .

– مارأيك فى صناعة الأزياء فى منطقة الشرق الأوسط ؟
– صناعة الازياء فى منطقة الشرق الاوسط فى تطور مستمر وعندنا مصممين رأئعين جدا وعندنا فكر مختلف واعتقد ان الغرب ابتدى يقتبس مننا حاجات من تراثنا . بس عندنا كمان مشاكل كتير فى العماله والخامات .وفى مصر على وجه الخصوص نفتقد دعم الدوله لنا كاصناع هاند ميد .

وأخيرا وليس أخرا حدثينا عن جديدك وماهو مصدر إلهامك بها ؟
– اخر كولكشن كان فى شهر يناير لخريف وشتاء 2018 . وكان اسمه خيط وابره وكان كله بشغل الخيط والابره والكروشيه والباتش ورك وكان خروج عن طبيعة شغلى لأنه مكانش فيه رسم نهائى ..اما الاسبوع الماضى فكان فى عرض لكولكشن .. اسمه ..مصر من كل الزوايا .. كان عباره عن ازياء كاجوال جدا عصريه سامبل جدا برسومات مصريه عتيقه جداااا .. والحمد لله عجب الناس جدا .وخصوصا ان العرض كان من ضمن فاعليات مهرجان ملكة جمال المحجبات العرب .وحاز على قبول زملائى فى لجنة التحكيم من كل الجنسيات منها طبعا المصريه والمغربيه والتونسيه والسعوديه .. وكانو منبهرين بالعرض الحمد لله وده لأنى دايما بقول كل ما تتمسك بحضارتك وتراثك كل ما توصل للعالم وان شاء الله للعالميه .

وفى الختام أريد أن أشكركم لمتابعتكم لنا وإلى اللقاء قريبا مع مبدع جديد ..