سعر طبق الكشرى من فيلم ” طباخ الرئيس” حتي اليوم ؟!!
سعر طبق الكشرى من فيلم ” طباخ الرئيس” حتي اليوم ؟!!
بقلم / خالد فؤاد
– تحبوا نتغدى أيه ياجماعة؟
هكذا سألت زملائى الثلاثة اثناء هبوطنا من كافيتريا نقابتنا ” الصحفيين” بعد إنتهاء العمل بها في السابعة مساء لظروف فيروس كورونا
.
– اجاب أحد الزملاء .. أيه رأيكم نديها كشرى ؟
نظرنا لبعضنا البعض واتفقنا بالنظرات علي إقتراحه .. وقد كان توجهنا لأحد محال الكشرى القريبة من النقابة .
– طلبنا ٤ كشرى بدون أي اضافات ..فمع كل واحد منا زجاجة المياه المعدنية الخاصة به ولانريد مشروبات ولا حلو فسنتوجه للأوبرا بعد هذا لنشرب مانريد هناك.
– أصر أحد الزملاء علي دفع الحساب وركب رأسه كما نقول
الحساب .. كام حضرتك ؟
– ١١٢ ج ..
أصابتني الدهشة .. وبحركة لا إيرادية وجدتني أمسك بيد زميلي قبل أن يدفع .
– ياعم والله أحنا أكلنا كشرى مش كباب ولافراخ وكمان في محل مش في فندق ؟!! .
– نظر لى زملائى وكأنني هبطت عليهم اليوم من عالم ثاني.
– إنصعت لنظراتهم مؤقتا والتزمت الصمت حتي غادرنا المحل.
وقبل أن اتحدث وجدتهم ينفجرون في وجهي.
– فيه أيه ياعم خالد .. واضح أنك ما أكلتش كشرى في محلات منذ فترة طويلة .
وكمان انت عمرك ماكنت بخيل وعمرنا ماشوفناك كده .
* ياجماعة أفهموني الموضوع مالهوش دعوة بكرم اوبخل .
يعني أيه طبق كشرى عبارة عن شويتين مكرونة علي أرز وشوية عدس وشطة وتقلية ويعتبر تصبيره مش أكتر ب ٣٠ ج تقريبا .. ليه وعلشان أيه ؟!
– لم يجيبني أحد وراحوا ينظرون لي بأطراف عيونهم .
ووجدتني اتذكر هذا المشهد من فيلم ” طباخ الرئيس” حينما دار هذا الحديث بين الرئيس ” خالد زكى” والطباخ ” طلعت زكريا” رحمة الله عليه.
– قولي يامتولي طبق الكشرى بكام النهاردة .
* ب ٣ جنيه ياريس.
– بتقول كام .. يعني لما أسرة بسيطة من ٥ اشخاص يحبوا ياكلوا كشرى يدفعوا ٢٥ جنيه؟!!
اومال أذاى بيقولوا الطبق بنصف جنيه.
* ده كان زمان ياريس .. الأسعار مولعه ناااااار .
ومن نقطة الأسعار مولعه نار عدت لتاريخ إنتاج الفيلم لأكتشف إنه لم يمضى علي إنتاجه سوى سنوات قليلة فهو من إنتاج عام ٢٠٠٨ .
وبحسبة بسيطة .. طبق الكشرى البسيط بتاع الغلابة ومحدودى الدخل تضاعف في ١٣ عام فقط ليصل لعشرة أضعاف تقريبا .
بس خلاص
