سكرات الغربة مع الإرهابي الذي كاد يقتلني لإيمان قنديل

في يوم الأربعاء 21 من مارس استضاف صالون نوار الثقافى الكاتبة الصحفية
ايمان قنديل
لمناقشة كتاب
” اﻻرهابى الذى كاد يقتلنى ”
وتجربة مثيرة مع مرض السرطان . وذلك فى مركز فنون لتنمية المواهب
وقد أثارت الأمسية حول الكتاب في نفس الأستاذة إيمان قنديل الكثير من الكريات والشجون حول مشوار الغربة والحياة لتكتب هذه الكلمات على صفحتها على وقع التواصل الاجتماعي الفيسبوك والتي استأذنناها في نشرها
ففي كلماتها شجن يدور في نفس كل مغترب
حول ما ينظر إليه الكثيرين إلى المغتربين وكأنهم يعيشون في جنة تاركين أهلهم للجحيم

برغم أن العكس هو الصحيح مهما كانت الظروف
فتجربة المغترب مهما كانت…. تجربة تتسم بالقسوة لايدريها إلا من جربها
ولنقف أمام كلمات الأستاذة الصحفية إيمان قنديل لنر كيف لغربة الروح بين الأهل قسوة لاتقل عن قسوة الغربة الحقيقية
===============

كتبت
الأستاذة إيمان قنديل
بالأمس اثناء مناقشة كتابي
الإرهابي الذي كاد يقتلني
والذي أحكي فيه يومياتي بعد إصابتي بالمرض اللي كلكم بتقولوا عليه مايتسماش..
كانت امسيه رائعة حقا..
لكن احدهم قال لي 25 سنه في الغربه … وبتقولي في كتابك ان احد الأصدقاء اقترح عليك العلاج خارج مصر ..
وهو لايعلم إنك بالكاد تستطيعين العلاج داخل مصر؟؟
وكان يعني بيتكلم بإستنكار وكأنه عايز يقول لي انت كدابه..

لا ياعم القرَّار انا فعلا اتغربت 25 سنه
لكن ماحدش حايصدق ان اللي جبته يدوب يعيشني مستوره..

واني لما نزلت مصر لقيت الصحفيين دفعتي اللي ماخرجوش من مصر عندهم شقق في اغلى مناطق مصر وفي مارينا..
ولقيت ناس كتير اعرفهم بسم الله ماشاء الله ربنا يزيدهم شقه واتنين وتلاته وعربيات ومصايف وحاجه آخر حلاوة ماشاء الله…

انا بقى ياعم الأمور كان السكن على حسابي انا وجوزي
واللي عايش في الإمارات يعرف يعني ايه تسكن على حسابك..

وانا ياعم القرَّار ماكنتش زي المصريين باكل اعيش بصلصة واموت نفسي من الجوع انا واولادي..
لا
كنا بناكل احسن اكل ممكن تتخيله..
والبس احسن لبس
ما اقعدش على حاجه واحده طول السنه..
ولا كنت باحرم نفسي ولا باحرم ولادي من اي حاجه نفسنا فيها..
عمري مافكرت حا احوش قد ايه ولا حا اصرف قد ايه؟؟
كله ع البركه

انا ياعم الغِّلاوي كنت بانزل مصركل سنه انا واولادي وجوزي بتذاكر على حسابنا لإن ماكانش عندنا تذاكر سفر على الشغل.

انا ياعم البصاص كنت باتعالج على حسابي انا واولادي الا آخر سنتين كان تأمين طبي ..
يعني ماكنتش زي المصريات اللي بتقعد عندها التهاب نسا سنه كامله لغايه ماتنزل مصر تتعالج عشان العلاج في ابوظبي غالي..
كمان انا خرجت من مصر قبل ما اتعين في اي جريده عشان كده انا موش عضو نقابه والا كنت اتعالجت على حساب الدولة…

انا ياعم ابو عيون مدوره
علمت اولادي احسن تعليم وطول عمري باصرف عليهم دم قلبي لغايه برضه ماتخرجوا من الجامعات الخاصة..
انا ياعم انت يا ابو عيون صفرا
عشت حياه كلها كفاح وتعب وصراعات عمل وصراعات جنسيات ممكن يضطهدوك ويفنشوك من شغلك بس عشان انت مصري
ومالكش شله تحميك ..

انا ياعم الأمور اجلت حياتي لما انزل مصر
ونزلت مصر بورم خبيث
وبعد 3 سنوات تركني زوجي فجأة ورحل الى السماء ولم يكن يعاني من اي مرض يذكر سوى اصابته بنزلة برد..
وفقدت السند والعون والداعم الأول لي في محنتي المرضية…

إيه رأيك تيجي مكاني وتتغرب 25 سنه
وترجع بسرطان تصرف فلوسك عليه..
تحب نبدل ؟؟

ارحموا الناس اللي اتغربت
دي اكتر ناس مقرور عليها
واكتر ناس ابتلاء..
ومريض السرطان حتى لو ربنا كتب له النجاة بيفضل تحت الملاحظة الطبيه خوفا من ارتداد المرض..
.وكفايه نفسيته وخوفه الدائم من ارتداد المرض..
وحسبي الله ونعم الوكيل
============
إنتهت كلمات الأستاذة إيمان قنديل المملوءة بشجنوألم سكرات الغربة
حسبنا الله ونعم الوكيل
قالتها
وأرددها معها
ويرددها معها كل مغترب مقرور عليه وهو أصلا ربنا عالم به عايش ازاي حتى لو ماديا مستور يكفيه قلق يعانيه كل يوم عايش به هو حايعمل ايه بكرة لو قالوا له فجأة مش عايزينك
كيف ستنقلب حياته رأسا على عقب بين طرفة عين وانتبا هتها
في الغربة
المغترب يقعد ينحر طول السنة ويادوب يقدر يكون فلوس ينزل بيها أجازة وفيه اللي بيستلف ويرجع يسدد ديون الأجازة باقي السنة
واللي ظروفه أحسن شوية
وقدر يشتري بالتقسيط شقة والا بيت صغير يعيش فيه لما يرجع وقعد سنين وسنين يسدد وياعالم حايدخله والا لأ
بينزل في أجازته يلاقي ناس لاسافرت ولا اتغربت وعايشين زي الفل وشاريين في نفس المكان اللي هو اشترىفيه بالقسط ولسة بيسدد في اقساطه ومش ضامن يدخله أصلا
بينما هم عايشين فيه ومتمتعين باللي جابوه وبيتفسجوا ويسافروا ويروحوا وييجوا
ويقروا عالمتغرب
وتلاقيهم نازلين على مواقع التواصل شكوى من البلد واللي بيحصل فيها مع انهم عايشين فيها عيشة زي الفل لكن مش قد أطماع جنابهم
ولو حد رد بضمير على كلامهم يبقى أصلك مش هنا تعالى وعيش هنا وبعدين اتكلم
يعني يا إما تشتم في بلدك زيهم يا إما تبقى مش حاسس بحاجة ما انت بقى في الجنة ….
ربنا يوعدهم بيها عشان يشربوا من اللي بيقروا عليه
المصري المتغرب يبيدفع لمصر مش بياخ منها وبرغم كده هو أكثر إحساسا بها من اللي بياكل من خيرها وبيشتم فيها
لما حد يقول لما بتتكلموا عن الوطنية ما تخلوا ولادك ينزلوا يدخلوا الجيش زي ولادنا
ده على أساس يعني ان بسلامتهم ولادهم داخلين الجيش باختيارهم مش لأن ده قانون بيسري عالكل برة وجوة
برغم أن
الطالب في مصر يادوب بيدفع ضريبة تستحقها بلده اللي تحملت نفقات تعليمه وشغله وعيشته في البلد
لكن الطالب خارج مصر اخله بيدفعوا دم قلبهم في تعليم خاص غير تحويلات المصريين والضرايب المفروض عليهم والرسوم المضاعفة اللي بيدفعوها لمصر …. لا نَمُّن بها على ممصر طبا ولكن ليفهم اهل القر والمنفسنين على راي الأستاذة إيمان قنديل
وبرضه على رأيها
إرحموا المتغربين كفاية عليهم مايعانوه من سكرات الغربة
وبرضه
حسبي الله ونعم الوكيل في كل من يجرح مشاعر من كانت مشاعره أصلا دامية
ومن قلبي أدعوها لكل من يحسد المتغرب على سكرات الغربة
أن يبتليه الله بغربة مثلها

طبعا الحديث لا يعمم على الجميع
وإنما عمن يرون دائما في المتغرب كائن من كوكب آخر
اللهم خفف عن كل مغترب سكرات الغربة
==========
فاتن نصر