إعداد وحوار: ريهام طارق
بدأ العد التنازلي لوداع عام 2025، ذلك العام الذي شكل علامة فارقة على مستوى المشهد الموسيقي المصري والعربي، بعدما شهد ثراء ملحوظا في الإنتاج الفني، تمثّل في موجة من الأعمال الغنائية الناجحة التي قدّمها نجوم الغناء في مصر ومختلف أنحاء الوطن العربي.
رافقتنا هذه الأعمال الغنائية على مدار 365 يومًا، وتغلغلت في تفاصيل حياتنا اليومية، تقترن بأيام عشناها بين لحظات حزن وفرح، خذلان وانتصار، نجاح وفشل واحيانا لحظات خيانة، فغدت هذه الأغاني جزءًا أصيلًا من ذاكرتنا.
ومن هذا المنطلق، تبلورت فكرة هذا الحوار، الذي أسلط من خلاله الضوء على أكثر الأغاني نجاحا خلال عام 2025، لتغدو بمثابة مفاتيح تكشف أسرار حياة النجوم الخاصة
وذلك عبر توظيف اسمائها في صياغة أسئلة وجهتها إلى ضيفي، لتأتي إجاباته عنها لتكشف جانب خاص من حياته، لم يسبق لجمهوره ومحبيه التعرف عليه من قبل، ما يتيح لهم الاقتراب منه والتعرف عليه بصورة أكبر.
ضيفتي في هذا الحوار فنانة تعد من أبرز الأسماء في الدراما التلفزيونية، قدمت عبر مسيرتها الفنية العديد من الأعمال الناجحة التي تركت بصمة واضحة و راسخة في تاريخ الدراما المصرية.
في البداية، نرحب بالفنانة القديرة لاشينة لاشين في جريدة أسرار المشاهير، ونشكرها علي إتاحة هذه الفرصة لإجراء هذا الحوار.
مين اول حد جه في تفكيرك حالا و نفسك تعزميه علي “العنب الساقع”؟
عنب ساقع فى الشتا!!!! يبقي اكيد شخص مبحبوش.
بعدتِ عن مين في 2025 و بتقولي له “كيفك علي فراقي“؟
طالما بعدت يبقى في داهيه اقوله كيفيك على فراقي ليه انا بقي عندي مبدأ في حياتي مهم جدآ وهو يلا في داهيه
امتى حسيتي بتعب شديد في 2025 وقلت والله ده “هد حيل” ؟
ولله انا علي طول مهدود حيلي.
تقولي لمين أنت “حبيبي وابن حبيبي“؟
اقولها لـ صدفه بنت حببتي اميره.
مين رحل عن عالمنا من الوسط الفني في 2025 تقولي له “فعلا مبيتنسيش“؟
للاسف 2025 خدت الحبايب كلهم بس اكثر شخص كسر قلبي أوي هو صديقي وزميل المعهد العالي للفنون المسرحية ودفعتي وعشرة عمري الفنان الراحل سليمان عيد.
تقولي لمين في 2025 “ميتعزش“؟
الفنانة الكبيرة الراحلة استاذه سميه الالفي رحمها الله متتعزش علي اللي خلقها ربنا يرحمها ويغفر لها.
لو تم دعوتك “حفله تنكريه” نفسك تلبسي اي شخصية من زمن الأبيض والأسود؟
أحب طبعا البس شخصية أستاذه فردوس محمد ويجي استاذ استيفان روستي يقولي تسمحي لي مدام بالرقصه دي وأنا ارد عليه واقوله وهو أنا مسكتك يا خويا ما ترقص.
مين اللي كل ما يجي علي بالك تقولي والله “عيونه عليا هدمع“و هيندم على قلة اصله في 2025؟
لا طالما قليل الأصل يبقي مش هشوفه أصلا، ولا ههتم بيه برميه ورا ضهري وبس.
تقولي لمين أنت “سيد الناس” في 2025 وكل السنين اللي جايه؟
أقول لدكتور أشرف زكي أنت سيد الناس في 2025 وفي كل السنين جايه.
مين كان “ضل حيطة” في حياتك في 2025؟
كل شخص واخد قلة الأصل منهج حياه، بعتبره ضل حيطه والناس دي بالذات بقولهم مش شايفاكم..
مين هيكون “رقم واحد” في حياتك في 2026؟
اولادي ربنا يخليهم ليا ويحفظهم.
امتي قولتي في 2025 الوسط الفني “خذلني“؟
إطلاقا أنا عمر ما الوسط الفني خذلني بالعكس طول الوقت كان في صفي وقدم لي كل الدعم والمساندة الحمد لله.
كام مره اتقال لك “اهدي” أثناء ادائك لأحد المشاهد في 2025؟
في مشهد ليا في مسلسل ميد تيرم واللي بختم بيه عام 2025، وبيعرض حاليا علي شبكه قنوات ON، وهو مشهد بيني وبين بنتي بهجم عليها علشان اضربها قالولي اهدي يا ناديه اهدي، هتشوفوا المشهد ده أن شاء الله في الأيام إللي جايه.
مين الشخص اللي بتقول لنفسك “مكرهتوش” بعد ما ودعته في 2025؟
أنا مبعرفش اكره حد خالص ممكن ازعل لكن معرفش اكره.
مين دخل حياتك في 2025 وقولتِ عليه “كأنه مجاش“؟
أنا مبقتش بسمح لاي شخص غلط انه يدخل حياتي.
مين اكتر شخص كان “بيستهبل” في حياتك 2025؟
أنا قفلت دايرتي عليا علشان كده بقت save، مافيش مجال للاستهبال.
من تقولي له “تيجي نحارب” في 2026؟
بطلت… مبقاش عندي حيل للحرب.
مين بتحسي انك مطمنه و مرتاحه في قربه و بتقولي له محتاجه “احكيلك خوفي” ؟
ربنا سبحانه وتعالى وحده لا شريك له.
مين اللي لو سألوك عنه هتقول “معرفش حد بالاسم ده” في 2025؟
اي شخص قليل الأصل، و ناكر للجميل، وعنده نقص بقول عليه معرفش حد بالاسم ده … بعتبره اتوفا.
تقولي لمين في بداية 2026 “تيجي نرجع“؟
مافيش حد
امتي هتقولي “قبلت التحدي” في 2026؟
هقبل التحدي في اي شخصيه يتقال عليها صعبه عليكي مش هتعرفي تعمليها في اللحظه دي هحارب علشان اوصلها وامسك كل تفاصيلها ومقاومتها واحقق فيها نجاح كبير زي ما ناس كتير قالت لاشينه متعرفش تلعب شخصيه دولت هانم في مسلسل حواديت الشانزليزيه وعملتها ونجحت فيها بجداره.
امتي صرختي بصوت عالي وقلت “خطفوني” في 2025؟
لا مش هصرخ أنا نفسي اتخطف.
مين “بابا” المجال؟
استاذ عادل إمام
تصرف عملتيه في 2025 واعتبرته “خطيه“؟
الحمد لله رب العالمين مافيش احنا ماشيين بستر ربنا.
شخص بتقولي “بتمني انساك” وأنا بقفل 2025؟
مافيش حد.
مين زعلتيه في 2025 و بتقولي له “سوري” صافيه لبن قبل ما نبتدي 2026؟
اللي يزعل يتفلق.
مين تقولي له وانتي داخله 2026 “الله يحنن” و هتقفلي بابك في وشه ؟
كل شخص زعلته ويجي يقولي زعلان هقوله اتفلق يالا يا بابا الله يحنن وخد الباب في ايدك وأنت ماشي.
مين Superwoman 2025؟
لاشينه لاشين.
مين اكتر ناس اتعاملتي معاهم في 2025 وكانوا ايقونه “الذوق العالي” ؟
ناس كتير بس حقيقي كان أبرزهم الاستاذه كامله أبو ذكري انسانه راقيه جدا واللي في قلبها علي لسانها.
نفسك تشوفي مين قبل ما تنتهي 2025 وتقولي له “واحشني يا ابن اللذينا” ؟
للاسف مبقاش فيه حد بيوحشني.
مين في حياتك شايفاها “ملكه جمال الكون“؟
الجمال نسبي في جمال شكل وجمال روح.
كام مره قلت محتاج “دكتور” نفسي في 2025؟
أنا محتاجه اروح لدكتور نفسي.
توجهي لمين رسالة تهديد في 2026 وتقولي له صبرا… “لينا ميعاد“؟
اي حد يحاول يتجاوز حدوده معايا هقوله صبرا لينا ميعاد.
مين هتقولي له في 2025 “خلونا نشوفكم تاني“؟
مافيش حد.
كام مره قلت في 2025 “الاحتياج وحش” ؟
ربنا ما يحوجنا لحد.
مين هتقوله وانت خارج من 2025 “هوينا“؟
اي شخص تقييييييييييل وطاقته تقيله بقوله هوينا.
امتي تشوف الست”سلطانه“؟
لما يجي السلطان.
لو هترسمي لشخص واحد فقط “احلى رسمه” هيكون مين ؟
توتي و سوسي احفادي.
قلتي امتي في 2025، “حب تاني” لا؟
للاسف قلبي مدقش.
إيه الوعود اللي وعدت نفسك بيها في بدايه مشوارك الفني و متحققتش؟
للاسف في سنه 90/92 اتقال وقتها انتظروا لاشينه لاشين هتكون نجمه في الكوميديا لكن أنا اختارت أني أكون ام ولما خلفت اولادي تفرغت ليهم فتره كبيره لرعايتهم واعدت في البيت.
شخص تقولي له في آخر 2025 اوعدك “عليا تهون“؟
اي شخص هنت عليه.
مين اكتر حد صدمك في 2025، خلاك تقولي.. “أنا تبيعني“؟
الناس قليله الأصل واللي خذلوني كتير بس اي حد باعني أنا بعته وكسبت فيه كمان مبقتش اهتم ولا افكر زي زمان.
امتي حسيتي فيه انك محتاجه صحابك وشفتي ان “مفيش جدعنه” خالص؟
الحمد لله صحابي حواليا مش كتير والدايره صغيره بس اللي حواليا كفايه
“خبر عاجل” نفسك تعلني عنه في بداية 2026؟
خبر عاجل…. مش عارفه.
أول “قرار شخصي” هيتم تنفيذه في حياتك الشخصية في بداية 2026؟
اسافر.
لو “لينا عمر” ايه أول حلم نفسك تحققه في 2026؟
هحلم بايه وأنا ست داخله علي الستين.. هحلم بس أن ربنا يرزقني بحسن الخاتمه.
في النهاية نشكر الفنانه القديرة لاشينه لاشين علي هذا الحوار الأكثر من رائع علي وعد بحوار آخر مع نجم جديد ونجاحات جديدة مع ريهام طارق.
ريهام طارق صحافية مصرية من أصول لبنانية، متخصصة في كتابة الأخبار الفنية والثقافية، وأجرت حوارات مع نخبة من أبرز نجوم الغناء والتمثيل في الوطن العربي، تشغل حاليًا منصب رئيس قسم الفن ومساعد رئيس التحرير بجريدة {أسرار المشاهير} في جمهورية مصر العربية.
بدأت مسيرتها المهنية من المملكة العربية السعودية عبر جريدة {إبداع}، في الرياض قبل أن تنتقل للعمل في عدد من المؤسساالنهارت الإعلامية الكبرى في الوطن العربي، منها {جريدة الثائر و جريده المغرد} في لبنان، وجريدة {النهار} في المغرب، ومجلة {النهار} في العراق، ومجلة {المحور} في الكويت.
إلى جانب نشاطها في الصحافة الفنية، كتبت ريهام طارق مقالات تحليلية في مجالات السياسة الدولية وأسواق المال الأمريكية والأوروبية، كما تولت عضوية اللجنة الإعلامية في المهرجان القومي للمسرح المصري. وتقدم حاليًا محاضرات متخصصة في الصحافة في مسقط، عاصمة سلطنة عمان.