نيللي مظلوم الشهيرة ب لاتانيا… كشفت عن أسرارها ولم تخشى الإنتقادات

نيللي مظلوم الشهيرة ب لاتانيا... كشفت عن أسرارها ولم تخشى الإنتقادات

نيللى مظلوم .. نجمة استعراضية مصرية شهيرة من أصول يونانية ولدت في مدينة الاسكندرية في عام 1925 وبدأت الرقص على المسرح منذ كانت في الخامسة من عمرها وبرزت في مجالها حتى صارت من الرائدات في الرقص المعاصر وقامت بتأسيس مدرسة للباليه .

كتبت / غادة العليمى

وشاركت في بطولة عدد من الأفلام خلال حقبتي الأربعينات والخمسينات وكان أبرز شخصياتها هى شخصية لاتانيا في فيلم (ابن حميدو). غادرت نيللي مظلوم مصر في منتصف الستينات بعد المصاعب التي واجهتها فيما يتعلق بفرقتها، واستقرت في اليونان منذ ذلك الحين وأسست هناك مدرسة للرقص. توفيت في عام 2003 رحمة الله عليه

ولكن صدق او لا تصدق عزيزى القارئ ان اول واشهر نجمة استعراضيه فى السينما المصرية كانت تعاني من الشلل هذا ما كشفته نيلى مظلوم بنفسها
فى حديث صحفى لمجلة الكواكب فتحت النجمة الجميلة قلبها وروت مالا يمكن ان يصدقه مشاهد عنها وعن حياتها

قالت وهى تضحك على اكثر فصول حياتها شدة وضيق
طبعا المشاهد عمره ما يصدق ان الراقصة المشهورة كانت فى طفولتها مشلولة وكانت علشان تتحرك من مكان لمكان لازم حد يشيلها لحد ما أمها تعبت فبقت تتحرك بيها بعربيات الأطفال الصغار
ولكن الصدف اللى كانت فى حياتى كانت اغرب من خيال الافلام اللى مثلتها فى السينما وهى اللى صنعت نيلى مظلوم الفنانة المشهورة

الصدفة الاولى

فى يوم من الأيام ونيلى ووالدتها بيقضوا وقت على شط بحر إسكندرية قرب راجل كبير من نيللي وسألها عن اسمها فأمها أخدت بالها إن فى حد غريب بيكلمها فقالت : “أيوه يا حضرة .. اؤمر” .. فقالها “معلش عندى سؤال لما هى بنت كبيرة كده ليه سايبينها فى عربية أطفال؟
ما تخلوها تمشى” .. فقالت “والله هى تعبانة ومش بتتحرك أصلا” فخدها على جنب بعيد عن نيللى وقالها : “طيب أنا هعمل معاكى صفقة البنت جميلة جدا وأنا هحط صورتها على منتجات شركتى والشركة اللي هى متخصصة فى صناعة الشيكولاته تتكفل بعلاجها من الشلل”

طبعا الست وافقت وفضل الراجل ورا نيللى لحد ما خفت وقدرت تمشى وتجرى كمان واضافت نيللي إنه من يومها وهى بتؤمن بالحظ والدور الكبير اللي القدر بيلعبه فى حياة الناس

الصدفه الثانية

فى مرة تانية كانت نيللي فى النادي وشافتها ست جميلة قدمت نفسها ليها على إنها صاحبة فرقة لتعليم البالية وإنها عايزة تضمها لفرقتها فنيللي قالت تجرب حظها وشاركت مع الست اللي قربت منها وأولتها رعاية خاصة لحد ما بقت نيللي مظلوم الراقصة الأولى فى فرقتها بعد ان برعت فى الرقص واكتشفت موهبتها فى فنون الاستعراض

الصدفه الثالثة

فى مرة تالته راحت نيللي تزور واحدة قريبتها نقلت مقر إقامتها فى عمارة جديدة
يومها راحت نيللي العنوان وطلعت الدور اللى قريبتها قالت لها عليه رنت الجرس وفتح لها واحد ابتسم فى وشها وفضل يتطلع فيها ولما سألت عن قريبتها عرفت إنها رنت جرس شقة غلط لكن تاني اليوم الراجل ده راح لقريبتها سأل عن نيللي وطلبها علشان تشتغل معاه فى السينما.. الراجل ده يبقى المخرج عباس كامل الغنى عن التعريف

وهكذا ساهمت الصدف الثلاثة فى صناعة النجمه الراقصة المحبوبة نيلى مظلوم
ليثبت القدر صدق مقولة يوسف بك وهبى ما الدنيا الا مسرح كبير

نبذة عن الفنانة

اشتهرت بإسمها الفنى نيلى مظلوم واسمها اليونانى اولجا
ولدت فى الاسكندرية سنة ١٩٢٩ من أسرة يونانية ميسورة الحال مثلت تقريبا فوق الثلاثين فيلم . وتزوجت من اليونانى اندرية روسوس عام ١٩٥٠.

تزوجت الفنانة ٦ مرات وكان أحد أزواجها مصري يوناني يدعى أندرياس روسوس وهو والد المطرب الشهير ديميس روسوس من زوجة سابقة
اعتنت نيللي مظلوم بالطفل ديميس لفترة طويلة حتى تم الاعتقاد انها والدته
كما تزوجت من الدكتور عاطف صدقي رئيس وزراء مصر الأسبق

وفى عام ١٩٥٢ تم التأميم على أسرتها وافلست العائلة وفى منتصف الستينات تركت مصر وعادت إلى اليونان وعاشت هناك إلى أن توفت عام ٢٠٠٣عن عمر ٧٧عاما ودفنت بأثينا . وتوفى أسطورة الغناء ديميس روسوس عام ٢٠١٥ودفن أيضا بجانبها رحمة الله عليهما