اعداد وحوار: ريهام طارق
بدأ العد التنازلي لوداع عام 2025، ذلك العام الذي رسخ حضوره كإحدى المحطات الفارقة في مسار المشهد الموسيقي المصري والعربي، بعدما اتسم بزخمٍ إبداعي لافت، تجلى في إنتاج فني ثري وحصاد واسع من الأعمال الغنائية الناجحة، بصوت وايدي كوكبة من الفنانين المصريين والعرب.
رافقتنا هذه الأعمال الغنائية على امتداد 365 يومًا، و توغّلت في تفاصيل حياتنا اليومية، وارتبطت بمحطات عشناها بين لحظات فرح و حزن، إنكسار و انتصار، ولحظات نجاح وأحيانا فشل، وربما كانت وقت صعب واجهنا فيه الخذلان والخيانة، لتغدو في النهايه جزءًا أصيلًا من ذاكرتنا.
ومن هنا تبلورت فكرة هذا الحوار، عبر تسليط الضوء على أبرز الأغاني وأكثرها تميّزًا ونجاحًا خلال عام 2025، وتوظيف عناوين تلك الأعمال، في صياغة أسئلة وُجّهت إلى ضيفي، لتأتي إجاباته كاشفة عن جانب إنساني وخاص جدا في حياتهم الخاصة، لم يتعرف عليها من جمهوره ومحبيه، بما يتيح الفرصة الاقتراب منهم بصورة أكبر وأكثر صدقًا، و ضيفي في هذا الحوار الملحن أحمد البرازيلي الذي يعد من الأسماء المتميزة في الوسط الموسيقي.
منة الهاشمي: أسعى لصنع بصمتي الخاصة… وأحمد البرازيلي هو الداعم الأول لحلمي
في البداية نرحب بالملحن أحمد البرازيلي في جريدة أسرار المشاهير ونشكره على إتاحة الفرصة لإجراء هذا الحوار.
شخص جه في بالك حالا و هـ تعزمه علي “العنب الساقع“؟
اكيد زوجتي الحبيبة الشاعرة الغنائية منه الهاشمي.
مين بعدت عنه في 2025 وبتقوله “كيفك علي فراقي“؟
اي شخص ندل وخسيس كلمني علشان المصلحه فقط ، ولما مريت بأزمة ملقتوش، ولما وقفت تاني علي رجلي رجع كلمني.
امتى تعبت في 2025 وقلت والله ده “هد حيل” ؟
لا بفضل الله عمري ما حسيت بالإحساس ده لأن اعتمادي كله على رب العزة، ومؤمن بالايه “لَا يُكَلِّفُ اللَّهُ نَفْسًا إِلَّا وُسْعَهَا”، الحمد لله ربنا دايما معايا وعمره ما اتخلى، و لو حصل، ووقعت بفضل الله بقف تاني بسرعه مش بستسلم..
جابر جمال الدين: إللي يعطلني هقوله الله يحنن و هقفل بابي في وشه
تقول لمين أنت “حبيبي وابن حبيبي“؟
زوجتي الحبيبة الشاعرة منه الهاشمي.
مين هتقول له “صاحبي يا صاحبي” أنت معايا في 2026؟
والدي الحبيب وزوجتي الغاليه.
أحمد زعيم: أنا عمري ما بعدت عن حد بإرادتي أنا ببعد بسبب غبائهم
مين اللي ودعنا من الوسط الفني في 2025 وبتقوله “فعلا مبيتنسيش“؟
محمد رحيم واحمد علي موسي
مين هتقوله وانت داخل 2026 “ميتعزش“؟
كل شخص ندل موقفش جنبي في وقت صعب مريت بيه
لو تم دعوتك “حفله تنكريه” نفسك تلبس اي شخصية مطرب او ممثل من زمن الأبيض والأسود ؟
لو مطرب هيكون محمد فوزي ولو ممثل هيكون توفيق الدقن علشان بحبه جدآ.
إسلام الجريني: أوجه رسالة لأنغام وأقول لها: صبرا يا أستاذة… لينا ميعاد
مين تفتكر قلة اصله معاك في 2025 تضحك وتقول والله “عيونه عليا هدمع”؟
مفتكرش ان في حد عيونه هتدمع علي حد في الزمن، ده المشاعر دي كانت موجودة زمان بس، لكن دلوقتي خلاص الناس بقى عندها بلاده و برود في المشاعر
مين كان “ضل حيطة” في حياتك في 2025؟
الحمد لله عمري ما كان في حياتي شخص ضل حيطه.
بتقول لمين في 2026 والله لاكون “عقده حياته” في 2026؟
اي حد راهن على فشلي و شاف إني ماليش قومه تاني.
مين “رقم واحد” في حياتك في 2026؟
الله سبحانه وتعالي.
امتي قولت في 2025 الوسط الفني “خذلني“؟
طبعا بقول كده دايما مش في 2025 بس ،لان ببساطه الوسط الفني مالوش امان، طول ما أنت نجم وناجح الدنيا كلها معاك وفي صفك ولو وقعت الكل هيتخلي عنك.
امتى حسيت انك شايل “الشيله كامله” ؟
لما كنت لوحدي مريت بفتره صعبه جدا في حياتي وقابلت مراتي وحبيتها وهي عندها سليم وسلينا من زواجها الأول وبنتي كانت متاخده مني تلت سنين ورجعت لي دالوقت في حياتي اربع اشخاص أنا مسؤل عنهم فحسيت اني شيلت الشيله كامله وسعيد بيها لانهم منورين حياتي ومالوها سعاده وفرح.
كام مره اتقال لك “اهدي” وأنت بتشتغل في 2025؟
كل مرة بشتغل فيها.
تقول لمين كل كلامك كان “كلام فارغ ” في 2025؟
اي حد اتكلم عني كلام وحش ومش حقيقي او حكم عليا من مظهري من غير ما يعرفني أو يعرف ظروفي.
هاله الزيات: كل شخص منافق اتمنى اكون عقدة حياته
مين الشخص اللي بتقول لنفسك “مكرهتوش” بعد ما ودعته في 2025؟
اي حد بودعه لا بحبه ولا بكرهه مبشفوش أصلا.
مين اللي دخل حياتك في 2025 وقولت “كأنه مجاش“؟
المصلحجي.
مين اكتر شخص كان “بيستهبل” في حياتك 2025؟
مش عارف بس دالوقت بقت اغلب الناس بقت يتستهبل.
من تقوله “تيجي نحارب” في 2026؟
زوجتي منه الهاشمي.
مين بتحس انك مطمن ومرتاح معاه وبتقوله محتاج “أحكيلك خوفي” ؟
زوجتي وامي بس المشكله ان امي بتقلب كل المواضيع هزار، بس برده بحبها وهي كل حياتي
مين اللي لو سألوك عنه هتقول “معرفش حد بالاسم ده” في نهايه 2025؟
كل شخص خذلني.
تقول لمين في بداية 2026 “تيجي نرجع“؟
الزمان..قول للزمان ارجع يا زمان
مين بتقوله في 2026 “قبلت التحدي“؟
شغلي لاني محدد هدفي اني بسعي لأكون أكبر وانجح.
نفسك تقول لمين “بدي اقول بحبك“وأنت بتستقبل 2026؟
قلتها لزوجتي السنه اللي فاتت و هقولها السنه دي و كل سنة أن شاء الله.
امتي صرخت بصوت عالي وقلت “خطفوني” في 2025؟
أول ما شفت زوجتي منه الهاشمي أول مرة
مين “بابا” المجال؟
بالتأكيد الهضبه عمرو دياب
ايه التصرف اللي عملته في 2025 واعتبرته “خطيه” ؟
كنت لسه بثق في الناس ثقه عمياء.
مين الشخص اللي بتقول له “بتمني انساك” وأنت بتقفل 2025؟
أنا لما بخرج شخص من حياتي بنساه علي طول مش بتمني انساه أنا اقوي بكتير من كده.
مين زعلته منك في 2025 وبتقوله “سوري” صافيه لبن قبل ما نبتدي 2026؟
لا.. اللي زعلته في 2025 اكيد مش عايزه معايا في 2026 لأني دايما بكون أنا الاكشن مش ريأكشن.
مين تقوله ومن داخل 2026 “الله يحنن ” و هتقفل الباب في وشه ؟
ناس كتير، من الوسط الفني قطعت علاقتي بيهم بعد ما اديتهم فرص كتير ولاقتهم فعلا ميستحقوش ولا يستاهلوا.
مين شايفها Superwoman” 2025″؟
والدتي أولا لأنها تعبت في تربيتي وكبرتني وزوجتي منه الهامشي لأنها حقيقي انسانه بتعرف يعني ايه مسؤولية ، ونجحت أنها تشيل مسؤوليه بيتنا وكل تفاصيل حياه أولادنا كامله علشان تخليني مركز في شغلي.
ناس اتعاملت معاهم في 2025 وكانوا ايقونه “الذوق العالي“؟
ناس كتير بصراحة قابلتهم كانوا فعلا ايقونه في الذوق العالي
مين نفسك تشوفه قبل ما تنتهي 2025 وبتقوله “واحشني يا ابن اللذينا” ؟
جدي الله يرحمه بس منه غير يا ابن اللذينا.
مين في حياتك”ملكه جمال الكون“؟
اكيد زوجتي وبنتي مافيش غيرهم.
كام مره قلت محتاج “دكتور” نفسي في 2025؟
كتير كل ما بتعامل مع شخص.
مين توجه له رسالة تهديد في 2026 وبتقوله صبرا… “لينا ميعاد“؟
شغلي دايما بهدد نفسي بيه وأقول لازم ابقي اكبر واقوى وانجح واقوله اتقل عليا ان شاء الله هاخدك في حته احلي.
تقول لمين في نهاية 2025 “خلونا نشوفكم تاني” ؟
اي حد كان ابن أصول واتعامل معايا بأخلاق راقية.
امتي حسيت في 2025 ان “الاحتياج وحش” ؟
الحمد لله ولا مره دايما ربنا معايا جمبي وساندني، ومش بحتاج حد غيره هو اللي بيسخر لي كل الناس وكل حاجة حلو ولو حتي كان في حاجة وحشه بيكون مستخبي فيها حاجه احلي، ولو علمتم الغيب لاخترتم الواقع
امتي بتشوف الست”سلطانه“؟
لما بشوف زوجتي منه الهاشمي، دايما بشوفها في عيوني سلطانه، هي انسانه بتحاول دايما تسعدني و تفرحني طول الوقت فهماني.. بتكملني، بتحاول طول الوقت توفر كل أسباب الراحة علشان اقدر اركز و انجح في شغلي.
لو هترسم لشخص واحد فقط “احلى رسمه” هيكون مين ؟
زوجتي وبنتي ديجا.
حصل وقلت “حب تاني لا” في 2025؟
طبعا لان حبي لزوجتي منه الهاشمي هو خلاص الحب الأول والأخير مافيش غيره.
في النهاية نشكر الملحن أحمد البرازيلي على هذا الحوار الأكثر من رائع على وعد بحوار آخر جديد مع نجم آخر ونجاحات جديدة مع ريهام طارق.
نبذة عن الكاتب:
ريهام طارق صحافية مصرية من أصول لبنانية، تخصصت في كتابة الأخبار الفنية، أجرت عدد كبير من الحوارات الفنية مع كوكبة من أهم نجوم الوطن العربي، تشغل حاليًا منصب رئيس قسم الفن ومساعد رئيس التحرير بجريدة {أسرار المشاهير} بجمهورية مصر العربية.
بدأت مسيرتها المهنية من المملكة العربية السعودية في الرياض عبر جريدة {إبداع}، ثم انتقلت للعمل في عدد من المؤسسات الإعلامية الكبرى في الوطن العربي، منها {جريدة الثائر و جريده المغرد} في لبنان، وجريدة {النهار} في المغرب، ومجلة {النهار} في العراق، ومجلة {المحور} في الكويت.
إلى جانب نشاطها في الصحافة الفنية، كتبت ريهام طارق مقالات تحليلية في مجالات السياسة الدولية وأسواق المال الأمريكية و الأوروبية، كما تولت عضوية اللجنة الإعلامية في المهرجان القومي للمسرح المصري. وتقدم حاليًا محاضرات متخصصة في الصحافة في مسقط، عاصمة سلطنة عمان.