إعداد وحوار: ريهام طارق
بدأ العد التنازلي ونودع 2025 ، وهي سايبه وراها ذكريات كتير عشناها منها حب بدء ونهاية اتكتبت.. شفنا أيام مليانه فرح وليالي كانت كلها حزن وقلق ، عشنا فيها لحظات انكسار، ولحظات قوة، واجهنا الخذلان من اكتر ناس وثقت فيهم، وعوضنا ربنا بعدها بأشخاص قدمت لينا كل الدعم والمساندة.
سنة فارقنا فيها اغلي الناس، ودخلوا حياتنا ناس غيرهم حياتنا و أصبحوا اعز الناس.. خلصت 2025، تركت ذكريات ارتبطت كل منهم بأغنية بيها كانت شاهدة على تفاصيل حكايتها.
في عام 2025، كانت الأغاني محطات استثنائية و فارقة تركت أثراً خاص في المشهد الموسيقي، وصنعت مسارات جديدة لفنانين استطاعوا الجمع بين الرؤية الفنية الحديثة والمختلفة والحضور الجماهيري أيضا .
وهنا من خلال حوارنا مع الشاعر الغنائي أحمد شكري نسلّط الضوء على أبرز عناوين الأغاني التي تصدّرت المشهد، وأسهمت في ترسيخ أسماء فرضت نفسها بقوة، وحققت نجاحًا ملموسًا وتأثيرًا واضحًا في 2025.
في البداية نرحب بالشاعر الغنائي أحمد شكري في جريدة أسرار المشاهير ونشكره على إتاحة الفرصة لإجراء هذا الحوار:
مين اول شخص جه في تفكيرك حالا و نفسك تعزمه علي.. “العنب الساقع“؟
صديقي الملحن الكبير شريف بدر.
بتقول لمين في نهاية 2025.. “انت حبيبي وابن حبيبي”؟
بقولها لأخواتي كلهم .. خصوصا اخويا مصطفى شكري.
هتقول لمين .. “صاحبي يا صاحبي” أنت معايا في 2026؟
الملحن فارس فهمي و الشاعر الغنائي مودى نبيل.
امتى تعبت في 2025 وقلت والله ده “هد حيل” ؟
كان في أول 2025 وأنا بجهز منزلي الخاص.
شخص بعدت عنه في 2025 وبتقوله في نهايتها.. “كيفك علي فراقي“؟
الحمد لله مافيش حد بعدت عنه في 2025 كلهم حبايبي و معايا.
فنان ودعنا من الوسط الفني في 2025 بتقوله.. “فعلا مبيتنسيش“؟
اكيد الملحن محمد رحيم، و الملحن محمد النادي
تقول لمين وانت داخل 2026 “ميتعزش“؟
لاي حد حاول يستغلني بأي شكل وبأي طريقة.
لو تم دعوتك لحضور “حفله تنكريه” نفسك تلبس اي شخصية من زمن الأبيض والأسود ؟
اتمنى البس شخصية أبو السعود الإبياري لأنه كان مثال كبير اوي للسهل الممتنع في كتاباته.. وانا شخصياً اتعلمت منه كتير
شخص كل ما تفتكره تقول والله.. “عيونه عليا هدمع” و هيندم على قلة اصله معايا في 2025؟
البنت اللي كتبت فيها اغنية رصيد الستر لمحمد شاهين
شخص حلفت وقلت والله لاكون.. “عقدة حياته” في 2026؟
أنا مش بركز مع حد ولا بشغل نفسي غير بنفسي.. و منافستي مع نفسي فقط
امتي قت في 2025 وقلت الوسط الفني.. “خذلني“؟
لاء بالعكس دي كانت سنة كويسة اوي بالنسبالي في الشغل
امتى حسيت انك شايل.. “الشيله كامله” ؟
وفاة امي في 2014.
كام مره اتقال لك.. “اهدي” وأنت بتشتغل في 2025؟
مش كتير لاني بطبعي هادي ومش بحب الانفعال أو التسرع.
تقول لمين كل كلامك.. “كلام فارغ ” في 2025؟
شخص اتكلم عن مصر كلام وحش او حاول يقلل من دورها ومكانتها..اقوله كل كلامك فارغ لاني مصر كبيرة وماشية بخطى ثابتة خصوصاً في الحقبة اللي احنا فيها دلوقتي وربنا يحفظها دايماً
شخص ..”مكرهتوش” بعد فراقكم في 2025؟
ملحن اشتغلت معاه زمان بس بطلت اشتغل معاه لأسباب معينة بس مكرهتوش
شخص دخل حياتك في 2025 و حسيت إنه “كأنه مجاش“؟
الفلوس اللي دخلت لي في 2025، لاني بحب اصرف كتير و ماشي بمبدأ اصرف مافي الجيب ياتيك ما في الغيب.
مين اكتر شخص كان “بيستهبل” في حياتك 2025؟
شخص كان بيستهبل في حياتي 2025 هو الدايت والچيم لانهم مش عايزين يظبطوا معايا خالص معرفش مزعلهم ف ايه
تقول لمين ..”تيجي نحارب” في 2026؟
زمايلي الملحنين اللي بنشتغل سوا.. بقولهم يلا نحارب عشان نبقى أفضل وأكثر تواجدا في 2026
مين بتحس انك مطمن معاه وبتقوله محتجالك “احكيلك خوفي” ؟
صديقه قريبه جدا مني بعتبرها اختي بثق فيها وفي تفكيرها و بآرائها..وبالمناسبة هي من خارج الوسط.
شخص لو سألوك عنه في 2026 هتقول.. “معرفش حد بالاسم” ده”؟
شخص يحاول يزعلني او يقل مني حتي لو مرة واحدة.. مبعرفوش تاني.
تقول لمين في بداية ..2026.. “تيجي نرجع“؟
ايام الجامعة، لانها احلى ايام ف حياتي.
مين بتقوله في 2026.. “قبلت التحدي“؟
الهضبة عمرو دياب اللي اتحدى نفسي اني اكون معاه ف 2026 وهحاول اعمل كدة واشتغل على كدة
نفسك تقول لمين.. “بدي اقول بحبك“في بداية 2026؟
شغلي لاني بحبه جدا.
أمتي صرخت بصوت عالي وقلت.. “خطفوني” في 2025؟
كانت بنت فعلا خطفوني عيونها وحاولت اعبر لها عن ده و اتقدم لها لكنها رفضت لأنها مرتبطة،، وانا احترمت ده طبعاً و بعدت عنها خالص.
مين.. “بابا” المجال؟
اي حد بيحاول يجتهد ويقدم لنا حاجة كويسة وجديدة في اي مجال
تصرف عملته في 2025 واعتبرته.. “خطيه” ؟
عدم اهتمامي بصحتي بالشكل الكافي
بتقول لمين.. “بتمني انساك” وأنت بتودع 2025؟
هو الكسل والتأجيل لان دول اخطر حاجه ممكن تعطل نجاح فنان ف الدنيا
شخص زعل منك في 2025 وبتقوله.. “سوري” صافيه لبن قبل ما نبتدي 2026؟
مافيش حد لاني مبعرفش ازعل حد..هما اللي بيزعلوني والله
تقول لمين وإنت داخل 2026 “الله يحنن “و هتقفل بابك في وشه ؟
البنت اللي كتبت لها كلمات اغنية “رصيد الستر لو فكرت ترجع لي.
مين شايفها في Superwoman” ..2025″؟
كل الأمهات المصرية اللي بيتعبوا و يشقوا على أولادهم و عايزينهم احسن الناس.
ناس اتعاملت معاهم في 2025 وكانوا ايقونه.. “الذوق العالي“؟
الاستاذ ياسر حسين عضو شركة قنوات ده قمة الزوق معايا في 2025، كذلك المنتج الكبير استاذ هاني محروس اللي بحبه جدا و بحترمه، كذلك اخواتي الملحنين فارس فهمي وشريف بدر ومصطفى شكري ووليد سامي والنجم محمد شاهين اللي بعتبره اخويا برضو
مين نفسك تشوفه قبل ما تنتهي 2025 وبتقوله.. “واحشني يا ابن اللذينا“؟
أبويا وامي الله يرحمهم.
مين في حياتك شايفها.. “ملكه جمال الكون“؟
مراتي اللي لسة مجتش ولسه معرفش مين هي بس اكيد هتكون هي بالنسبالي وفي عيوني ملكة جمال الكون.
كام مره قلت محتاج.. “دكتور” نفسي في 2025؟
ولا مرة أنا بلجأ لربنا دايماً لما باكون نفسيتي تعبانة و بلاقي عنده العلاج دايما ومن اول جلسة
توجه رسالة تهديد لمين في 2026 وبتقوله صبرا… “لينا ميعاد“؟
مفيش حد لاني مبشغلش بالي بحد وانا بطبيعتي متسامح ومش بعرف أشيل جوايا وحتى لو حصل وحد زعلني بخرجه من حياتي للأبد بهدوء.
تقول لمين في نهاية 2025.. “خلونا نشوفكم تاني” ؟
اقولها لكل نجاح حققته في حياتي واتمني يتكرر و يكبر اكتر واكتر.
قلت كام مرة في 2025.. “الاحتياج وحش” ؟
.كتير بصراحة بس بيني وبين نفسي
تقول لمين وانت خارج من 2025.. “هوينا“؟
للأفكار السلبية
لو هترسم لشخص واحد فقط.. “احلى رسمه” هيكون مين ؟
لو هرسم لشخص واحد بس احلى رسمة هتكون لوالدي الله يرحمه.
حصل وقلت “حب تاني” لا في 2025؟
لاء.. ومش هقول لاني بحب الحب ومهما انخذلت في الحب، واثق ان الشخص المناسب اللي يحبني بجد ويخلص لي و احبه هيجي ف يوم
ايه..”الوعود” اللي وعدت بيها نفسك و حققتها في 2025؟
إن يكون ليا اغاني مؤثرة، وده تحقق الحمد لله، وحلمت ان اسمي يكون موجود على تتر مسلسل وده كمان تحقق الحمد لله وشاركت لأول مره في الدراما التلفزيونية من خلال مسلسل المداح…واللي بوعد نفسي بيه في 2026، هو الوصول لنجوم الصف الأول في زي عمرو دياب و تامر حسني و حماقي.. وبالمناسبة انا كنت قريب جدا من ده في وقت من الأوقات لكن شاء الله ان ده يتأخر شوية
شخص كان مستحيل يهون عليك في 2025 وبتقول له في 2026 اوعدك.. “عليا تهون” ؟
هقولها للعزوبية.. في حاجات مهمة مفتقدها وانا عازب.. علشان كدة هتهون عليا في 2026 ان شاء الله
شخص صدمك في 2025 خلاك تقول “أنا تبيعني “؟
محدش صدمني في 2025 لاني معود نفسي اني اكون دايماً مستعد ومتوقع قلة الأصل من اي حد، فلو حصلت مش بنصدم وباخد الامر عادي وبشوفه شخص رصيد سترة قدامي خلاص وانكشف لي.
وقت حسيت فيه انك محتاج صحابك وشفت ان.. “مفيش جدعنه خالص“؟
وقت وفاة والدتي، بس انا متفهم ان مش كل الناس بتعرف تكون حنينة وتعرف تطبطب ويحسوا من نفسهم انك محتاجهم..انا بشوف أن المشاعر دي هي موهبة زي اي موهبة ما بتبقاش موجودة عند كل الناس وعلينا اننا نتقبل ده ونتعايش معاه
“خبر عاجل“.. تتمني تعلن عنه في بداية 2026؟
هما خبرين.. أول خبر هو خبر زواجي والخبر التاني بحلم في 2026 اكتب بوست “قريباً مع الهضبة عمرو دياب”
“قرار شخصي“.. هتقوم تنفيذه في بداية 2026؟
هحاول اكون اكثر جدية في محاولاتي العثور على شريكة حياتي
“لو لينا عمر”.. ايه أول حلم نفسك تحققه في 2026؟
اتجوز بنت تحبني وأحبها
في نهاية الحوار نشكر الشاعر الغنائي أحمد شكري علي هذا الحوار الأكثر من رائع على وعد بحوار آخر مع نجم جديد ونجاحات جديدة مع ريهام طارق.
نبذة عن الكاتب
ريهام طارق صحافية مصرية من أصول لبنانية، متخصصة في الأخبار الفنية والثقافية، أجرت حوارات صحفية مع نخبة من أبرز نجوم الفن في الوطن العربي، وتشغل حاليًا منصب مساعد رئيس التحرير ورئيس قسم الفن بمؤسسة [اليوم للإعلام] التابعة للهيئة الوطنية للإعلام، والتي تضم عددًا من الإصدارات الصحفية، من بينها جريدة أسرار المشاهير، اليوم الدولي، أخبار مصر 24، وجريدة تريندات العالم في جمهورية مصر العربية.
انطلقت مسيرتها المهنية من المملكة العربية السعودية،عبر جريدة [إبداع] في الرياض، قبل أن تنتقل للعمل في عدد من المؤسسات الإعلامية الكبرى في الوطن العربي، من بينها جريدة [الثائر] وجريدة [المغرد] في لبنان، وجريدة [النهار] في المغرب، ومجلة [النهار] في العراق، ومجلة [المحور] في الكويت.
كتبت ريهام طارق عددًا من المقالات التحليلية المتخصصة في مجالات السياسة الدولية وأسواق المال الأمريكية والأوروبية، كما شغلت عضوية اللجنة الإعلامية للمهرجان القومي للمسرح المصري، وتعمل حاليًا على تقديم محاضرات متخصصة في الصحافة بمدينة مسقط سلطنة عمان.