أحمد عز يتذكر .. ربع قرن من القلق والمعاناة .. ماحدش سأل فئ ولابعتلي دعوة

 

 

 

أحمد عز .. فاجأنا بعد عبوره الريد كاربت ليتسلم جائزته بالوقوف أمام الميكرفون ليفتح قلبه متذكرا ٢٤ عام من الجهد والقلق والتعب حتى النجومة والتكريم

 

كتبت / غادة العليمى

 

وقف مبتسما سعيدا فخوراً وتطلع فى الحضور وسرد مشواره الفنى فى جمل قصيره قال فيها ..

من حوالي 24 سنة بالظبط خيروني بين إني أكمل شغلي أو أعمل بطولة أول فيلم وعلى غير رغبة أهلي اخترت اخش التمثيل وابتديت أصور.

في نص التصوير كدة جه مهرجان القاهرة وكان نفسي أحضره وكان نفسي أكتر تجيلي على الدعوة البيت مكتوب عليها الفنان أحمد عز.

مش لسبب قد إني أقول لأبويا وأمي إني اخترت صح فضلت مستني الدعوة أسبوع واتنين ومفيش دعوة لحد جه يوم المهرجان والدعوة مجتش فـ روحت سألتهم وكانوا غاية الكرم معايا وإدوهاني.

 

رجعت البيت خدت دش وحلقت دقني ولبست وكنت عايز أبقى أبيض واحد في المهرجان وأتصور على الريد كاربت وأبويا وأمي يشوفوني .. روحت وعملت نفسي مثقل بالفن ، عديت على أول كاميرا محدش عرفني التانية كذلك وعديت على نايل سينما ونايل دراما والاسرة والطفل مفيش حد عرفني خالص .. قولت مش مشكلة.

 

كان نفسي أبقى قاعد في الصفوف الأولى في النص يشوفوني ويبقوا فخورين بيا جاي من الباب داخل لقيت الراجل بتاع الأمن قالي حضرتك قاعد فوق خاااالص وورا “بيشاور على المكان” قعدت فوق خالص

ونظر عز لابعد مكان فى القاعة وابتسم لفتاة تجلس فيه وقال “البداية كدة متقلقيش”.

ثم اكمل قصته فخورا سعيدا وقال: روحت البيت متضايق جدًا امي دخلت عليا ودعيتلي ربنا يناولك مرادك .. تلف الأيام وأقف دلوقتي على خشبة دار الأوبرا وأتكرم وآخد جايزة اسم صاحبة الجايزة لوحده جايزة “فاتن حمامة” لأ ومين اللي بيكرمني؟ معالي وزير الثقافة والأستاذ نجم النجوم اللي مجاش زيه حسين فهمي.

 

بس للأسف كل ده بييجي وأبويا وأمي مش موجودين .. لو كانوا موجودين أنا متأكد إنهم هيبقوا فخورين بيا بس الحمدلله.

 

الجايزة الكبيرة العظيمة دي مش اجتهاد مني لوحدي جايزة كل مخرج وزميل وزميلة وعامل وعاملة ولولا ضيق الوقت كنت ذكرتهم اسم اسم ولولاهم مكنتش هبقى هنا الجايزة دي حافز للي جاي أنا حاسس إني ماعملتش أي حاجة.

 

فاكر لحد النهاردة قعدتي مع المنتج وائل عبدالله وساندرا في ملاكي إسكندرية وهما بيفكرولي هيقدموني تاني ازاي فاكر ده كأنه امبارح عايز أهدي الجايزة دي لنجم عزيز عليا قالي في يوم من الايام “الالتزام والورق أبوك وأمك في الصناعة دي” والنصيحة دي لأي حد جديد ويارب ييجي يوم وكل زمايلي وصحابي يقفوا مكاني ويبقوا أحسن مني بهدي الجايزة دي للنجم الزعيم عادل إمام.

نبذه عن حياة النجم

أحمد عز مواليد (23 يوليو 1971 -) ممثل مصري

ظهر لأول مرة مع المغنية أصالة في كليب «لما جت عينك في عيني» وظهر أيضاً بمشهد صغير في فيلم كلام الليل للمخرجة إيناس الدغيدي التي أتاحت له الفرصة فيما بعد للقيام ببطولة فيلم مذكرات مراهقة في 2003 لفت الأنظار إليه عندما لعب دور البطولة أمام الفنانة يسرا في مسلسل ملك روحي، وبعده فيلمي حب البنات وسنة أولى نصب. ابتعد بعد ذلك عن الأدوار الرومانسية واتّجه لأفلام الحركة والإثارة والتشويق.

 

قدم ادوار منوعة ناجحة اخرها كان الفيلم المصرى الذى حقق ايرادات خياليه ( كيرا والجن )مع الفنان كريم عبد العزير والفنانة هند صبرى، ومازال عز يطمح فى المزيد من النجاح.