” ألف قصه وحدوته” بقلم نرمين الزيات

قصاقيص نفسيه

الآلم النفسي

سؤال تكرر أكثر من مره في جلسات
العلاج النفسي..لو سمحتي انا جايالك
علشان تعلميني محسش بالآلم!
أنا مش عايزه اتوجع..يعني لو سمعت كلام يضايق ويوجع؛ اعرف امسك نفسي وماعيطش.. وفي واحده قالت لي مش عايزه احس..وبعد كده بتنهار من العياط..للأسف من كتر الوجع  والألم اللي وصلوا ليه.. وصلوا لقرار انهم عايزين يتعاملوا مع نفسهم علي انهم بقوا خلاص روبوت.. جهاز هقرر يوقف دلوقتي.. فيتوقف فعلا!!
استوقفني الاحساس واتوجعت..ليه
نوصل للحاله دي..عارفين يعني ايه حد يوصل لحاله من قله الحيله  والعجز الرهيبه..الأصوات ما بتبطلش في دماغه..كلام مليان وجع ..اصوات تكسير ودوشه توجع القلب والعقل، كلام عايزه يخرج..ومش قادر، مخنوق.. كلام بيقول كفايه أذى،
تعبت ..ليه بتهد فيا.. ليه بتكسر فيا
مابقاش فيا حيل..هتستفاد ايه بوجعك ليا.. استاهل ايه لكل ده؟ اقولك.. عارفه اني ماستاهلش، عارفه اني ما استحقش.. بس ليه القسوه؟
هل فعلا بيبقوا ما يستحقوش..هل فعلا بيبقوا ما يستاهلون؟!

الاجابه اكيد لا!!

اللي جاي يطلب مني مش عايز أحس مش عايز اتألم.. مش عايز اسمع  الأصوات.. وقفيها ..وقفي الصوت، اللوم.. النقد.. وقفي صوت التبكيت والتقطيم، وقفي الصوت اللي شايفاه في عينيهم ومش عايزه اقراه بصوت عالي.. شايفاه بس كفايه.. بيبقي كل اللي في.. بالهم ماهو غصب عني مش هاينفع امشي، وده طبيعي مش كل حد فعلا عنده رفاهية الأنفصال، اه في أهل مش بيسندوا لما تكون بنتهم بتضرب وتتأذي..وعادي  هاتيجي هنصرف عليكي منين
وساعات بيبقي فعلا الوضع في الاسره.. منهار مادياً ..هما فعلا مش هايقدروا..وللأسف بيطالبوها تستحمل، فكأنها جايه تقول ..عايزه درع ..درع يحميني.. إيه ده..هي حرب… للأسف اه ..حرب والكسبان هو اللي هايحتفظ بنفسه هادي لآخر وقت، ومايتأثرش.. بتبقي خلصت كل الأفكار والطرق اللي ممكن تتعمل. تضحك مره.. وتسكت مره.. تدافع مره.. وتغضب مرات..ومافيش حاجه نافعه.. حاله من التوتر والقلق الشديد دقات قلب صوتها عالي.. كأنها طبول اعلان الحرب.. اللي بتوصل الانسان يقول طيب خلاص ماشي؛ هاستسلم بس ممكن بالله عليكوا أبقى بارده كده مابحسش..مابخدش الكلام علي اعصابي … ابتديت اشتغل علي
نفسي وكل ما ابتدي اقول لنفسي كلام حلو واصدقه فعلا عشان انا استاهله.. الاقيهم جايين ياخدوا مني الورد ويرموه في وشي..انتي هاتصدقي نفسك ولا ايه؟!

فارجع من تاني لنقطه الصفر!!

يااااه ..تعبت اوي عارفه لما تطلعي ادوار عاليه اوي.. وبعد ماتوصلي؛ يقولولك العنوان غلط.. الناس اللي جايه في حاله من اليأس..بس اكيد مش هاينفع نقولها.. ألم ايه اللي حضرتك عاوزاني ما اخلكيش تحسيه
لا طبعا هو فهمهم كده ..لكن احنا بإيدينا ايه.. نساعدهم ازاي؟
نتعلم مهارات اداره مشاعرنا… نتعلم عن نفسنا اكتر.. نعرف اجابه ليه صدقناهم لما قالوا الكلام ده اساساً وهو مش حقيقي!!
نتعلم نرتب دوايرنا..مين في الصف الأول ومين يقعد ورا ..مين هتسمع كلامه وتعمل له وزن.. ومين اسمع كلامه وأعتبره كده زي الدوشه والراديو الخربان!!
كل اللي محتاجينه نتعلم مهارات تساعدنا علي اننا نمشي الطريق، خطوه ..خطوه.. اهدوا علي قلوب الناس..مليانه كتير اوي، كل واحد له الف قصه وحدوته..مش شرط إن
الضحكه الحلوه والرقه في الكلام، او
انه ماسك نفسه وبيحاول يقف..يبقي كويس.. مش شرط انه ماسك الدمعه في عينه، وبيحاول يبص الناحيه التانيه.. يبقى طبيعي.. اللي مكمل وهو تعبان ومستحمل..بيحاول ويعافر، يقوم ويقع.. واللي بيحاول يساعدك ويشدك.. تأكد انه هو كمان عاوز يتسند زيك تمام.. بس في منطقته الخاصه اللي تعباه.. لأن لكل واحد فينا قصته وحكاياته الخاصه.