أنتى والأعياد وسهرات نهايه العام
انتى والأعياد وسهرات نهايه العام
كتبت ستايلست/داليا حسام
مع دخول موسم الأعياد ونهايه العام هيكون عندك عدد من المناسبات والحفلات
ولأن الملابس الرسميه وملابس السهرة مش بتكون مريحه لمعظمنا وبنبذل مجهود فى اختيار اللى يناسبنا منها
فعلينا اختيارها بمنتهى الحرص
اختيار فستان سهره لمعظمنا بيكون شئ مجهد علشان نختار فستان قماشته مناسبه لطبيعه جسمك قماشه تجعلك تبدو نحيفه قدر الإمكان
كل ما كان فستانك بسيط كل ما هيكون اشيك
اذا جسمك كان طبيعته ممتلئ ابعدى عن الفساتين الواسعه وحزام الوسط والألوان الفاتحه
اختيار القماشه بتاعت الفستان مهم جدا
فى أنك تدارى عيوب جسمك
مش مستحب القماش المشجر فى فساتين السهره اذا كان جسمك ممتلئ
والنحيفات مش مستحب ليهم القماش الليكرا لانه هيظهر مناطق عيوب جسمهم
كلنا دايما بنقول فستان السهره بيتلبس مره وبعد كده مبنحبش نلبسه تانى علشان ميبقاش شكلنا متكرر
لكن تقدرى اذا فى دولابك فستان ساده لونه غامق قماشته مناسبه لسهره شيفون أو كريب شيفون أو كريب أو قطيفه أو شمواه
تقدرى تغيرى شكله بعقد لولى أو الماظ أو كريستال بحجم يملأ منطقه الصدر
أو تضيفى اسكارف اورجانزا أو شيفون دهبى أو فضى أو اكسدى
تقدرى كمان اذا موجود فى دولابك بدله فورمال لون غامق
انك تحوليها لطقم سهره بمجرد انك تلبسى بلوزه ستان أو دانتيل
وعليها عقد لولى أو الماظ الطقم الفورمال هيتحول لطقم سواريه
بالنسبه لاختيارك للشنطه والشوز
معظمنا فى الأوقات العاديه بنختار الشوز فلات لكن فى المناسبات والسهرات مش مستحب يكون الشوز فلات لازم يكون high heel المهم انك تختاري حاجه مريحه علشان ميظهرش عليكى التعب طول السهره
حاولى فى اختيارك للشنطه أو البورتفيه يكون حجمها صغير
واذا كان جسمك ممتلئ ياريت تكون حاجه ممسوكه فى الايد
فى اختياراتك لألوان طقم السهره الخاص بيكى لازم تهتمى بأنه يكون لون مناسب مع لون بشرتك لون ينور بشرتك ويظهرك متألقه علشان فى الوان ممكن تنورك والوان ممكن تطفيكى علشان كده اهتمى بلنقطه ديه
اذا لون بشرتك قمحى ياريت تبعدى عن الموڤ والازرق
أذا لون بشرتك فاتح ياريت تبعدى عن الاصفر الفاتح والبيچ
اللون الاسود والاكسدى والكشمير مناسب لكل الوان البشره
كل ما كنتى بسيطه فى اختياراتك لفستانك هتكونى اشيك
وتقدرى تكونى طقم مناسب من دولابك بدون تكلفه بإضافة بسيطه تعملى شكل جديد وشيك
وافتكرى دايما شياكتك فى بساطتك
ستايلست/ داليا حسام
التعليقات مغلقة.