أهديكِ من عمري حياة
كتب أشرف زكي
لسه عنيكِ فيها لمعه
لسه يا أُمي ماهدتيش
كل ضحكة معاها دمعه
قولى وجعك ما تداريش
قولى أنك خلاص تعبتى
قولى أنك خلاص زهقتى
النهارده أنا جاى أسمع
بس قولى ومتخافيش..
عيشتى دايماً شايلة هم
والهموم عمال معاكِ تزيد
جرح قلبك ليه ما لم !؟
نار بتطفى ونار تقيد
نار بتحرق جوه فيكِ
وانتى صابرة كالحديد
المزيد من المشاركات
شاركِ أبنك ف الهموم
زى ما بتشاركيهِ سعادتك
جاى أسمع مش هقوم
ريحينى زى عادتك
عارف إني أكيد مقصر
و انشغلت عنك كتير
موت أبويا كان مأثر
خلى طعم الكون مرير
خلى كل حاجه ناقصة
والأحزان بقت ما ناقصة
التقديم فيها مجانى
والمكسب فيها بضمير !!
صفحة جديد يا أُمي خلاص
انسى الماضى بكل قساه
جاى أنا ناوى وبإخلاص
أهديكِ من عمرى حياة
