أواب ممدوح بخيت يكتب: الامهات انحرفوا !!

– واد ياا كريم.
= ايه يا أُمي في ايه ؟
– تعالى ي بني اقعد عايزاك ف موضوع مهم.
= خير يا حجة.
– عايزاك تعلمني قواعد و أساسيات الروشنة.
= افندم !
– عايزة ابقى بت من بنات اليومين دول ، اكون سترونج اندبندد وومن ، اكون بلا قيد ، انا عايزة ابقى امرأة بلا قيد.
– ‏بلا قيد؟ و بالنسبة للراجل جوزك اللي نايم بيشخّر جوا دا ، دا لو سمعك هيربطك ب قيد ف رجل السرير.
= ي بني افهم ، اناا قصدي شابّه كدا من شابّات اليومين دول.
– شابة؟ انتي انضميتي لـ ريا و سكينة ولا ايه !
= كدا تجرح مشاعر أمك الرقيقة.
– لا خلاص ي ستي هعلمك متزعليش ، قوليلي بس نفسك تتعلمي اايه ف الروشنة.
= عاايزة ابقى بت صايعة فشخ !
– ……
= ايه ي واد عينيك كبرت كدا ليه ؟
– م الانبهار ي أّمي ، يعني الست الشريفة العفيفة اللي ربتني تقول اللفظ دا ، أنا نَفسي مبقولهوش.
= لأ شريفة و عفيفة ايه أنا عايزاك تركز و تفوق معايا كدا ، و سيبك م الأخلاق دي.
– ماشي ي ستي.
= لأ قولي ي مزة.
– نعم ي أختي ، اقولك ايه ؟!
= مزة ، يعني بتـ..
– أنتي هتشرحيلي ؟ خلاص فهمت.
= براڤو ، يلاا علمني.
– ماشي بصي يااااا…..اقولهاا ازاي دي ؟
= بتكسف من أمك يااض ، مزة..فيهاا ايه دي اومال لو قولتلك قولّي ي حبعمري كنت عملتها ع روحك قدامي ؟!
– حبعمري ! لأ خلاص مزة حلو ، بصي ياا مزة.
= بصيت.
– اول حاجة هنعملك اكونت ع الفيس تواجهي بيه العالم بروشنتك العالية و جمالك الفاحش و فخذك المفتول الترهُّلات ! تمام ؟
– ‏تمام.
= و هنسميه..
– زهرة اللوتس.
= دا لماا تكوني هتعملي اكونت ف حديقة الاسماك.
– مَ ام ابراهيم مسمياه كدا و الشباب عليها زي الرز.
= سيبك من ام ابراهيم دلوقتي..ركزي ف الروشنة و الصياعة و الذي يتماشى مع المظاهر العصرية لمتطلبات هذا الزمن.
– ممممممم بس لقيتهاا ، Øm ķĕmő.
= و ليه الحشرات الطائرة اللي ع الاسم دي ، كدا ب رشة بيرسول هيهكرولك الاكونت.
– طب اشيل اسمك ؟
= لأ أنتي سميه…
– خلاص خلاص عرفتهاا..الحلوة بزيادة.
= مبدأياً ماشي تمام حلو.
– عيب عليك أمك صايعة بردو ، و هنزل بقى بوستات من نوعية ” قلبي فسيح و صدري جريح و فخذي ملوي هدومه “.
= ايه اللي أنتي بتقوليه دا !
– مَ لازم الفت انتباه الكراش عشان يحس ع دمه.
= احييييه ! الست والدتي بتكراش و انا معرفش ، بتكراشي ع مين ي ولية.
– على أبو أحمد جارنا.
= بتكراشي ع أبو أحمد ؟! دا كرشو اكبر من وِراك جوزك !
– و فيهاا ايه ، الجمال جمال الروح مش ف الكرش ولا ف البطروخ !
= يالهووي ، أمي بقت سرسجية ؟
– و فيهاا ايه مش أحسن مَ انحرف و ابيع سجاير.
= ……
– المهم بس ، يلاا كمل..علمني.
= لاااااا أكمّل ايه ، اناا هناديلك جوزك يجي يكملك تعليم على وراكك لحد مَ يبانلك صاحب.
– لأ و النبي ، يرضيك كدا أبو أحمد يجي يبص ف وشي يلاقيني متشخرمة كدا !
= ي بابااااااا.
– لأااااااااااااااا…

#BeBo