“إديني معاد ..وأنا مش هاجي!!”

إدينى معاد

وأنا مش هاجى!

بقلم الشاعره/ ولاء محمد 

ولا هلبس أجمل فستان
ولا هفضل ساعة أعمل مكياج
ويبوظ من كتر دموعى

بيقولوا
إنك واثق فى رجوعى
وقالولى كمان
أنا مش وحشاك

ومقضِّى حياتك
عرض وطول..

ويادوب ساعتين
ونسيت على طول

وأنا من كتر الضحك بكيت
واستنيت دقة رقمك على تليفونى
وأتارينى مسحته
كان شاغل تقريبا
كل مساحته..

من يومها مجتش خلاص ع البال
والموود مظبوط
ومزاجى أهو عال

وابتديت أشم نَفَسى
بس حاسة
ان تاهت منى نَفْسى

وبقيت شبه القهوة الصايصة
فى فنجان بورسلين..

مَنْقَد النار اللى متولع فى يوليو
مقطوعة حلوة ع الكمان
رَوَّح عازفها

أو غنوة فى راديو
موجته ماشبكتش

بس انا فى بعادك بضحك
مابكتش
فمفيش أسباب بتقول
أرجعلك
حتى ان طوب الأرض
شفعلك..

وان كان
على شوقى لصوت مفاتيحك
ماهو موجود فى خيالى
بسمعه كل ماييجى الليل

وان كان
على كوبايتين الشاى بحليب
هشربهم
وانت اللى تحاسب ع المشاريب

ريحتك ..حضنك.. لمسة ايدك
نظرة الحب فى عنيك
وقت الملامة..

كان نفسى زى الست اقابلك
بإبتسامة وقهوتى أشربها معاك

لكن خلاص
فات المعاد..

فإدينى معاد تانى..
ربما..

غداً ألقاك
بقلم الشاعره/ ولاء محمد