إعداد وحوار: ريهام طارق
ساعات قليلة تفصلنا عن طي صفحة عام 2025، ذلك العام الذي حمل في طياته 365 يومًا حافلة بالذكريات، ما بين الفرح و الحزن، النجاح والانكسار، القوة الخذلان.
حكايات بدأت وأخرى انتهت، كانت الأغنية خلاله شريكا أصيلا في تفاصيل أيامنا، ترافق مشاعرنا، وتوثيق لحظاتنا، وتبقى شاهدا صادقا على ما عشناه و مررنا به.
ولا يمكن ننكر أن عام 2025 شكل محطة استثنائية في مسار المشهد الغنائي المصري والعربي، بما شهده من ثراء لافت في الإنتاج الموسيقي وتنوع في الرؤى الفنية؛ فقد برزت أعمال ناجحة تركت بصمتها الخاصة، وارتبطت كل أغنية لدينا بذكرى لا تنسى.
ومن هذا المنطلق، ولدت فكرة هذا الحوار، عبر اختيار أبرز عناوين أغاني عام 2025 وتحويلها إلى أسئلة تفتح لنا نوافذ على عوالم نجوم لمعوا وحققوا نجاح كبير خلال هذا العام.
أحمد زعيم: أنا عمري ما بعدت عن حد بإرادتي أنا ببعد بسبب غبائهم
ضيف حوارنا اليوم هو الشاعر المتميز إسلام الجريني، الذي حقق حضورا لافتا ونجاحات متتالية خلال عام 2025، استطاع من خلالها أن يحجز لنفسه مكان في الصفوف الأولى ضمن الأعمال الغنائية الأكثر استماعا.
ومن أبرزها أغنية “العنب الساقع“، التي تخطت حاجز الـ14 مليون مشاهدة بصوت الفنانة أصالة، وألحان رفيق مشواره الملحن العبقري جابر جمال الدين، إلى جانب نجاحه اللافت في تعاونه مع المطربة الكبيرة لطيفة، حيث قدمها بروح مختلفة وجديدة عما اعتاده الجمهور، من خلال أغنية “هوينا”، والتي حققت نجاح كبير أيضا، ليكون عام 2025 بمثابة نقطة انطلاق حقيقية وبداية مشوار ناجح، عنوانه الحضور اللافت والرهان على الكلمة الجديدة والمختلفة.
في البداية نرحب بالشاعر الغنائي إسلام الجريني في جريدة “أسرار المشاهير”، ونشكره على إتاحة الفرصة لإجراء هذا الحوار:
مين أول شخص جه في تفكيرك حالا ونفسك تعزمه على [العنب الساقع]؟
صديقتي الصحفية ريهام طارق.
شخص بعدت عنه في 2025 وبتقوله في نهايتها [كيفك على فراقي]؟
لما ببعد بنسى، وللسبب ده مش مافيش حد فاكره.
إمتى تعبت في 2025 وقلت: والله ده [هد حيل]؟
من وقت مش بعيد.
تقول لمين: [إنت حبيبي وابن حبيبي]؟
قولتها قريب لابن صديقي الشاعر حسام سعيد، عمر حسام سعيد.
هاله الزيات: كل شخص منافق اتمنى اكون عقدة حياته
تقول لمين: [صاحبي يا صاحبي] مكمل معايا في 2026؟
الملحن جابر جمال الدين.
فنان ودعنا في 2025 وبتقوله [فعلاً مبيتنسيش]؟
كنت بحب الفنان الراحل سليمان عيد جدًا، الله يرحمه، وبقوله فعلا أنت متتنسيش.
تقول لمين وإنت داخل 2026: [متتعزش]؟
لا، مفيش حد… المسامح كريم.
لو تمت دعوتك [حفلة تنكرية]، نفسك تلبس أي شخصية مطرب أو ممثل من زمن الأبيض والأسود؟
الفنان الكبير والفارس أحمد مظهر.
شخص كل ما تفتكر قله اصله في 2025 تقول: والله [عيونه عليا هدمع]؟
صديق قديم.
مين بتقوله [حبيبي ده] في 2025 وكل السنين اللي جاية؟
والدي بلا منافس.
جابر جمال الدين: إللي يعطلني هقوله الله يحنن و هقفل بابي في وشه
مين حلفت وقلت والله لأكون [عقدة حياته] في 2026؟
الكسل.
مبدأ [طيبة تاني لا] هتنفذه في 2026؟
عمري ما هعرف أكون غير إنسان طيب… دي قلوب، وربنا يجعلنا دايما من القلوب اللينة الهينة.
مين [رقم واحد] في حياتك في 2026؟
عيلتي الصغيرة.
إمتى بتقول [أنا والقمر] مع بعض؟
وأنا في حضن أمي.
عدى عليك وقت في 2025 قلت فيه الوسط الفني [خذلني]؟
دي حقيقة، حسيت إن الوسط خذلني جدًا.
إمتى حسيت إنك شايل [الشيلة كاملة]؟
الفترة اللي فاتت كانت صعبة عليّ جدًا، و كنت شايل الشيلة كاملة.. بس كانت تقيله جدآ
تقول لمين [ماليش غيرك]؟
لربنا سبحانه وتعالى… كلنا ملناش غيره.
مين توجه له رسالة تهديد في 2026 وبتقوله: صبرا… [لينا ميعاد]؟
أنا عاشق لفن وصوت الفنانة الكبيرة أنغام، من صغري لكن للأسف لسوء الحظ لسه مشتغلتش معاها، لحد دالوقت وحلمي من بداية مشواري أنها تغني من كلماتي علشان كده بقولها صبرا يا أستاذة أنغام، إن شاء الله لينا ميعاد ونشتغل مع بعض بس من غير تهديد ولا حاجة.
كام مرة اتقال لك [اهدي] وإنت بتشتغل في 2025؟
مبعدّش والله… كتير
تقول لمين كل كلامك [كلام فارغ] في 2025؟
كل شخص بيقول على نفسه في العلن إنه أجمد من الكل.
مين الشخص اللي بتقول لنفسك [مكرهتوش] بعد ما ودّعته في 2025؟
أنا مبعرفش أكره، وفي ناس كتير ودعتهم في 2025، بس مش بفتكر لحد غير الخير وبس.
مين دخل حياتك في 2025 و حسيت إنه [كأنه مجاش]؟
أكتر من شخص، وكانت فترة قصيرة الحمد لله.
مين أكتر شخص كان [بيستهبل] في حياتك 2025؟
أنا… استهبلت جامد، بس ضبطت الأداء بسرعة و رجعت ركزت.
تقول لمين[تيجي نحارب] في 2026؟
شغفي.
مين بتحس إنك مطمّن معاه وبتقوله محتاجلك [أحكيلك خوفي]؟
ربنا… هو مصدر أماني، برتاح جدآ وأنا بين إيديه.
شخص لو سألوك عنه هتقول [معرفش حد بالاسم ده] في 2025؟
صاحب قديم.
تقول لمين في بداية 2026 [تيجي نرجع]؟
لا، مش هضعف… مستحيل.
مين هتقوله أنا جاهز و [قبلت التحدي] في 2026؟
الشغل… الشغل… الشغل.
تقول لمين [بدي أقول بحبك] قبل ما2025، تخلص؟
جدتي الغاليه.
إمتى صرخت بصوت عالي وقلت [خطفوني] في 2025؟
كانت طفلة صغيرة، عينيها زرقا.
مين [بابا] المجال في مجال الشعر الغنائي؟
بالنسبة لي كشاعر، الأستاذ أيمن بهجت قمر.
عملته إيه في 2025 .. اعتبرته [خطية]؟
دخلت حياتي ناس ملهمش لازمة من الأساس.
مين الشخص اللي بتقوله [بتمنى أنساك] وإنت بتقفل 2025؟
هو عارف… أو عارفة!
زعلت مين في 2025 وبتقوله [سوري] صافيه لبن قبل ما نبتدي 2026؟
أي حد زعلان مني من غير ما أقصد بقوله: سوري، متزعلش… أنا بحبك.
تقول لمين ومن داخل 2026 [الله يحنن]؟
الحب والارتباط.
مين أكتر ناس اتعاملت معاهم في 2025 وكانوا أيقونة [الذوق العالي]؟
كل واحد اتأخّرت عليه في شغل وقت ما كنت تعبان، وهو التمس العذر وقدّر ظروفي.
مين نفسك تشوفه قبل ما تنتهي 2025 وبتقوله [واحشني يا ابن اللذينا]؟
كل صحابي اللي بقالي كتير مشوفتهمش.
مين في حياتك شايفها [ملكة جمال الكون]؟
أمي طبعا… كانت و هتفضل ملكة حياتي وملكة جمال الكون.
قلت كام محتاج [دكتور] نفساني في 2025؟
مرة واحدة بس… مروحتش.
هتقول لمين في نهاية 2025 [خلّونا نشوفكم تاني]؟
كل ضيف كان خفيف.
كام مرة قلت في 2025 [الاحتياج وحش]؟
قولتها مرة، بس كان الموقف ميخصّنيش.
هتقول لمين وإنت خارج من 2025 [هوينا]؟
ناس كتير جدآ… أولهم الناس المحبطة وأصحاب الطاقة السلبية.
لو هترسم لشخص واحد فقط [أحلى رسمة] هيكون مين؟
والدي.
هتقول في 2026 .. [حب تاني] لا؟
أنا كل يوم بفكّر نفسي وبقول: حب تاني؟ لا لا لا.
مين أكتر حد صدمك في 2025 خلاك تسأل وتقول [أنا تبيعني]؟
ملحن… بدون ذكر أسماء بس هو عارف نفسه.
[كلام عيب يتحكي] في 2026؟
لا، عيب!!!
إمتى حسيت إنك محتاج صحابك ولاقيت إن [مفيش جدعنة خالص]؟
لا، بصراحة… كلهم صحابي جدعان، وربنا يديم الخير بينا.
[خبر عاجل] نفسك تعلنه عنه في بداية 2026؟
إن شاء الله زيارة الكعبة.
[قرار شخصي] قررت تنفيذه في بداية 2026؟
قراري إني أستغل الوقت بشكل جاد علشان أنجح أكتر وأكتر في كل خطوات حياتي.
[لو لينا عمر]… إيه أول حلم نفسك تحققه في 2026؟
أنا دايما بحلم أكتب رواية من تأليفي، وإن شاء الله الحلم يتحقق قريب.
ريهام طارق تكتب: عندما نعتاد الفقد يصبح الموت مألوفًا
نبذة عن الكاتب:
ريهام طارق صحافية مصرية من أصول لبنانية، متخصصة في كتابة الأخبار الفنية والثقافية، وأجرت حوارات مع نخبة من أبرز نجوم الغناء والتمثيل في الوطن العربي، تشغل حاليًا منصب رئيس قسم الفن ومساعد رئيس التحرير بجريدة {أسرار المشاهير} في جمهورية مصر العربية.
بدأت مسيرتها المهنية من المملكة العربية السعودية عبر جريدة {إبداع}، في الرياض قبل أن تنتقل للعمل في عدد من المؤسسات الإعلامية الكبرى في الوطن العربي، منها {جريدة الثائر و جريده المغرد} في لبنان، وجريدة {النهار} في المغرب، ومجلة {النهار} في العراق، ومجلة {المحور} في الكويت.
إلى جانب نشاطها في الصحافة الفنية، كتبت ريهام طارق مقالات تحليلية في مجالات السياسة الدولية وأسواق المال الأمريكية والأوروبية، كما تولت عضوية اللجنة الإعلامية في المهرجان القومي للمسرح المصري. وتقدم حاليًا محاضرات متخصصة في الصحافة في مسقط، عاصمة سلطنة عمان.