“اتقي الله وإتحرك كنقيب”.. أحمد فلوكس يتحدث عن تفاصيل مكالمة أشرف زكي له

“اتقي الله وإتحرك كنقيب”.. أحمد فلوكس يتحدث عن تفاصيل مكالمة أشرف زكي له

 

 

كتبت: سارة محمد الباجوري

 

ظهر اليوم الفنان أحمد فلوكس يتحدث عن مكالمة الدكتور أشرف زكي له بعد خلافه مع الإعلامية بسمة وهبة في فيديو على مواقع التواصل الإجتماعي.

حيث ظهر وتحدث عن تفاصيل المكالمة التي تمت أمس بينه وبين الدكتور أشرف زكي حيث قال:”الفيديو ده بعمله عشان كذا حاجه منهم، أنا عايزكم تبدأوا تتفرجوا على كل واحد فيهم بيعمل إيه عشان لما تشوفوا ربنا هيعمل إيه في الآخر تبقى رسالة وعبرة لينا كلنا، حتى لو أنا في خطأ عندي أنا راضي بأي حاجة يعملها ربنا فيا على الأقل أكون خلصت ذنب من ذنوبي، ده لو أنا في خطأ عملته”.

ومن ثم أنتقل ليتحدث عن مكالمة الدكتور أشرف زكي حيث قال:”الدكتور أشرف زكي أستاذي ونقيب المهنة، كلمني أمبارح، مجمل المكالمة، أحنا يا أحمد عايزين نبدأ بداية جديدة، قولتله بداية جديدة إيه مش فاهم، قالي يعني نطلع في فيديو نقول لزمايلنا أنه بداية جديدة والصلح خير، قولتله أنا معنديش مشكلة مع حد، أنا أصلًا مش مركز مع حد”.

 

وأضاف:”وأنا كانت مشكلتي أنه مينفعش نعمل أعمال فنية بتظهر وتعلم جيل أشياء أحنا بنتحارب عشان منعملهاش في حياتنا، فنعلمهالهم على الملأ، وطبعًا هو بيكلمني عشان قبلها بيومين راح قبض وعمل حلقة مع الأستاذة معدمكشي، وبيحكيلي أنه لما راح هي قعدت تتكلم كتير وهو مردش وقالها أنا هاخده في حضني، وبعدين بتقوله انا أصلًا رافعه عليه قضية، بعد كل ده رافعه عليا قضية، إن لم تستحي فأفعل ما شئت”.

وعاد ليكمل تفاصيل المكالمة حيث قال:”طب يا دكتور حضرتك كنت فين والأستاذ المعد إللي جابك وجاب الناس تغلط فيا، وجاب أبويا شربوه حاجه وخلوه يطلع بالمنظر ده وقال كلام وخلتونا كلنا نبقى في حوارات، جبت حق أبويا، حضرتك كنت فين وأنا مرفوع عليا قواضي، أنت مضتني على شيكات وفلوس زيادة للمنتج عشان تشتري المنتج وتكسب وده”.

 

وتابع:”وحضرتك فين والبرامج ماسكه فينا تقطع فينا واحد ورا التاني وتخلينا نضرب في بعض، أنت فين كنقيب ولا في الآخر بتروح زي الزبون تقبض، وفي الآخر تقول هاخدهم في حضني”.

 

وعاد ليتحدث عن القضية التي تحدثت عنها الإعلامية بسمة وهبة مع الدكتور أشرف زكي حيث قال:”وبعدين قضية إيه إللي معدمكشي رفعاها عليا ولا عشان جوزك علاء عابد سيادة النائب بتاع مستقبل وطن، أنتي قلتي أصل أنا أعرف عنه كل حاجة، أنا أعرف كل حاجة عنكم”.

 

وأكمل حديثه قائلًا:”أعرف أشرف زكي من وهو في المعهد بحواراته، حضرتك أعرف كل حاجه عن جوزك من أيام ما كان ظابط بواقعة أحمد سعد في شقة حدايق الأهرام، بفلوسه منين، بصي أنا أعرف عنكم كل حاجة، ولو أتكلمت فيها إعتقالات وفيها مال شعب ده الرد الأولاني بتاعي”.

 

وأكمل ليرد على الدكتور أشرف زكي فقال:”والرد لأشرف زكي أنا هبعتلك ورق رسمي ولو متحركتش يبقى أنت مش نقيب لكل الفنانين، أنت نقيب للي مبيعرفوش ربنا بس، وإللي بيعرفوا ربنا أنت مبتهتمش بيهم، أستاذ علاء عابد حضرتك ماسك لجنة المواصلات في حزب مستقبل وطن في مجلس الشعب، هل حضرتك كعضو مجلس شعب بتقبل بنوعية البرامج إللي مراتك بتعملها على القنوات، هل حضرتك يا عضو مجلس الشعب عايز تعمل فتنة للشعب، هل حضرتك يإللي كنت ماسك لجنة حقوق الإنسان موافق أن ده إللي نوصله للشعب أنا عايز ردك، والزيادة بقى أنا عايز أعرف فلوسك منين وإزاي بقيت غني كده وأنت كنت ظابط كحيان، أنا عايز رد على الكلام ده”.

 

وظهر في فيديو آخر يتحدث عن مكالمة آخرى للدكتور أشرف زكي حيث قال:”أشرف زكي بيكلمني دلوقتي بيقولي أنت بتقول أن أنا مرتشي صح، لا أنا مقولتش أنت مرتشي عشان أنا عارف أنت عايز تعمل إيه، عشان تطلع تعمل النمرتين بتوعك والتحقيق والنقابة، أنا قولت أنك روحت حلقة وقبضت تمنها عشان تطلع وتقول الكلمتين دول، ولا أنت طلعت الحلقة لله”.

 

 

وأكمل حديثه قائلًا:”من الآخر فكك من حواراتك عشان حواراتك مش هتأكل معايا، من الآخر هفضحك قدام الناس وهعريك، أتقِ الله وأتحرك كنقيب بدل ما تعملي فيها مطبلاتي، أتحرك وهات حقي وحق الناس، أنت سامع ولا مش سامع يا أشرف يا زكي”.

 

كما نشر الفنان أحمد فلوكس منشور يتحدث فيه عن حذف قناة المحور لكل ما يخص سيرته حيث قال:”تم حذف جميع الفيديوهات المتعلقة بسيرتي من على قناة المحور، ويتم عمل مونتاج لجميع الحلقات السابقة والتالية ليحذف منها كل ما هو له علاقة بشخصي، وسيتم من قناة المحور مشكورة في خلال 48 ساعة، تنوية عن تراضي في حقي”.

 

وتابع قائلًا:”أشكر قناة المحور ومالكها ورئيسها كما أشكر الإعلامي الكبير عمرو الخياط، وبالتالي سأحذف أنا أيضًا كل ما يخصهم وأكن للمحور كل حب وإحترام، وأتمنى أن يراجع كلنا مواقفنا تجاه بعضنا ليسود الحق والسلام، وأي إنتقاد موجه لشخصي فستسمعون الرد بعد بكره على قناة “القاهرة والناس” برنامج “حبر سري”، مع الإعلامية المحترمة أسما إبراهيم يوم الجمعة 15 رمضان”.

وأضاف قائلًا:”أتمنى أن أرى من كل من هاجمني وقال علي ما ليس في وأشار لي بكل الكلام الذي يوجه النفس بالباطل أن يتعلم الدرس جيدًا ويعلم أن الحق حق وأن الله ناصر لما هو حق، ويعتذر لأن الإعتذار من شيم الرجال، تحياتي للجميع، وأنتظروا الحلقة يوم الجمعة”.