” اخترت تكون والدهم ..لكن هما ما أختاروش تكون ابوهم!”
” اخترت تكون والدهم ..لكن هما ما أختاروش تكون ابوهم!”
بقلم أخصائي نفسي/نيفين منصور
أولادي لن اسمح لأحد يأذيهم ولا حتى نفسي، مبدأ مهم جدا لو عندك النية تكون اب او ام صالحين.
قبل ما تتخذ خطوة الإرتباط هناك بعض إعتبارات تضعها فى عقلك اهم من الحب (( كلامى للزوج والزوجه)):
1- هل انت مؤهل وجاهز تكون اب وانتى مؤهله تكونى ام؟
2 -هل تعلموا مسؤلية الأمومة والأبوه والرعاية والتوجيه والتربية للطفل اللي جاى للدنيا؟
3 – هتعرفوا تحموهم وتدافعوا عنهم وتكونوا لهم السند؟
4 – هتعرفوا تكونوا ليهم الأمان والحضن الدافيء اللي يستخبوا فيه لما يتوجعوا او حتى لما يغلطوا؟
5- هتعرفوا تفيضوا عليهم مشاعر وحب والحنان اللي محتاجينهم؟
6- هتعرفوا تسمعوهم ولا هتعيشوا معاهم بالتسلط والأوامر والنواهى والصح والغلط بدون نقاش؟
7 – هتعرفوا تنقلوا ليهم القيم المهمه اللي هيتعلموها منكم لأنكم عايشينها معاهم ولمسينها منك؟
8 – هتقدروا تخلوهم فخورين بوجودكم معاهم فى حياتهم ولا نافرين من وجودكم وتصرفاتكم؟
9 – حتعرفوا تحسسوهم بقيمتهم وذاتهم الإيجابيه، ولا هتخلوهم شايفين نفسهم قليلين طول الوقت لأنكم موصلين ليهم إنهم بالفعل قليلين فى عيونكم؟
10- هتقدروا توفروا ليهم بيت دافئ كله محبه وود وضحك ونقاش هادىء ولا عصبيتكم وصراعاتكم الداخليه بسبب ظروفكم او طفولتكم القاسيه تخليكم طول الوقت بتفرغوا فيهم شحنة غضبكم او بتعملوا إسقاط لذكرياتكم القاسية عليهم؟
11- هتحبوا شريك حياتكم فعلا وهتحاولوا تقربوا المسافات علشان تشعروهم بالدفا والأمان ولا علاقتكم بشريك حياتكم هتكون حلبة مصارعه وكل واحد فيكم هيتنافس مين هيكسب بغض النظر عن مشاعر اولادكم؟
12- هتقدروا تحموا أولادكم وقت الخطر حتى لو الخطر ده شريك حياتكم؟
وهنا ركز فى المعنى المقصود:
* يعنى لو لقيتى جوزك بيتحرش ببنتك او ابنك هتقدرى تواجهيه وتقفى ادامه وتحميهم؟
* لو لقيت زوجتك بتميز الولد عن البنت هتقدر تدافع عن الطرف المظلوم وتوصل لحل حكيم؟
* لو لقيتى زوجك بيتفرج على افلام إباحية مع ابنك هتقدرى تحمى ابنك من ابوه؟
13- هتقدروا تصاحبوا أولادكم وتكون علاقاتكم علاقه صحية كلها إشباعات لإحتياجاتهم؟
14- هتقدروا تفصلوا مشاكلكم مع شريك حياتكم عن أولادكم وتوصلوا ليهم صورة متوازنه عنهم رغم اي عيوب وده لصحتهم النفسيه؟
15- هتقدروا تكونوا ايجابيين معاهم رغم اي آلم او صراعات فى حياتكم؟
16- هتقدروا تحطوا مصلحتهم وراحتهم قبل راحتكم فى اى قرار فى حياتكم؟
الأبوه والأمومه: مسؤلية لو مش هتقدروا عليها؛ ماتخلفوش، خليكم صادقين مع نفسكم من البدايه.
أولادى : خط أحمر وغير مسموح لاى حد أيا كان يأذيهم حتى انا.. خليك واعى.
انا: اخترت اكون أب او أم لكن هما ماختروش مين ابوهم او امهم، فأنت المسؤل عن اختيارك.
مش عيب تعترف بخطأك معاهم؛ لكن اكبر خطأ في حق اولادك إنك تتمادى فى الغلط وتكمل عليه.
نيفين منصور
