ارز بالخلطة و الياميش مع كباب حلة مقدم من الشيف نهلة الطيب
ارز بالخلطة والياميش مع كباب الحلة
صنف لعزومات رمضان يزين سفرتك تحفة وبمكونات متوفره عندك في رمضان جربوة هيعجبكم أوي
المقادير
كيلو لحمة مكعبات يفضل تبقي ملبسة
كيلو بصل مبشور
م ص ثوم مفروم
توابل (ملح فلفل كمون كسبرة قرفة بودر وعيدان حبهان جوزة الطيب ورق لوري)
الارز
١/٢كيلو ارز بسمتي او بلدي
م ص كركم
١/٢م ص( كاري ملح فلفل كمون قرفة بودر وعيدان جنزبيل قرنفل ليمون مجفف ان وجد)
م ك معجون طماطم
بصلة مبشورة
الخلطة
نصف كوب من كل من(زبيب احمر /قراصيا/مشمشية)
منقوعة فى مية ربع ساعة ومصفاة
مكسرات(كاجو/بندق/عين جمل/لوز)اوسوداني كله اختياري
الطريقة
اولا كباب الحلة
نشوح البصل في ملعقتين سمنة لحد ما يدبل شوية ننزل بفص الثوم وباللحمة ونقلب لحد اللحمة ما تنزل ميتها وتشربها نضيف التوابل ماعدا الملح ونستمر في للتشويح للحمة لحد ميتها ما تنشف بس خلي بالك لحسن تلسع منك وبعدين ننزل بكوب ماء كبير ولما يغلي نهدي عليها ونغطيها ونقلبها من وقت للتاني لحد ماتتشرب كوب المية نضع غيرة وهكذا لمدة ساعة الى ساعة ونصف على نار هادية لحد اللحمة ماتستوي نضيف الملح ونطفي عليها
نجيب فحمة ونشعلها كويس لحد ما تحمر ونطفيها في معلقة زيت داخل ورقة فويل جوة حلة الكباب ونغطي بسرعة علشان نكتم الدخان داخل اللحمة ويأخذ طعم الشوي
ثانيا الارز
نشوح البصل في ملعقتين زيت لد ما يصفر ننزل بالارز ونشوحة كويس وبعدين نضع ملعقة الصلصة والتوابل ونقلب كويس جدا وبعدين نضيف ٢كوب ماء للارز العادي و٣كوب لو بسمتي ويملح ويترك يغلي حتي يتشرب نهدي عليه لحد مايستوي
نجهز المكسرات نسلقها ١٠دقايق ونقشرها
ونحمرها في معلقة زبدة على نار هادية جدا وفالاخر نقلب معاها القراصية والمشمشية والزبيب تقلبتين فالزبدة ونرش ملح بسيط وفلفل ونرفعها من النار
نقسم الخلطةجزئين نصف نقلبة مع الكباب ويوضع فى بولة شوربة ويغرف الارز حوالية ويزين بباقي خلطة الياميش والمكسرات متستغربوس القراصيا والمشمشية لايقة جدا على الاكلة لانهم فيهم نسبة مزازة وكمان الزبيب الاحمر بيكون غير مسكر خالص ومزازتة عالية عن الذهبي برضوا هيعجبكم جدا فيها اختلاف وغير تقليدية
