ازاى تخلى مظهرك عنوانك
ستايلست/داليا حسام
فى تفاصيل مهمه واحنا بنشترى هدومنا لازم ناخد بالنا منها ومن التفاصيل ديه اختيار الالوان
كل واحده فينا عارفه أن فى الوان بتنورها والوان بتطفيها
طيب انا محتاره ومش عارفه اختار ازاى !!!!
شوفى يا ستى انتى من الناس اللى بشرتها فاتحه يبقى تبعدى عن اى لون يخليكى مطفيه أو باهته
زى أيه ؟
زى اللون الأصفر الكنارى _ الموڤ الفاتح _ اللون السماوى_ الروز_ الاول وايت
الالوان ديه اذا لبستيها بشكل مباشر هتخلى شكلك باهت ومطفى هتحسى أن شكلك مجهد الالوان ديه بشكل مباشر مع لون بشرتك هيخلو شكلك شاحب
طيب عاوزه البسهم؟
يبقى تدخليهم فى لون قوى علشان ينورك
طيب انا جسمى مليان ومش قادره البس مشجر ؟
مش لازم خالص يكون اللبس مشجر
يفضل انك تلبسيهم فى الوقت ده لونين فى بعض ساده او مقلم بس خدى بالك بلاش يكون مقلم عرض يكون مقلم طول لأن المقلم عرض برضو هيبين أن جسمك مليان المهم انك تدخلى اللون الفاتح فى لون تانى ينور بشرتك
أما أذا كان لون بشرتك يميل للقمحى وأعمق
نبعد عن
الموڤ_ الكحلى_الزيتى_البنى المحروق
طيب انا بحب الالوان ديه؟
يبقى زى ما اتفاقنا أن الألوان ديه هتزود تغميق لون بشرتك
والحل؟
هندخلهم برضو فى الوان تانيه افتح علشان ينورو وشنا وميبقوش بشكل مباشر على بشرتنا
بلاش نقلل من قيمه اختيارنا لالوان لبسنا
لانها بتفرق كتير جدا فى شكلنا الكلى فى تألقها وظهورنا بشكل مبهج ومميز
خلي دايما مظهرك عنوان ليكى وإهتمى بتفاصيلك
التعليقات مغلقة.