اسوء حفلات عمر خيرت
كتبت / غادة العليمى
بالامس اقيمت حفلة للفنان الكبير عمر خيرت، وبحسب شهادة الجمهور الحاضر في الحفلة هي كانت أسوأ حفلة حضرها الجمهور لـ عمر خيرت، لأكتر من سبب أبرزها إنه إعتذر عن وجوده في الحفلة لسوء التنظيم والتعامل مع الجمهور.
بحسب شهادة الحاضرين إن اللي حصل كان عبارة عن مهزلة، بداية من تغيير ميعاد الحفلة اللي كان مدوّن على التذاكر وهو 6 مساء واللي إكتشف الحاضرين إن الحفلة مابدأتش لحد الساعة 10 مساء.
كمان مكان الحفلة نفسه اللي يعتبر واحد من أهم فنادق مصر وهو “رويال ماكسيم كيمبنسكي” اللي بفضل منظمين الحفلة إتحول لـ قاعة أفراح بكراسي الأفراح المعتادة لحفلة مهمة زي دي، واللي بالتالي الجمهور مكانش مستريح ولا لقى قيمة التذكرة اللي دفعها لحضور الحفلة.
نفس منظمين الحفلة دي هما اللي نظموا حفلة كايروكي في كايروفيستفال السنة اللي فاتت واللي حصل فيها مشاكل بشهادة الجمهور وكمان هما منظمين حفلة كايروكي الجاية في اسكندرية، في المقال ده هتعرفوا اللي حصل امبارح بالتفصيل بشهادة الحضور
المشكلة الأكبر وبرضه بحسب شهادة الحاضرين أن عدد الحضور كان اكبر من عدد الكراسي الموجودة وده اللي أدى لزحام مش طبيعي وإختناقات وتدافعات من الجمهور، كمان التهوية مكانتش أحسن حاجة وده كمان سبب إختناقات في القاعة.
بعد أكتر من 3 ساعات ونص خرج حد من المنظمين وحاول يهدي الحضور، في الوقت اللي أعلن فيه الموسيقار عمر خيرت على السوشيال ميديا عن إلغاء الحفل لسوء التنظيم اللي حصل من منظمين الحفلة.
للأسف الحفلة إتلغت، ولكن الناس في نفس الوقت طالبت برد فلوس التذاكر المدفوعة للحفلة، ولكن كان الرد المفاجئ من المنظمين إنهم بقوا مسؤولين التسويق بس!! ملهمش علاقة التنظيم، وده اللي خلى ناس من الجمهور توثق الكلام ده بفيديوهات مصورة ونزل منها كتير على السوشيال ميديا.
حالات الغضب أثرت على الحاضرين وده اللي خلاهم يستدعوا الشرطة عشان يعرفوا بشكل أو باّخر يستردوا حقهم بعد فشل المنظمين من إقامة الحفلة، وده للأسف محصلش لحد دلوقتي.
الموسيقار عمر خيرت أصدر بيان عن اللي حصل، ونقتبس منه “فبعدما وصل الموسيقار وفرقته الموسيقية لمكان الحفل وبعد الاستعداد لبدء الحفل مع جمهوره الذي ينتظره واعتاد أن يحضر ليالي موسيقية استثنائية مع موسيقاه، فوجئنا جميعاً بسوء التنظيم وعدم جاهزية المكان لاستقبال الجمهور، خاصة أنه كان لنا متطلبات تنظيمية تم الاتفاق عليها مع الشركة المنظمة، إلا أننا فوجئنا يوم الحفل أن كافة مطالبنا التنظيمية لم يتم تنفيذها، ووجدنا شركة آخرى هي التي تتولى عملية التنظيم، وهي إحدى شركات التنظيم التي لنا معها تجارب سابقة سيئة واوقفنا التعامل معا منذ عامين، وفوجئنا بقيام المنظم الرئيسي للحفل بالتعاقد مع هذه الشركة من الباطن ودون علمنا بذلك.”
تجارب سيئة كتير مر بيها فنانين وجمهور مع نفس الشركة، وللأسف نفس الشركة هي المسئولة عن تنظيم حفلة كايروكي الجاية في إسكندرية، واللي كانت مسؤلة برضه عن تنظيم حفلة كايروكي السنة اللي فاتت في “كايرو فيستيفال سيتي”.
في فيديو مصر من حادث إمبارح قال فيه واحد من الجمهور إن نفس الكلام ده حصل منهم في حفلة الفنان تامر حسني اللي كانوا مسؤولين عن تنظيمها، فـ واضح إن ده إسلوبهم في تنظيم الحفلات.
وجب التنويه إن الشركة دي هتتخذ الإجراءات القانونية اللازمة لمقاضاة كل من أساء ليها على وسائل التواصل الإجتماعي بالتشهير والإساءة، مع العلم إن في بيانهم بعد الوقعة قالوا إنهم نظموا 3 حفلات للموسيقار عمر خيرت وكانت من أنجح الحفلات، في نفس الوقت اللي الموسيقار عمر خيرت بنفسه قال إنهم وقفوا التعامل معاهم من سنتين لتجاربهم السيئة معاهم.
ولكن فى نهاية الامر سيظل الفنان الموسيقار الكبير .. كبير بفنه واعماله الجيدة وسيظل الجمهور يتردد على حفلاته حتى ولو اقيمت له حفله سيئة
