اضحك مع حيله ودهاء زبون المطعم الكبير
اضحك مع حيله ودهاء
تقرير/ باهر رجب
ويلآ للعالم عندما ينحرف مثقفيه
حسابك كام لو سمحت
حضرتك خدت جوزين حمام مشوى ورز وبطاطس وسلطات. الحساب كده 320 جنية
اوك . ضيف عليهم 30 جنيه تيبس .
ميرسى جدا يافندم كده يبقى كله 350 .
تمام كده لاء مظبوط فعلا . هاتهم بقى
ههههه . خلى علينا خالص يافندم . حضرتك دمك خفيف جدا والله
لاء انا بتكلم جد . انا فعلا مش هدفع . انا ممعايش فلوس . لو هتدفعوا انتوا مافيش مشكله
هو حضرتك بتتكلم جد !
طبعا . بقولك مش دافع
طب وبعدين حضرتك كده هتسببلى مشكله
لا مشكله ولا حاجه روح بلغ صاحب المحل وقوله فى زبون مش عايز يدفع الحساب انت مكبرها ليه .
هو حضرتك متاكد ؟
ياسيدى ايوة . متأكد والله . ومش دافع . مش دافع
صاحب المحل : انت اللى مش عايز تدفع الحساب
لاء كده الوصف مش صح . انا مش قادر ادفع الحساب مش مش عايز . ف فرق حضرتك . صدقنى انا مش قادر اديك . مش مش عايز . ومين عارف يمكن ربنا يفرجها دلوقت وتاخد فلوسك
ياسلام .
اه طبعا . الفرج بيجى فى لحظة . انت مش مؤمن ولا ايه؟
اوك . بس انت عارف احنا ممكن نعمل فيك ايه
عارف طبعا . انت قدامك حل من تلاته مافيش غيرهم . اولهم انك تبلغ البوليس وهايجو ياخدونى . هروح انا اتحبس واكل واشرب وانام ببلاش وانت برضه مش هتاخد فلوسك .
وثانيهم
انك تاخدنى جوه انت ورجالتك تطحنونى علقة موت ومش هتلاقوا معايا حاجه تاخدوها والحل ده مش مناسب ليكوا لاني هصرخ واصوت واعملكم قلق كبير ف المحل هيزعج الزباين وهيمشوا وده هياثر على سمعتكم . وكمان برضه مش هتاخد فلوسك . .وده غير انى هطلع من هنا على القسم اعملكم محضر تعدي وهروح المستشفى اتحجز فيها وانا مدغدغ واكيد هصعب على حد هناك فبرضه احتمال اكل واشرب وانام ببلاش وانت برضه مش هتاخد فلوسك .
اما الحل التالت بقى فانك تستعوض ربنا وتسيبنى امشى بهدوء بس ده بعد ما اشرب القهوة عشان الاكل بدا يجيبلى خمول وحاسس انى عايز انام . لو سمحت نزلولى قهوه واوعدك هشربها وهمشى علطول
كمان ! ماشاء الله . بس احنا عندنا حل رابع هيعجبك اوى
عارفه . مش قصدك يعنى انك تشغلنى هنا بتمن الاكل امسح واكنس واغسلكم الصحون . لاء مش هينفع خالص . انا مابعرفش اعمل الحاجات دى . والخساير اللى هسببهالك لو شغلتنى هنا هتبقى اكتر من تمن الاكل اللى انت مش عايز تسامحنى فيه . يعنى كل حلولكم هاتيجى عليكم بخساير وبرضه مش هتاخدوا فلوسكم .لكن انا بقى عندى حل ممكن اعمله يطلعنى من المأزق ده بسهوله وكمان انت اللى هتدفعلى فلوس
انا كمان اللى هدفعلك فلوس !!. لاء دانت زودتها اوى يانصاب ياحرامي
ايوه طبعا . حضرتك انا لو مسكت بطنى دلوقت وصوت واترميت على الارض كدهو وقولت اااااااااااااه . الاكل بتاعكم فيه ايه . همووووووووووووووت . الحقونى .
بس بس . وطى صوتك .
بموووووت . انا اتسممت ولا ايييييييييييه . ااااااااااااااااه . بطنى
الله يخرب بيتك . مش عايزين حاجه . قوم وغور فى داهية
مش قادر اقوووووم . ( الناس تتلم ) . هاتولى الاسعاااااااااااااااف
صاحب المحل يهمس فى اذنه .. قوم ومش عايز منك حاجه
مش قاااااادر
طب ميت جنيه يابن الكلب وماتورنيش وشك تاني
الاسعاااااااااااف
متين جنيه
بموووووووووووت
امال عايز كام
تلتوميه وعشرين
موافق
وضيف عليهم 30 جنيه تيبس
موااااااافق
ماحدش من رجالتك هايجى ورايا بره
ياسيدى ماحدش هايجى وراك بس قوم بقى وخلصنا
طب هات ال350 جنيه
اهم . اهم . اهم . خلاص ياجماعة مافيش حاجه . احنا اكلنا سليم وعمر ما يحصل عندنا حاجه زى دى . الراجل فاق اهو واضح انه كان تعبان شويه بس . اتفضلوا اتفضلوا .
لو سمحت
انت لسه هنا . ماتغور
ليه بس كده دانا عايز اديك فلوسك . اتفضل . أدي 320 جنيه حساب الاكل وادى كمان 30 جنيه تيبس للعمال .مش قولتلك ربنا هيفرجها ماصدقتنيش .
ابقوا خلوا عندكوا ايمان شوية . عشان ربنا يكرمكم
