اضيفي الي اناقتك لمسه خاصة بمكملات الاناقه بقلم ستايلست داليا حسام
معلومه صغيره لكل بنوته وسيده
دايما اناقتنا بتكتمل بحاجات بسيطه تسمى (مكملات الانآقه) مع انها حاجات بسيطه لكن اساسيه لانها بتكمل المظهر بتاعنا
مكملات الاناقه من
اكسسورات او حزام او سكارف
واكيد الشوز والشنطه
خلينا دايما متفقين اننا ممكن نلبس فستان بسيط جدا وسكارف يغير شكله ويديله شكل اجمل
علشان كده بنصح ان ساعات بيكون عندنا فستان من سيزون فات وزهقانيين منه طيب جربى تجيبى سكارف لون يعمل ماتشنج مع الفستان وحطيه عليه من قدام شوفى اد ايه هتلاقى شكله يجنن
كمان ميزه الاسكارف انه بيغطى مساحه كبيره من منطقه الصدر والبطن وده ساعات كتير بيبقى ميزه للسيده الممتلئ وكمان للنحيفه لانه بيشتغل على انه بيغطى المساحه الكبيره ديه فبيدارى اى ديفو فيها
الحزام القماش موضه شتاء 2018/2019 وطبعا الحزام الجلد موجود
بس بلنسبه للحزام القماش انصح بيه البنوته والسيده النحيفه واللى جسمها متوسط الامتلاء لانه بيبقى فى منطقه البطن وده بيبين اذا كانت السيده او البنت عندها بطن او جناب وبلتالى بيبوظ شكل الفستان او البلوزه
نصيحه للسيدات والبنات الممتلئ بنسبه طبيعيه مقدرش امنعك تلبسى حزام بس البسى حزام يكون ساقط تحت منطقه البطن اختارى حزام واسع جلد او معدن وسقطيه تحت منطقه البطن بحيث تدارى المنطقه ديه وده ميكونش على فستان او بلوزه مكسمه على الجسم ده يستخدم مع فستان واسع او بلوزه واسعه علشان تعرفى تظبطى شكله
البوت قطعه اساسيه فى الشتاء والهاف بوت
الفكره ازاى نختار ايه منهم للبسنه
اذا لابسه فستان طويل ميستحبش تلبسى عليه بوت طويل كفايه يكون هاف بوت
البوت الطويل بيناسب اكتر اذا فستان قصير او بنطلون وسويت شيريت او بلوفر
بلاش الهاف بوت على الفستان القصير لانه بيبين اى ديفوه فى منطقه الرجل اذا كانت نحيفه او مليانه
دايما الفستان القصير فى الشتاء بيحتاج كولون تقيل وبوت طويل ده بيكون اشيك
الشنط الجلد او الشمواه وكمان الشنط القماش السيزون ده بنلبسها حسب طبيعه اللبس اللى لابسينه
يعنى الشنط القماش موضه لنهار شتاء 2018/2019 مع اللبس الكاجوال سواء بنطلون جينز وسويت شيرت او بلوفر او تريننج سوت
الشنط الجلد بشراشيب او الشمواه والبوت الجلد او الشمواه بشراشيب موضه شتاء2018/2019
الشراشيب تتربع على عرش موضه هذا الشتاء فى كل بيوت الازياء العالميه
بس نصيحه :
بلاش الشنط الكروس للاجسام الممتلئ بشكل ملحوظ لان الشنطه بتكون غير متناسقه مع حجم جسمها وبلتالى بتبين ان الجسم ضخم على الشنطه والشكل الكلى بيكون مش حلو دايما الناس اللى جسمها مليان حاولى تمسكى شنطه كبيره فى الحجم بيكون ده الطف
الاكسسورات بتختلف كل بنت وسيده فى حبها للاكسسوار
الاكسسوار بيدى شكل للبس بس برضو نراعى حجم جسمنا واحنا بنختار الاكسسوار يعنى العقد الكبير الحجم وبياخد منطقه الصدر ياريت السيدات والبنات الممتلئ بشكل ملحوظ تبعد عن الموديلات ديه لانها بتكون قطعه بارزه وبتلفت النظر وبلتالى بتبين حجم منطقه الصدر
السيدات والبنات الممتلئ الافضل ليهم بيكون العقد الطويل
لفه الطرحه للمحجبات
الطرحه بتغير شكلنا تماما ياريت كلنا نختار الطرحه اللى تنور وشنا واللى متبقاش لمسه الجبهه بشكل مباشر او الطرحه الليكرا للسيدات والبنات اللى وشهم مليان بتكون ماسكه على وشهم وبتالى بتبين ان الوش منفوخ بشكل ملحوظ نبعد عن الطرح الليكرا للى وشهم مليان
البشره الخمريه تبعد عن الالوان
الكحلى والموف الغامق او الفاتح انهم يكونو مباشرين على وشهم لان الالوان ديه بتغمق وشوهم اكتر
لكن نكسره ببندانا تحتهم بلون يمشى مع لبسهم وينور وشهم ويبعد لون الطرحه عن وشهم
البشره الفاتحه تبعد عن اللون الابيض والاصفر الفاتح والبنك الفاتح واللبنى الفاتح والجرى الفاتح لانهم بيخلو وشهم باهت
يكسرو الالوان ديه بلون بندانه قوى يكون مباشر على بشرتهم
دايما فى الشتاء خلى عندك شال او اتنين
تحطيه علي ايدك اذا لابسه طقم ومش عاوزه تغيرى شكله بجاكت او سويتر
الشال بيحل مكانهم وفى نفس الوقت بيكون شكله شيك
اختارى الوان محايده
زى الاسود والكافيه بيليقو على معظم اللبس
وفى النهايه تفاصيلنا مبتخلصش
ودايما فى معلومه جديده تهمنا
وافتكرى دايما انك كل ما كنتى بسيطه كل ما كنتى اشيك
شياكتك فى بساطتك
#ستايلست ومنسقه ازياء
#داليا_حسام
