اكلات شعبيه اقتصاديه  مقدم من مريم أبو العلا 

فول بالطحينه والزيت الحار والخلطه  السريه

افرمي بالكبه فصين ثوم وبصله صغيره فلفل اخضر وطماطم

ضعى عليهم توابل ملح وفلفل اسود كمون كزبره ناشفه ملعقه خل ملعقتين زيت عصره ليمون ملعقتين طحينه افرمي الفول بالاخلاط ضع في طاسه ملعقه زيت انزلي بالفول يسخن انزلي بالتتبيله وقلبي دقيقتين ونزليه ضعي عليه الزيت الحار الي هو زيت بذر الكتان .

عدس بالشعريه

في اناء ضعي العدس حبه طماطم حبه جزره بصله فصين ثوم ماء ضعيهم على النار ربع ساعه نزليهم يبرد وافرميها بالخلاط ضعي في اناء ملعقتين سمنه حمري الشعريه وانزلي بيها ع العدس زوديه كوب ماء سخن وسبيهم يستو ١٠ دقايق

حمري فصين ثوم ونزليهم علي العدس وبالهنا

طعميه بيتي باسرارها

فول بليه من الليل

الصبح اغسليه جيدا ضعي معاه بصل اخضر بصل احمر ثوم

كرات لو عندي كزبره خضر نصف رغيف عيش  افرمي كله مع بعضه في الكبه وش  بعدين ضيفي ماء ٣ ملاعق وافرميها تاني تبقي ناعمه  تبليها ملح وفلفل اسود كمون كزبره ناشفه

ورشي سمسم واقليها لو هتفرزيها متحطيش توابل عشان ما تسمر منك وتنزل مايتها .

المسقعه بدون لحم

قطعي بطاطس شرائح رفيعه ضعيها في ماء

باذنجان شرائح سميكه شوي رشي عليه ملح من الجهاتين .

فلفل اخضر  .

سخني زيت غزير اقلي البطاطس والفلفل والباذنجان نشفيه بفوطه مطبخ واقليه

رصيهم في صنيه فرن .

اعملي تسبيكه طماطم

فصين ثوم مفروم في ملعقتين زيت

وكزبره ناشفه وملعقتين خل

انزلي بعصير الطماطم يتسبك خمس دقائق ظبطلها ملح وتوابل وضعيها علي الباذنجان ودخليهم الفرن ربع ساعه وبالهنا.

بدنجان مقلي ومتبل وبطاطس مقليه

رشي ع البدنجان ملح نشفيه بفوطه

اقليه خرجيه في مصفي

ابشري طماطم جزر بصل فلفل اخضر

اللهم ملح خل وليمون وفلفل اسود

ضعيهم على  الباذنجان وبالهنا.

البطاطس  المقرمشه .

قشري البطاطس قطعيها صوابع اغسليها كويس جدا  انقعيها ساعه في ماي فيها ملعقه ملح وملعقه خل

صفيها خدي الماء الي فيها ملح وخل ضعها علي النار تغلي

انزلي بالبطاطس ٦ دقائق وشيليها ضعيها في ماء بارده

خرجيها تشفيها. ورشيها بالدقيق. واقليهاا في زيت غزير ساخن متقلبش كتير عشان القرمشه .تبقي دهبي وخرجيه وبالهنا.

عيش الصاج

٤ كوب دقيق

٢كوب ونصف ماء او زياده حسب نوع الدقيق

ملعقه خميره كبيره ممسوحه

ملعقه سكر رشه ملح

٣ ملاعق دقيق البسبوسه ( سميد او سمولينه )

٣ ملاعق زيت

اعجني كل المكونات لحد ما توصل لعجينة ناعمه وطريه سبيها تخمر ساعه وقطعيها كور صغيره سبيها ترتاح عشر دقائق افرديها رقيقه ( رقيقه عشان وانتي بتخبزيه ينفخ معاكي ) هتسبيها ترتاح ربع ساعه (يعني افردي كل الكور لو حتي علي السرير لو مش عندك مكان عشان يرتاح كله مره واحده ) بعدين سخني طاسه جيدا واخبزي العيش قلبيه علي الوشين كل شويه لحد ميحمر بياخد دقيه ونصف تقريبا.

رئيس قسم المطبخ أ / جيهان جعفر