الأعلامية ماريان ألفى تكتب :الاختيار قرار يحتاج لتأنى ودراسة

الأعلامية ماريان ألفى تكتب :الاختيار قرار يحتاج لتأنى ودراسة

بقلم: ماريان ألفى

 

قبل ما ترتبط وتحب فكر مع نفسك ..

فكر هتحب مين..فكر هتتسند علي مين في الدنيا إللي عايشين فيها..

فكر مين إللي هيكمل معاك للنهاية..

اختار الشخص إللي دايما بيدور علي راحتك أنت ,إللي بيشوف إيه بيزعلك أو بيتعبك و ميعملوش قبل ما يعمل إللي يفرحك وبس

اختار إللي  تحس  معاه بالأمان..

بلاش ترتبط وتحب حد لمجرد إنه حد شكله حلو أو كلامه جميل أو منصبه كبير أو معاه فلوس..

لو هتحب حب إللي هيتمسك بيك في كل حالاتك سواء كنت مبسوط أو زعلان..غني أو فقير..

مين هيبقي معاك ف صحتك وانت كويس.. ومين إللي استحالة يبعد عنك ف مرضك..

مين إللي لما يحصل بينكم خلاف لازم يكلمك علشان يطمن عليك لو محتاج حاجه

وميعديش اليوم غير وانتوا متصالحين علشان يومه مش بيمشي غير بيك

 مش يهتم بيك وانتوا حلوين ولما تزعلوا ميعرفش عنك حاجه ولا يقلق عليك

اختار إللي يشجعك علي حاجه أنت بتحبها وتنجح فيها مش يزعل منك لما تنشغل غصب عنك بالعكس يكون مقدر تعبك ومجهودك

الحب مش  فرحة بدايات ومكالمات بالساعات وخروج وفسح ..

لا الحب بجد هو احتواء وحد عاوز يطمنك بوجوده معاك دايما

 إنك تكتشف حاجات في نفسك مكنتش عارفها ..

انك مرتاح ومطمن وان في حتة جواك كِملت بوجوده وإنك مُكتفي بيه

اختاروا إللي لو الدنيا كلها سبتك هو هيفضل موجود و مايبعدش عنك مهما حصل

الحُب حلو جداً، بس لما تكون مع حد مقدرك ومقدر اللي بتعمله عشانه، شخص يقدر يفرحك ويفرح ليك من قلبه، شخص فاهمك من جواك بسهوله ومن غير ما تبررله أي حاجه.

 أوعى تقبل بأي شخص يجي ف طريقك وخلاص  .. أستنى لحد ما تقابل الشخص إللي تكون مرتاح معاه

 

طول ما حاسس ان في إحساس ناقص

هتعيش تدور عليه طول عمرك ..

اختاروا إللي تحبوا نفسكم معاهم وتحبوا الحياه

مش يكرهوكم في الحب ويندموكم علي اختياركم