الأنظمة الغذائية أسلوب حياة للشفاء وليست لإنقاص الوزن
بقلم :رؤى مصطفى
النهارده هنكمل كلامنا عن الأنظمه الغذائية الصحية
بس قبل ما أقولك على نظام غذائي يخسسك
لازم تعرف معلومات مهمة عن أهم عضو فى جسمك.
زى ما قلت فى الحلقات السابقة إن الجسم بيعتمد فى طاقته على نوعين طاقة بياخدها من الكاربوهيدرات زى السكر والنشويات
وطاقة بياخدها من الدهون ودى كانت معلومه غريبه على معظم الناس لكنها نظرية علمية مؤكده مافيهاش إفتكاسات إن طاقة الدهون هى الأصح للجسم بس بشرط!
إيه مصدرها؟؟
طيب تعالوا الأول نعرف السكر والنشويات لما بنعتمد عليهم بيحصل إيه فى جسمنا
عارفين أكبر عمود موجود فى المبنى اللى ساكنين فيه واللى بيكون شايل أكبر حمل فى المبنى
لو جسمك هو المبنى ده يبقى كبدك هو العمود اللى بنتكلم عنه
الكبد بعتبره الدينامو المسئول عن صحة الجسم كله إذا صلح صلح الجسد كله
وإذا فسد فسد الجسد كله
طيب إيه هو الكبد وإيه وظيفته فى جسمنا
الكبد هو أكبر عضو في جسم الإنسان،بيبلغ وزنه تقريبا كيلو ونصف
مكانه في أعلى الجهة اليمنى من البطن، وبيحميه الجزء السفلي من القفص الصدري. وبيقوم الكبد بما لا يقل عن خمسة آلاف وظيفة مهمة لاستمرار الحياة؛
فهنلاقيه بيقوم بإنتاج اللبنات الأساسية اللازمة لبناء الجسم، وكذلك تخليصه من المواد الكيميائية السامة الناتجة عن عملية الاحتراق. وكمان بيقوم بإنتاج العصارة الصفراوية، ونقلها إلى الأمعاء عن طريق القنوات المرارية
علشان كده بنقول لو المراره تعبانه دور على الأصل اللى هو الكبد مش تعالج العرض وتسيب السبب
. و العصارة الصفراوية دى هى اللى بتساعد على هضم الطعام
. وكمان بينتج الكبد العديد من البروتينات، والهرمونات والإنزيمات اللى بتؤدي إلى انتظام عمل جسم الإنسان،
غير العلاقة الوطيده بين صحة الكبد والمرارة والغدة الدرقية… مفاجئة مش كده؟؟
وكمان بيفرز المواد الضرورية لتجلط الدم، بالإضافة إلى إنه مسئول عن تمثيل الكوليسترول وتحويله من ضار لنافع
، وانتظام نسبة السكر في الدم،
والتعامل مع الغالبية العظمى من الأدوية التي يتناولها الإنسان، علشان يخلص الجسم من المواد الكيميائية، بعد الاستفادة منها.
ولما نيجى إحنا نفضل ندى الكبد ده كميات رهيبه من الأدوية والكريمات والسكر والنشا والدقيق والزيوت المهدرجه،
طبعا مش هايتحمل كل ده
فيبداء يتوقف تدريجيا عن أداء وظايفه
ومن ضعفه ممكن تحصل التهابات الكبد الفيروسية وهى من أهم الأمراض التي تصيب كبد الإنسان،
ويصيب الفيروس الكبدي خلية الكبد،
وساعتها مايقدرش على القيام بوظايفه
وعليه تفضل تعافر الخلايا السليمة المتبقية بعمل الجزء الأكبر من الوظائف المطلوبة،
فتتأثرجميع وظائف الجسم ونلاقى بعد الإلتهاب دهون على الكبد فتشمع فتليف
وندخل فى قصه كبيره
طيب إحنا كنا بنتكلم عن نظام غذائى إيه اللى جابنا هنا
لو مفهمتش آلية عمل جسمك مش هتهتم باللى بتدخله لجسمك وهتزهق وتضعف مع أول رغيف بلدى طالع من الفرن ريحته مفحفحه وطاسة البطاطس المحمره إللى عنيك طلعت قلوب أول ما سمعت صوتها بتعمل تش
لكن لما تعرف الدايره الكبيره إللى بيدور فيها أعضاء جسمك هتفهم أد إيه إنت ظالمه
وإن النظام الغذائى مش المفروض يكون نظام دايت أنزل بيه وزنى وبس
لازم يكون نظام بيعالج سبب السمنه مش أعراضها
ويكون نظام حياه مش شهر وإنتهى
إستنونى فى الحلقة الجايه علشان نعرف إزاى نحافظ على كبدنا ولو تعب بالفعل إزاى نساعده على التشافى عن طريق نظامنا الغذائى
وإستنونى مع كبسوله جديده مفيده
