الأول مبيعرفش والتاني شكك في نسب ولاده .. اعترافات أثارت الجدل

الأول مبيعرفش والتاني شكك في نسب ولاده .. اعترافات أثارت الجدل.

كتبت: أميرة الصاوي

” مش عارفة اعمل ايه مع جوزي وهو شكاك ووصل بيه الحال إنه يشك في شرفي وفي نسب عياله “،

بتلك الكلمات بدأت فاطمة في سرد خلافاتها مع زوجها في محكمة الأسرة بعد وصولها لنقطة النهاية معه.

مبيعرفش:-

تقول فاطمة البالغة من العمر 28 سنة، أنا اتجوزت مرتين المره الاولى وانا عندي 16 سنه اتجوزت واحد عنده 33 سنه للأسف هو كان ما بيعرفش خالص لحد ثالث يوم الفرح وهو طالع مش عارف يمارس العلاقة الزوجية، لحد ما روحنا لدكتور وكشف وعمل فحوصات وفي النهاية نفس الكلام ونفس المشكلة استمرت.

وأضافت فاطمة: ” أنا مكنتش عارفة أتصرف إزاي ، والأغرب أنه كان حنين معايا وكنت لما أزور أمي وأرجع البيت ألاقيه نضف البيت كله وغسل السجاد، والمواعين، ولما بيرجع من الشغل وأنا لسه نايمة، بيشتري أكل وهو راجع علشان ميتعبنيش.

أحن راجل ف الدنيا:-

تستكمل فاطمة: هو أحن شخص شوفته في حياتي  ومزعلتش على حاجات تافهه منه، وكان بيعمل ليا كل حاجة بحبها وكان طيب وحنين وكريم، بس للأسف اتطلقت منه بعد سنة ونص جواز، وقتها أهلي قالولي اني هندم عليه، وهتجوز واحد يصبحني ويمسيني بعلقة وهو دا اللي حصل فعلًا مع جوزي التاني.

جوزي التاني شكاك:-

تتابع فاطمة: اتجوزت مرة تانية مهندس انتاج وتبريد، وفضلت معه 6 سنين، وأنجبت طفلين طفلة لديها سنتين ونص وولد لديه 6 سنوات، وفي البداية جوزي كان لطيف وبعد مدة نزلت أشتغل علشان أساعد في مصاريف البيت، وبالتدريج بقيت أنا اللي بصرف وهو اترفد من الشغل بسبب مشكلة ورفض وكان بيدور على وظيفة تانية.

ماشيه في الحرام:-

تابعت فاطمة: أنا أصبحت المصدر الأساسي في البيت للصرف وللأسف جوزي طلع عنده مرض الشك، بدأ يشكك فيا ووصل بيه الشك في نسب أطفالنا وإنهم مش ولاده وأنا ماشية في الحرام، وحد من صحابه افترى عليا وقال إني كنت ماشية مع واحد من شارعنا، وجوزي صدق الشخص دا وقلعني النقاب في الشارع ومسكني من شعري وأنا عضيته.

رافض يدفع اي حاجة:-

أنا وصلت مع جوزي إني خرجت عايشة من بين إيديه، ده شخص عصبي ومفتري ورفعت قضية خلع علشان اتنازل عن كل حاجة وأخلص منه ومن شكه، ورفعت قضية نفقة عليه وهو رافض يدفع أي حاجة، ولما بيطلب الأولاد بيروحوا يشوفوه علشان احنا في نفس الشارع ورغم كدا مبيدفعش ليهم قرش .