الحمد لله على نعمه اليوم العادي” تكتبها / دعاء خطاب
” الحمد لله على نعمه اليوم العادي”
الايام العاديه الممله اللي تشبه بعضها دي
طلعت نعمه كبيررررره من رب العالمين
معرفناش قيمتها إلا لما اختبرنا
لخبطه ايامنا ونظام حياتنا
لما بقى ليلنا نهار ونهارنا ليل
لما مابقيناش عارفين بكره شكله إيه
ولا يومنا حيمشي ازاي
بنتفق على خطط وحاجات مش متأكدين
إن القدر حيمهلنا او يدينا فرصه ننفذها
عرفنا قيمه العادي اللي أتاريه مش عادي
الحمد لله على نعمه اليوم العادي
إنك تشوف حبايبك براحتك وتاخدهم
في حضنك وتسلم وأنت مطمن
إنك تخرج بدون قلق في اي وقت
بدون توتر… إنك تاخد نفسك بره البيت
كامل سليم مش كاتم علي قلبك
كمامه تضيق خلقك وتقلل الهوا
اللي داخل جسمك
إنك تستعمل كل حاجه براحتك
مش خايف من عدوى ووباء جايز
يقتحم عليك حياتك في اي لحظه
يقلبها 180 درجه
عرفنا قيمه الأكسجين اللي ببلاش
لما دورنا عليه متعبي في اسطوانات
لما شوفنا المساجد مقفوله لشهور
وبقينا نعدي عليها من بره نشتهي
سجده فيها.. ياااااه حاجات كتير
كنا مابنتوقفش عندها أصلا وواخدينها
مسلمات في حياتنا وفاكرينها حتدوم
الحمد لله على كل حال
الحمد لله دائماً وابدا
الحمد لله حتى يبلغ الحمد منتهاه.
