الساحل الشمالي ” أنا وأنت ودوكهم ودلهوما” بقلم / د. سحر نوح
الساحل الشمالي ” أنا وأنت ودوكهم ودلهوما” بقلم / د. سحر نوح
مجتمعنا بقي دواير وده بتشوفه واضح جدا لما بتروح الساحل الشمالي …حتي في مارينا فرق كبييييير مابين مارينا واحد والي بعدها لغاية ماتوصل مارينا ٧ ..مارينا واحد بتلاقي عيله كبيره مإجره شقه لمده اسبوع والعيله دي كلها راكبين عربيه واحده والاطفال قاعدين في الشنطه المفتوحه ومتكومين فوق بعض والعربيه من كتر مافيها ناس بتزحف مابتمشيش ومشغلين اغاني شعبي او مهراجانات بصوت عالي جدا والي سايق وحاطط علي رجله ابنه ماسك الكلاكس ومديها نيق نيق نيق نيق اووا اووا نيق نيق علشان الروشنه والانبساط ويطلعوا بقي علي سيجال ياكلوا لقمة القاضي ووجبة كنتاكي سبايسي وفطير بالسكر وبعدين يروحوا رحله لبورتو يتفرجوا علي الناس ويتمشوا وياكلو ايس كريم ولو بالصدفه لقوا حد مشهور يتصوروا معاه للذكري ويروحوا شاكرين مهللين …شباب الروشنه الي حالق حلقة الكابوتشا وصابغ شعره بأكسجين وماشي ينط كانه متكرهب ونازل بقي يروشن علي خلق الله ويتكلم بصوت عالي مع اصحابه او في التليفون ..ساء الفل يا هندازااااااا مارينا تناديك ياله يا جدع تعالي.. ده بقي ممكن تبقي عاوز تعدي وهو واصحابه القطاقيط عاملين من بنها وده جزء من انبساطهم وفرفشتهم انهم يغلسوا علي خلق الله علشان يقضوا صيف للتاريخ والجغرافيا والتربيه القوميه . ده غير بقي العربيه بتاعتهم الي حاطين عليها ستيكرز نار وتنين واوعي وشك ومشغلين اغاني محمد رمضان بصوت عالي جدا علشان الخير يعم وكله يسمع معاهم ويغرزوا بالعربيه ومش مهم مين ماشي وراهم ووراه ايه المهم هما ينبسطوا .. ست وجوزها بيتمشوا وبيتخانقوا بصوت عالي وهو بيسب ويلعن اليوم الي اتجوز وخلف فيه اورطة العيال الي ممكن يكون متلخبط في عددهم و اساميهم وهي بتعيط وتقوله وانا اعمل ايه ماهم عيالك الي عاوزين وتصرخ تنادي علي الولد الي سرح بعيد لوحده ..تعالي هنا ياولا يالي تنشك في معاميعك امسك في ايد ابوك ربنا ياخدني ويريحني منكوا … ودول غالبا الي بنقرا عنهم في صفحة الحوادث تاني يوم سواء قاتل او مقتول…. تنزل بقي علي طريق سيدي عبد الرحمن تلاقي ستات نافخه شفايفها علي ٣٣ وضاربه لون اصفر عجب العجاب وحاطه ٣٠٠ كيلو ماسكرا او لازقه منفضه علي هيئة رموش ومش حارمانا من لون داهنه وشها كل الألوان اصفر تشيلاقي أخضر تشيلاقي ده غير كل الماركات والالماظات والضوافر الأكليرك مع المانكير الي الوانه عجب العجاب الفسوفوريك الي عليه فصوص برؤ روء وكل ضافر لون حتي الأسود موجود ياباشا علشان تقول انا غنيه واحب الهديه وطبعا لزوم الشوياكه لازم عوجة البوق ويبقي الكلام تلت ارباعه انجليزي يا مرسي علشان يبان انها صارفه علي تعليمها وجدها كان كائد طابيه وواخده الاعداديه من جامعه عمبوريكي اوصه تاسه ودلع الاسامي بقي نيني وكيكي وكوكي وتوتي وهوكي وتوكي وكيتي وبيبي وشوكي وبوكي وهالمه جره وكل ماتبعد في الطريق اكتر تلاقي الكوكي وتيتي اكتر واكتر .. وطبعاً لوزم الشئ الناني تبقي من نيجيريا او اي حاجه سمرا في هيئة باكاكا داسا وياعيني ماسكه الطفل المدلع الرزل وحيد مامي وهو قاعد يشقلبها وراه علشان مامي بتتكلم مع صاحبتها عن اخر شنطه شانيل جابتها من كوالا لامبور . دول بقي كانوا سكان مارينا القدام ولما لاقوها بيئت ولمت من وجهة نظرهم لموا هدومهم وعزالهم وابتدوا ينزحوا علي القري الي بعدها واعتقد دول حايفضلوا ينزحوا لغاية مايلاقوا نفسهم علي حدود ليبيا … وانت لو انسان بتحب البساطه والهدوء والتواضع بتلاقي نفسك تايه لاقادر تتعامل مع دول ولا مع دوكهم فاتعمل لنفسك دايره اصغر تلم فيها الناس الي شبهك وعلي طبيعتهم وفي نفس الوقت مابتزعجش غيرها وتدوشهم ولا بتتمنظر علي غيرها وتربكهم وتقفل علي نفسك باب بيتك الي ماغيرتوش ومشيت علي موضة الزحف ويادوب لو خرجت تروح تاكل لقمه وتقعد في مكان شويه وترجع بيتك بيتك وانت بتقول جرالك ايه يا مصر هي مصر مين في دول وتفتح ماسبيرو زمان وتشوف فيلم ابيض واسود وتلاقي نفسك فيه وتقول يا خساااااااره كنت احب اعيش في الزمن ده والمره الجايه حاكتبلكم عن جيل البناتيت والاولاد والي عاملينه ….صباح الفل
