الشاعرة انتصار محمد حسين تكتب
بكرة تعرف
عارفين إمتي الناس هتقول
انك كنت حنين…و كنت جميل…
وكان الحب في قلبك نهر ونيل …
و انك كنت معاهم جدع و أصيل…
وانك لو مالت الأيام عمرك ما تميل….
و انك كنت اخ و صاحب بجد…
وانك كنت تصون العشره والعيش والملح ولا احسن حد…
و انك كنت صديق العمر و سد ولا أجمد سد….
و ان عنيك كانت مفاتيح …
و انك كنت البسمه لأي جريح….
و انك بر أمان و طريق……
و انك نسمه أمل تبل الريق ….
و ان ف قلبك للكل بيوت …
و انك ضِلاية ذي شجر التوت….
عارف امتي الناس هتقول؟
بكرة هتعرف …..لما تموت
ورجليك ع الصراط زي البرق تفوت …
لما تلاقي الحاقد واقف مستني نتيجة حقده…
…
لما تشوف الظالم متكتف بمظالمه….
لما تلاقي روحك طايرة تتفرج على كل عقاب اللي خان…
لما تبكي عيونهم ع كل اللي عليهم هان….
لما تشوف الحسرة بتكوي قلوب
كل اللي قطع حبال الود….
لما يمدوا الايادي مستنيين نرويهم…
لما عطشهم يحوم حواليهم….
كنا ياما بنسقي أيامهم محبة وصدق…
كنا بنور حياتهم بقلوبنا الرحيمة
بكل رفق….
كنا بنعطر لياليهم ضحكات صافية…
كنا احنا الحضن الصادق كنا الكلمة الدافئة….
بكرة يعرفوا ..اننا كنا حلم جميل
لقلوب ماكنتش وافية…
بكرة يعرفوا اننا كنا نعمة ومصانوهاش….
كنا روح نقية وسط كومة اوباش…
بكرة كله هيعرف مقامه
لما كل واحد هيلزم باللي يستحقه ….مكانه …
بكرة …كله …هيعرف …في الجنة
بيته…
والا في النار سكنه وعنوانه….
