الشاورما بالعيش السوري مقدم الشيف من عبير حافظ

اسم الوصفه:الشاورما بالعيش السوري

مدة التجهيز ساعة

مدة الطهي ٣٠دقيقة
مقدمه من:عبيرحافظ
انسى انك تاكل شاورمه بره البيت ..احلى شاورمه بيتى ..وحتى العيش ..انتى كمان اللى هتعمليه..واتحدى بيها احسن محل..
مقادير العيش:
2كوب دقيق..معلقه كبيره زبده سايحه..رشه ملح..ماء للعجن.
حطى الزبده..والملح ..على الدقيق ..ونضيف ..الماء تدريجى..ونعجن كويس ..لحد ماالعجينه تلم وتكون عجينه لينه ..ومش بتلزق..نسيبها ونغطيها نص ساعه ترتاح.
هنقطعها..كور معقوله ..ونفرد بالنشابه..دايره..وتكون رقيقه جدا..ونخبزها فى طاسه على النار ونقلب على الوجهين بسرعه ..لحد ماتاخد اللون المظبوط ده وبعد ماتستوى نحطهم على بعض ونغطى بفوطه..عشان يفضل طرى..وبقى معاكى احلى تورتيلا..سورى ..وينفع لاكلات كتير مش الشاورمه بس..
مقاديرالشاورمه:
نص كيلو لحمه حمره متلجه شويه عشان اعرف اقطعها شرايح..اوصوابع صغيره ورفيعه للشاورما..وبهارات شاورما ..جاهزه ..وديه هتديكى طعم قريب للجاهز..ربع كوبايه خل..او ازيد شويه..2معلقه كبيره زبادى.. ملح وفلفل.3معالق زيت..كوب ماء..قطع ليه ضانى شرايح حوالى 150 جرام..بصل جوليان ..2حبه طماطم مقطعه اربعه ومنزوع منها اللب بتاعها..وبعدين مقطعه قطع طوليه..بقدونس مقطع ..
هقلب البهارات مع الزيت والملح والفلفل ..والزبادى..والخل..ونص كوبايه ميه..واقلبهم كويس ..ونحطهم على اللحمه ونتبلها بيها كويس ..ونسيبها المفروض مش اقل من ساعتين ..ممكن اكتر
نسخن طاسه بشويه زيت وننزل باللحمه ونقلب..هتقعد تطشطش معانا كده وريحه تجنن..شويه واحط نص كوبايه الميه التانى..هفضل اقلب لحد ماتجف الميه انزل بقطع الليه وده السر اللى هيخليها زى الجاهزه..شويه هتاخد لون روعه وريحه اروع ..هنزل بالبصل والطماطم تقليبه واحده وانزل بالبقدونس..تقليبه واحده ونطفى النار.
هجيب العيش..وافرش عليه ..سلطه طحينه..وممكن قطع خيار مخلل ..واحط الشاورمه ..ولفى التورتيلا..ولفى فى فويل او ورق ساندوتشات..وعيش باااااه..احلى من الجاهز مليون مره وطعم مميز
ومن تكات الشاورمه ان الميه قليله ..فامش تستوى اللحمه اوى يعنى يبقى فيها نفس الشده..اللى زى مابنجبها من بره ..وده سر حلاوتها..والليه الضانى.. تانى سر من اسراراها..والخل..

رئيس قسم المطبخ اسماء عزازي وسمسمة سعد