الطفل الحساس وكيفية التعامل معه بقلم الكاتبة شيماء أبو زيد

الطفل الحساس وكيفية التعامل معاه.
بقلم.الكاتبة.شيماءأبوزيد…
١٠ علامات للطفل الحساس
١٠ طرق للتعامل مع الطفل الحساس
دكتوره إلاين أورن المتخصصه في علم النفس السريري بتأكد من خلال كتابها إن ١٥ ل ٢٠٪ من الأطفال بيتولدوا بجهاز عصبي أكتر حساسيه من الأطفال التانيه .
يعني إنتا مش لوحدك في الموضوع ده . إحنا كتير.

١٠ علامات تعرف منها إبنك حساس ولا لأ :

١- بيعيط من أقل حاجه :

لمجرد إنك قولتله تعالى وكفاية لعب أو كلمته بشويه عصبية يبدأ يعيط وبيهدي بصعوبة ، يرجع من مدرسته بيعيط عشان حد من زمايله كلمه بشكل مش مناسب أو اتريق عليه.

٢- أي ملمس غريب بيضايقه :

غالبا في لبس الشتا ، هتلاقيه بيقلع بعض اللبس وبيضايق منه ويزعق مش عايز يلبسه ، أو يخاف يلمس الرمل و أى حاجه خشنة ، أو حاجة لزجة أو فيها زيت ، وغالباً مش بيحب يلعب بالصلصال ، لو حس بتراب علي صوابعه يجرى عليك عشان تغسله صوابعه بسرعه .

٣- حاسة الشم عالية :

– ماما في ريحة غريبة ايه ده ؟
= لا يا حبيبي مفيش ريحة يمكن متهيألك
– لا يا ماما في ريحة
الام بعد فترة لو الريحة زادت ممكن تكون سايبة حاجه علي النار ونسيتها، بتكتشف ان ابنها عنده حق وتستغرب هو ازاى شم الريحة وهي مشمتهاش .

٤- بيضايق من الزحمة :

بيحب يقعد في أماكن هادية ، لو نزلت بيه المول أو سوبر ماركت كبير وزحمة يمكن يعيط مع أن محصلش حاجه و لو معيطش هيزن عايز يروح .

٥- بيحب يلعب في هدوء :

ماسك لعبته وبيكلمه من غير تنطيط أو حركة كتير ، وغالباً مش بيحب يلعب مع أطفال كتير لانه بيحس بالزحمة والتشتت .

٦- بيقرا مشاعر اللي حواليه :
– بابا أنت مضايق .
= لا يا حبيبي عادي
– شكلك مضايق في حد زعلك ؟
= طيب وأنت عرفت منين ؟
– باين في عينك ووشك وقاعد زعلان
طبيعته بيحس بمشاعر اللى قدامه وبيهتم بيها حتي لو بتحاول تخفيها ، بيقدر يحس بيك ويقراها ويتأثر بمشاعرك لدرجة الألم وممكن تلاقيه بيعيط لزعلك أو مضايقتك من موضوع معين.

٧- كلامه قليل :
ولكن بيسأل أسئلة عميقة وبيستخدم كلمات أكبر من سنه ، بتستغرب جابها منين وبيكون مستوى ذكائه عالي .

٨- الأكل :
بيركز جداً في الاكل ودرجة حرارته مش بيحبه بارد قوى ولا سخن قوي ، وبيرفض أى أكل غريب في بوقه ، أو لزج زي الجيلي وممكن ميحبش البامية ويقولك بتشوك في بوقي ، ولو لون الاكل وطريقة تقطيعه معجبهوش بيرفضه.

٩- يومه :
لو يومه إتشقلب بيتوتر جدا ، مش بيقدر بيتأقلم مع التغيير في الروتين بتاعه وأغلب الوقت ده بيكون متوتر جدا .

١٠- النوم والضوء والصوت :

لو فتحت النور عليه وهو نايم يقوم بسرعة ، لو مشيتي جنبه يحس بيكي ويقوم مع انك مخبطيش في حاجه ، طبيعته نومه خفيف وبيحس بأى حاجه حواليه حتي لو بسيطة بالنسبالك ، ودا بيخليه ممكن يقوم أكتر من مرة بالليل لوحده .

تقريبا ٢٠٪ من اللي هيقروا الكلام ده هيأكدوا إن أطفالهم كدا وإن ده طبيعي وإنه مش بيتدلع أو بيمثل
وأكيد قدرت دلوقتي حجم المعاناه اللي بيشوفها طفلك لما بتتعامل معاه غلط

إذا كان إبنك حساس فيه ١٠ طرق للتعامل معاه :

١- إتقبله زي ما هو :

بلاش تقوله بطل عياط كل شويه تعيط ، ولكن طبطب عليه وهديه ، لإنك فهمت ان دي طبيعته مش بيأفور ، وهو هيفهم ويقدر أنك فاهمه ودا بيخليه يهدى أسرع .

٢- علمه ازاى يتصرف :
– أنت كل يوم ترجعلي من المدرسة بتعيط .
= ياماما هما اللى بيضايقوني .
– فالح عشان سيبته يقولك كده . تستاهل ، ادخل شوف هتعمل ايه بقا و بطل زن .
هل هنا الطفل استفاد حاجه من الكلمتين اللى قولتهم ، بالعكس هيفضل يعيط ومش هيحب المدرسة ولا هيبقا عايز يتكلم معاكي أساسا ، لانك مش بتفهميه . مش بتحتويه ، الطفل في الحالة ديه منتظر منك دعم منتظر منك تشجيع وأنه يثق في نفسه ويواجه المخاوف الخاصه بيه .

٣ – التعاطف أهم من النصح :

التعاطف هي أهم نصيحه للتعامل مع الطفل الحساس والتواصل معاه. ، طيب تتعاطف معاه ازاى؟
أول حاجه خليه يعبر عن مشاعره ، وقوله أنك متفهم جداً وحاسس بيه . بس ايه رايك نفكر في حل للمشكلة دى ونشوف بديل ، التعاطف بيساعدك تقلل من انفعاله للموقف وتساعده علي الحل ، مش مجرد تقوله يا حرام معلش خلاص بقا موقف وحصل . لازم تخليه إيجابي ويعرف يتعامل مع الموقف.
٤ – قلل الوتيرة :
ابنك بيضايق من النور بالليل أو الصوت العالي ، يبقا قدامه ووقت نومه اتكلم بصوت واطى ، واطفي النور بالليل ، وقلل الحركة . هيئ الجو اللي يقلل التوتر ويخليه يقعد او ينام في سلام .

٥ – ساعده يواجه الصدمة :
بيضايق من الاماكن الزحمة والتجمعات ، ساعده علي تكوين صديق واحد بس في الأول . وبعد كدا خليهم إتنين . وبعدها تلاته . وكمان فتره إختبر وجوده وسط مجموعه وشجعه سواء كلعبه أو كقعده. ، وكل ما يكبر ساعده يكتر من أصحابه في النادي والمدرسة ، عشان يتأقلم مع طبيعة الحياة والتجمعات .

٦ – الحزم مهم جدا لكن الحزم بحنية :
لما يعيط علي حاجه أو يضايق حاول تكون حكيم . بلاش موضوع تسمع كلامه وتجرى تنفذ اللى هو عايزه ، لان الأسلوب ده ممكن يحصل معاه أثر رجعي ويبقا شخص مدلع ، ولكن تقدر تعاقبه باسلوب يناسب طبيعته الحسية زى حرمان من اللعبه لوقت قليل ، بلاش تقوله كلمه وحشه أو تبصله بصة تضايقه ، ولكن قوله ان السلوك دا غلط وعياطك مش هيفيد ، ومحروم من اللعب باللعبة دى لمدة يوم .

٧ – النقد للسلوك مش للطفل:

– إنتا مش منظم انتا فوضوي . إمتا بقا هتكون إنسان مرتب

لو طفلك عمل تصرف مش سليم . ركز يكون نقدك على التصرف مش عليه هو
وجه اللوم و النقد للتصرف مش لطفلك

– حبيبي . أنتا فيك حاجات جميلة أوي بس التصرف بتاع عدم النظام ده أنا مش بحبه وإنتا كمان صح ؟ طب يلا بقا علشان نتحدى التصرف ده ونبقا منظمين .

٨- القواعد والالتزام بها:
إنت عملت تصرف غلط هتتعاقب ، النوم بمعاد و ممكن تتحرم من حاجه بتحبها لو معملتش ده ،
القواعد للطفل الحساس بتخليه يتكيف مع طبيعة المجتمع ، ويفهم أن مش كل حاجه علي هواه أو هتراعي طبيعته ، وتعلمه ازاى يواجه التحديات ، المرونه حلوه بس كإستثناء مش قاعده.

٩- تأثير المكافأة والتحفيز وأهميتها للأطفال:
لو واجه موقف بطريقة صح من غير عياط ، أو عمل انجاز صغير ، أو سلوك سليم وملتزم بالقواعد ، قوله انك مبسوط منه أو هاتله هدية أو شيء بيحبه .التحفيز هيساعده يكرر السلوك تاني ويكون مع الوقت عادة عنده.

١٠- خلي عنده ثقة في نفسه
غالباً الطفل الحساس بيواجه تحدي كبير في موضوع الثقه في النفس . هو محتاج منك كل مرة يحس أنه مش قادر يواجه الموقف تفكره بانجاز عمله حتي لو الإنجاز ده صغير ، وكلفه بمهمة يعملها في البيت زى ينظم غرفته لوحده حتي لو النتيجة ضعيفة و امدحه علي الشئ الكويس اللى عمله . ده بيساعده على بناء ثقته بنفسه.
حساسية ابنك مش أفورة ولا مرض ، دى طبيعة ونعمة ربنا أنعم بيها عليه
و لكن المشكله في تعاملك أنت معاه ، قدر النعمة اللى في ايدك واتعامل معاها صح…