العمر ما بيوقفش عند مرحلة.. والست ما بيخلصش دورها مهما الزمن فات

كتبت /داليا حسام

مفيش حاجة اسمها سن يأس.. في حاجة اسمها ست بتتولد من جديد بروح أنضج وحب أعمق لنفسها

بيقولوا عليه “سن اليأس”، وكأن العمر بيقف عند رقم، وكأنك فجأة بطّلتِ تكوني ست مليانة حياة، وكأنك فقدتي قيمتك لأن جسمك بيتغير أو إحساسك بنفسك اختلف.
بس الحقيقة إن الاسم ده غلط، وظالم، وقاسي على روحك.
لأنك مش بتخلصي، ولا بتقلّي، ولا بتتكسري.إنتي بتتجددي.

اللي بيسموه “يأس” هو في الحقيقة يقظة، بداية مرحلة مختلفة، أهدى، أصدق، وأقرب ليكي.

في المرحلة دي، بتكوني عديتي كتير..
ربيتي، اشتغلتي، تعبتي، وسكتي كتير.
وفي وسط كل ده، نسيتي نفسك شوية.. أجلتي أحلامك، وكتمتي احتياجاتك، وقلتي “مش وقته”.
بس دلوقتي اللي جواكي بيصحى، وبيقولك: “أنا لسه هنا”.
الناس بتربط أنوثة الست بالخصوبة، بالشباب، بالشكل الخارجي.

لكن محدش قال إن الست تفضل أنثى طول العمر، بروحها، بطريقتها، بحنيتها، بثقتها اللي بتزيد سنة عن سنة.

مفيش سن يأس.. فيه سن صُلح مع النفس

اللي بتسميه الناس “نهاية”، هو بداية من نوع جديد.
بتختاري مين يبقى في حياتك
بتعرفي إن الراحة النفسية أغلى من رضا الناس
بتقدّري جسمك من غير قسوة
وبتقبلي شكلك من غير جلد ذات
بتتعلمي تحبي نفسك زي ما هي، من غير فلتر، ومن غير خوف.

اللي جواكي في المرحلة دي مش ضعف.. ده نُضج
بتبقي حساسة أكتر، وده مش عيب
بتبقي هادية أكتر، وده مش كسل
بتبقي محتاجة وقت لنفسك، وده مش أنانية.

اللي حواليكي ممكن ميفهموش التغيّر اللي بيحصل جواكي
بس أنتي بس اللي تقدري تفهميه، وتطبطبي على نفسك، وتختاري تعيشي المرحلة دي بأسلوبك.
اختاري تعيشي.. مش تتفرجي على نفسك من بعيد
اعملي اللي بيبهجك، حتى لو بسيط
اعملي شعرِك، اشتري فستان يعجبك
اتكلمي مع ناس بتحبيهم
اقعدي مع نفسك واسمعيها
اكتبي مشاعرك، أو حتى اسكتي شوية وسيبي قلبك يتكلم
العمر ما بيقفش.. بس أنتي تقدري توقفِ شوية وتقرري:
أنا عاوزة أكمل إزاي؟

“سن اليأس” كلمة مش بتوصفك
إنتي أكبر من إنها تحددك
إنتي ما بتتحدديش برقم
ولا بمظهر ولا برأي حد
إنتي حياة بكل مراحله فيها انتى حلوه
فيكي أنوثة مش بتخلص
العمر ما بيوقفش عند مرحلة
والست ما بيخلصش دورها مهما الزمن فات اللي جاي ليكي
علشان ديه أصدق، وأحلى، وأنضج مرحله فى حياتك

بقلم /داليا حسام