العيون بتقول ايه ؟؟ أسرار بلا كلمات بقلم رغدة السعيد

العيون بتقول ايه ؟؟ أسرار بلا كلمات بقلم رغدة السعيد

 

 

العيون بتقول ايه ؟؟.. العين دي سر كبير و هي مراية الروح ، وكتير من الناس عارفين أغنية  “رمش عينه اللي جرحني!” أو “يصعب عليا رمشة عنيا ولا حتى ثانية”.

بقلم رغدة السعيد الباحثة في لغة الجسد

ليه كل الأغاني والشعر بيتكلموا عن لغة العيون؟

ببساطة لأن العيون بتقول الحقيقة أكتر من أي كلام. زمان كانوا بيقولوا “العين مرآة الروح”، والموضوع ده مش مجرد إحساس، ده كمان له أساس علمي.

كتير مننا لما يشوف حد قريب منه، من غير ما يسمع منه كلمة، يقدر يعرف إذا كان فيه حاجة مضايقاه.

المزيد:هند صبرى ولغة الجسد فى هجمة مرتدة..رد فعل غير متوقع من الجمهور

زي الزميل او الصديق لما يشوف صديقه و يلاقي نفسه بيقول له : “مالك؟”

العين بتقول كل حاجة من غير ما نتكلم. النظرات بتوصل مشاعر وتفاصيل كتيرة، زي لما كنا صغيرين وكنا نقول لصاحبنا “عيني في عينك”، كأن النظرة هي دليل الصدق.

النظرة الأولى لشخص ممكن تكشف حاجات كتير. لو نظرة الشخص ثابتة وطويلة، ده دليل على الثقة بالنفس. لكن لو بيهرب من النظر، غالباً بيكون خجول أو مش واثق. وكل مقابلة بعد كده بتأكد الانطباع ده.

حركة العين بتتغير حسب اللي بنفكر فيه. لما تطلب من حد يتخيل حاجة زي شجرة وعربية، هتلاقي عينه راحت لليمين فوق. ولو طلبت منه يفتكر حاجة قديمة، هتلاقي عينه راحت للشمال فوق، وده لأن المخ اليمين مسئول عن التخيل والشمال مسئول عن الذكريات. و ده في اغلبية الناس و الباقي بيكون فص المخ مختلف فيتعكس الموضوع . أما لو كان الشخص بيتخيل صوت، هتلاقي عينه في مستوى الأذن ناحية اليمين. ولو بيفتكر صوت قديم، هتلاقيها راحت للشمال.

النظر لتحت بيعكس مشاعر وأحاسيس معينة، وخصوصاً لو ناحية الشمال (جهة القلب).

أما الرمشات ليها  حكايات تانية. لو الشخص بيرمش كتير بسرعة، ده بيكون إما حب أو خوف، وده بسبب إفراز مادة زي الأدرينالين اللي بتزيد مع المشاعر القوية. اللي بيكذب بيحاول  يقلل رمشاته عشان ما يتفضحش، والعكس صحيح لو الشخص بيفكر كتير، هتلاقيه بيرمش أكتر.

لو الرمشات طويلة، ده معناه ملل، وكأن العين زهقت. ولو كانت قصيرة جداً، ده بيكون دليل على الحب أو الإعجاب.

وعلشان كده كوكب الشرق قالت: “يصعب عليا رمشة عنيا ولا حتى ثانية”، يعني الحبيب مش عايز يغيب ولا لحظة.و كان العين رافضة غياب الحبيب عنها .

كمان حجم النني له دلالة؛ لما بيوسع، ده معناه إن الشخص مهتم بالكلام اللي بيتقال. ولو بيصغر، فده دليل على العكس.

أما الحاجب، فبيكشف أسرار تانية. لو الحاجب اترفع، ده معناه اندهاش أو استغراب. لو اترفع مع سؤال، ده دليل على إن الشخص عارف الإجابة. ولو حاجب واحد اترفع، ده بيكون تشكيك أو انتظار للموافقة بعد نقاش. ولو الحاجبين نزلوا، فده غضب أو تعالي.

في الآخر، العين ليها لغة خاصة، وكلها “من نظرة عين”. زي ما الشعر العربي لخص الموضوع زمان:

“أشارت بطرف العين خيفة أهلها

إشارة محزون ولم تتكلم

فأيقنت أن طرف العين قد قال

أهلاً وسهلاً بالحبيب المتيم”

و اللبيب بالإشارة يفهم .

المزيد: الحب في زمن التواصل الإجتماعى ..مشاعر وأحاسيس مختلفة