الفنان [ كريم عبد الخالق ] ؛ مغلوب علي آمري في مسلسل [ حضرة العمدة ]
أجري الحوار : عمر آدم .
إعداد صحفي : نورهان هاني ، رحمة حسين .
لمشاهدة الحوار فيديو 👇🏻👇🏻
إحكيلنا أكتر عن دور عبيده في مسلسل حضرة العمدة ؟
عبيده هو من عيله السنانيه في قرية تل شبوره هو شخص فلاح و طيب و بيحب أخته جداً و ولاءه ليها في كل الأوامر مش بيكسرلها كلام ، مغلوب على أمره ، و ينفذ قرارات شقيقته الكبرى شلباية التي تجسدها الفنانة [ وفاء عامر ] و التي تتحكم في كل الأمور و تدخل فى صراع مع صفية عارف الفارس التي تجسدها النجمة [ روبي ] ، بسبب العمودية في قرية تل شبورة ، و هي قرية ليست حقيقية لكنها واقعية جدًا .
في الحلقه الأولي من حضرة العمدة اتسلط الضوء بشكل بسيط علي نقطة موجوده في المجتمع الريفي لكن دلوقتي أقل لكن لسه موجوده و هي إن المرأة تتولي دور قيادي هنا السؤال إيه رأيك في إن المرأه تكون مديرة أو عمدة ؟
اه طبعاً أنا شايف إن الست ليها دور فعال و مهم يعني إحنا شوفنا ستات كتيرة واخده مناصب مهمه و مسئوله في مصر و بره مصر فأكيد أنا مع الموضوع ده جداً .
إيه التحديات اللي كانت قدامك إنك تعملها عشان تحقق الشخصية المطلوبة ؟
أنا كنت حاطط حاجه معينه في شخصية في دماغي كنت هعملها بشكل تاني بس أستاذ [ عادل أديب ] هو السبب في إني أغير مسار الشخصية تمام و عملته بالشكل اللي هتشوفوه على شاشه و إن شاء الله يعجبكم .
إحكيلنا شوية عن الكواليس و عن طبيعة الأجواء بين صناع المسلسل ؟
الكواليس من أروع الكواليس اللي إشتغلت فيها وكل صناع المسلسل بيتمنوا الخير لبعض بالذات الأستاذة [ وفاء عامر و محمد مهران ] بالذات إن معظم شغلي معاهم و الأستاذة [ وفاء عامر ] كانت دايماً بتنصحني و تقولي أعمل إيه و معملش إيه .
كنت شايف إنه دور صعب إتحديت نفسك فيه ؛ و لا كان دور سهل بالنسبالك و عملت دور مشابه ليه قبل كده ؟
هو بصراحه الدور كان بالنسبه ليا في الأول كنت محتار جدا أعمله إزاي أو شكله هيبقى عامل إزاي بس أستاذ [ عادل أديب ] ربنا يبارك له يعني هو السبب في إن أنا أغير كمان مسار الشخصية تماماً للشخصية الي أستاذ عادل حطها في دماغه أو شايفها إن هو هيبقى عامل كده في المسلسل يعني فالحمد لله كنت في الأول خايف بعد كده الدنيا من أول مشهد وحطيت رجلي قدام الكاميرا في المسلسل فأنا خلاص بقى الموضوع بالنسبه ليا مريح جداً وقدرت أشتغل بأريحيه كبيرة جداً .
دي تاني مره تشتغل مع المخرج [ عادل أديب ] بعد مسلسل [ نقل عام ] هل هو اللي رشحك للمسلسل المره دي ؟ و هل كان هو السبب الرئيسي عشان توافق ع الدور ؟
اه دي ثاني مره أشتغل مع أستاذ [ عادل أديب ] و بصراحه أكن ليه كل الفضل و الإحترام يعني ، و إن هو السبب إن أنا أبقى موجود هو و الشركه المنتجة ، أستاذ [ ريمون مقار ] هو السبب إن أنا أبقى موجود في المسلسل و بصراحه أنا مرتاح جدا مع الأستاذ [ عادل أديب ] في الشغل و شركة فنون مصر دي بيتي يعني أستاذ ريمون مقار ده الأب الروحي لينا كلنا لكل الشباب اللي طلعوا في المسلسلات اللي موجودين دلوقتي كمان معظمهم هو السبب إنه بعد ربنا إنه يبقى ليه الأبرهاند ( اليد الكبرى ) في الموضوع ده يعني فأنا من هنا بشكره بشكر أستاذ ريمون مقار و بشكر استاذ عادل أديب .
هل في كلمة حضرتك حابب تقولها أو توجهها لجمهورك ؟
أحب أقول لهم إن كل الدعم اللي أنا شفته من أول ما بدأت لحد النهارده هما السبب فيه و هما السبب إن يبقى في حد إسمه كريم عبد الخالق موجود في السوق ، و أي حد تعب نفسه وإتفرج عليا و دخل شكرني بكلمه فأنا بقول له شكراً ، وإن شاء الله لسه في أكتر أنا ما عملتش حاجه يعتبر أنا ما عملتش حاجه فاستنوا حاجات أحسن و أقوى بإذن الله و طول ما أنتم بتدعموا الواحد و واقفين في ضهره الواحد هيقدم أكتر من كده بكتير إن شاء الله ، و بقول لهم كل سنه وأنتم طيبين بمناسبه رمضان و رمضان كريم على كل الأمة العربية و الإسلامية ، و ده طبعا توفيق يعني ربنا في الأول مش عايزه أقول كلام بس طبعاً ده توفيق من ربنا في الأول و الآخر و طبعاً الناس اللي بتدعمك و بتقف وراك و بتدور عليك و عايزة تعرف إنت بتعمل إيه فا ربنا برده في الأول يعني أنا مش عايز أغفل حاجه زي دي خالص فا ربنا ثم ربنا ثم ربنا في إن أنا أبقى موجود طبعاً و الناس اللي بتدعمني ، و الجمهور اللي داعم لينا .
