المحترف الصغير “صانع الدُمى”
حوار/ساره عادل
أحمد أسامة .طالب بالصف الثالث الإعدادى. لم يتجاوز عمره الأربعة عشر عاماً. لديه مشروعه الصغير الذى يستغل به أغلب أوقات فراغه بجانب دراسته.
تعالوا معى لنتعرف على نجماً مضيئاً فى عالم النشئ الصغير. 
*إيه هو فن صناعة الدمى ؟
إسمه “أميجرومى” وهو فن يابانى الأصل معناه صناعة الدُمى المحشوة بالكروشيه. وهو فن بيعتمد على غرزة أساسية من غرز الكروشيه. 
*إزاى بدأت موهبتك؟
وأنا صغير كنت بشوف ماما طول الوقت بتغزل بالكروشيه وكنت مندهش إنها بتقدر تحول شلة من الخيط ملهاش أى ملامح للكلوك أو مفرش.. وبدأت أطلب منها تعلمنى ومرة فمرة عرفت معظم الغرز وأتقنتها. 
*ليه إخترت الأميجرومى ؟
كنت بحب أفتح اليوتيوب واتعلم منه. وبدأت أول شغل أما أختى طلبت منى أنفذ لإبنها دبدوب بالكروشيه. وبالفعل مشيت بالخطوات ورا ڤيديو أسبانى ونفذته.. طبعاً مكنتش فاهم اللغة لكن اتعلمت من حركة اليد. 
*إزاى بتسوق شغلك؟
بقوم بتسويق شغلى من خلال البيدچ الخاصة بيا على الإنترنت وبعتبره مشروعى الصغير.
*إيه الصعوبات اللى بتواجهك كصانع دمى؟
الخامات فى مصر غير متوفرة فبضطر أشتريها أونلاين بأسعار غالية. والناس لسة مبتقدرش الهاند ميد كما يجب أن يكون. 
*طيب إيه مدى قيمة قطعة الأميجرومى؟
لإنها هاند ميد بتكون النسخة الوحيدة فى العالم للشخص اللى بيملكها وعشان كده بتكون غالية بعض الشئ.
*مين أكتر شخص ساعدك تنمى موهبتك؟
ماما علمتنى وبابا تكفل بمصروفات الكورسات اللى حصلت عليها عشان أنمى موهبتى. 
*كولد بيشتغل كروشيه متعرضتش للنقد من أصدقاءك أو المحيطين بيك؟
أصدقائى بيشجعونى وأحياناً كتير أما بخرج بمارس هوايتى فى المترو أو المواصلات والناس بيشجعونى وبعضهم طلب منى شغل.
*إيه هى أحلامك كصانع دمى؟
بحلم إن أنواع الخيوط اللى بستخدمها يكون مكتوب عليها “صنع فى مصر” ،ونفسى بعد خمس سنوات أكون أشهر فنان عالمى..ويكون عندى فريقى من الأولاد والبنات اللى بينافس شغل المحترفين الكبار. 
*رسالة أخيرة تحب تقولها ؟
الكروشيه فن للأولاد والبنات ومش مقتصر على البنات بس.
