“المسرحيه” قصيده جديده للشاعره دعاء غويل

وقف الجبان علي روحها بيصيد العيال
كانت بتنزف مالوجع و الروح بتلفظ نفسها
المسرحية بتبتدي
والضلمه سيد
و الزحمه عيد
الحاشيه بتقود الصفوف و بيهتفوا
عاش الملك
أتجمعوا
يا عبيد بتعشق للركوع
يا أيدين بتشحت حلمها
يا عيون بتكسر نفسها
فرعون
هناك
علي بعد عين
لو تطلبوا منه الأمان تلقوا الأمان
والجوع ما يعرف ليك مكان
و كروش كتير راح تتملي
وإن كان دا مش عاجب سعادتك أتلهي
و بوس أيديك ولا انت مش بتشوف عينيك
ماتكونش عايز تبقي زي الدوله ( س )
” أستغفر الله العظيم ”
و يا تقبل الذل يا المهان
أدي الحمل و أدي اللجام العتب علي الجمال ولا الجمل
قالك نظام
ممنوع كلام
لو تعترض
أو تنفلت بره المدار
و تكره القيد و الحصار
وتحن لحظه لأنتصار
تاخد قرار و بدون قلق
و تقوله ” لأ ”
ملعون أبوك و بأي حق
يا خوف معشش قلبنا
ركعوا العبيد
وانا زيهم
والخيبه فينا و مننا
ممنوع تقوم أو ترتفع
و أياك تفيد أو تنتفع ركعنا و ياريت كان شفع
لو كان في خير ما كان نفع
الأرض مش حمل الولاد و لا عندهم
ولا أنت قد الريح يا واد و لا قدهم
مدوا الموائد من بلاد لبلاد و بياكلوا لسه في لحوم بعضهم
افتحلهم روحك سبيل
وارهنلهم وطنك مشاع
” وان جالك الموت يا ولدي ” اوعاك تموت
الناس دي ما بيخرجوش للدم ما بيحرجوش عالعرض ما بيموتوش للأرض
الناس دي يا بني جواع زي البهايم أو اقل بل و اضل ما بيطلعوش غير جاعوا
وان خافوا طاعوا
و لا يؤمنوش بالضل وان حتي شافوا الضل
ما بينشروش العدل و لا ينصروش أنسان
و الناس دي مش أخوان مع أنهم أخوان
” ان جالك الموت يا بني ”
أوعاك تفوت جسمك وجبه لديدان
مش كل من مات لأجل البلد دي شهيد
ولا كل من عاش في البلد دي جبان
طل الملك و بنظره خاطفه علي الجموع
ميل علي سعاده الوزير
قالك كتيررررر
في رؤوس كتير
ان فهموا ثاروا وان ثاروا في رؤوس تطير
قاله الوزير
فرق تسد جوع تسود
كل مالغنم أكل الأسود
ان جاعوا خافوا
وان شبعوا أمنوا
وان أمنوا ثاروا
وان ثاروا امنوا
أضرب تلاقي و أطعم تعيش
الحاشيه فل وورانا جيش
العدل مال
والناس جمال
ومافيش قانون من غير سؤال
كتروا العبيد زود حرس
زادوا الرقاب و سع سجون
الدايره بتضيق وبجنون
والناس بتنزف صبرها
و الناس بتاكل بعضها
و انا زيهم
باكل
دقوا الطبول
هاتفوا الحرس
كل العبيد جالهم خرس
السجن للصوت و النفس
و بكره يشبه للأمس
ظهر المدان
و سط الميدان
كل الجموع أتفرقت مؤيدين و معارضين و مفكرين و معرضين و مشتتين و مشتتين
ال قال بطل
وال قال عميل
قالك سكات
عندك طلب
او امنيات
سرقوا الأغاني و النايات
حبسوا النغم جوا الألات
ورغبة في الموت هبتسم
وان كان بدون قلب الوطن
بأيه تفيد الأمنيات ؟
و العمر مغصوب عالشقا
في حد شد المشنقة
والتهمه حب الزقزقه
في بلاد الحلم فيها خطر
والصوت خطر
والحب خطر
بيخافوا فيها الغني و السير في المطر
بيخافوا فيها الحرف و اللي سطر
مستني ليه تسمع غني العصافير علي فروع الشجر؟