المشروبات السكريه في مقدمه مصائب القرن العشرين

كتب محمد بريك
صيدلي مهتم بالتغذية الصحية
منذ زمن بعيد الشركات في حرب مع الهيئات الصحية وبعد سنين وضعت قوانين كثيره تقلل من التدخين و تقننه في سن معين و اماكن معينة.

الأكاديمية الأمريكية لطب الاطفال AAPو الجمعية الأمريكية لأمراض القلب AHA اصدروا بيان مهم جدا
قاموا بمنع و تقنين مصيبة من مصائب القرن العشرين الصحية

المشروبات السكرية
المشروبات الغازية ، مشروبات الطاقة ، العصائر المحلاة ، الالبان المحلاة
كل المنتجات دي بيطلق عليها Sugary drinks

اسمحولي اسميها المشروبات الكارثية و هنعرف دلوقتي ليه

٤٠ الف امريكي بيموتوا كل سنة بسبب امراض القلب الناتجة مباشرة من الافراط في تناول المشروبات الكارثية

و الطفل او المراهق الأمريكي بيشرب فوق ال١٠٠ لتر مشروبات كارثية سنويا ، اكتر شوية من بانيو الحمام و بياخد تقريبا اكتر من ١٥ كيلو من السكر المضاف من المشروبات دي بس

البيان كمان بيوضح الزيادة الكبيرة في عدد الأطفال والمراهقين المصابين بالسمنة ، السكر ،ارتفاع الدهون وضغط الدم

الدليل العلمي لا يقبل الجدل ، المشروبات السكرية سيئة جدا على صحة الأطفال والمراهقين و المشكلة ان اعلانات المشروبات دي موجهة للمراهقين و مفيش يوم بيعدي بدون ما الطفل او المراهق يشوف على الاقل اعلان للمشروبات المضرة بصحته

الشركات صرفت في 2009 بس ٣٩٥ مليون دولار في الدعايا للمشروبات دي عند المراهقين و الكارثة ان اغلب الانشطة و البطولات الرياضية بتبقي تحت رعاية المشروبات الكارثية دي

دكتور كايلي ياسودا رئيس الأكاديمية الأمريكية لطب الاطفال بيؤكد ان التدخل دلوقتي لمنع مشاكل المشروبات السكرية مشابه للتدخل اللي حصل زمان مع السجاير

الخطوات اللي اوصي بيها البيان هي

١-فرض ضريبة علي المشروبات الكارثية ( دي احنا سابقينهم فيها) و تروح المبالغ دي لتوفير بدائل زي الميه و الالبان في اماكن استهلاك المشروبات السكرية

٢- تقليل الاعلانات و التسويق خصوصا الموجهه للاطفال و المراهقين

٣-المشروبات المفيدة زي المياه و اللبن تحل محل المشروبات الكارثية في قوائم الطعام و وجبات الاطفال

٤-وضع التحذيرات و المعلومات الغذائية علي المشروبات و التحذير من زيادة استخدامها

المشروبات السكرية من اسوء الخيارات الغذائية و للأسف منتشرة جدا و العروض الترويجية و التسويق كله رايح ناحيتها

العالم بدأ يفهم و يتحرك عشان يوقف خطر المشروبات الكارثية دي خصوصا في الأطفال و المراهقين

قبل امريكا بريطانيا عاملة خطة من ضمنها منع العروض الترويجية علي المنتجات دي و منع سياسة ال refill او اعادة ملئ المشروبات السكرية في المطاعم

ابتدي من النهاردة مع نفسك و اولادك
حاول تقللها قد ما تقدر
اطلب ميه مع اي اكل
بلاش بيبسي او عصير
بلاش لبن محلي مليان سكر
بلاش نبوظ صحة اطفالنا و ندخلهم في مشاكل صحية تضايقهم طول حياتهم

البيان الصادر عن الأكاديمية الأمريكية لطب الاطفال بالتعاون مع الجمعية الأمريكية لأمراض القلب عن المشروبات الكارثية
https://www.usatoday.com/story/opinion/2019/03/25/higher-taxes-sugary-drinks-improve-kids-health-pediatricians-column/3260988002/
مقالة بتلخص البيان
مع مقالة بتلخص البيان
https://pediatrics.aappublications.org/content/early/2019/03/21/peds.2019-0282
نص البيان بالكامل
فيديو لرئيس الأكاديمية الأمريكية لطب الاطفال بيتكلم عن الموضوع
و صورة بتوضح كمية السكر المضاف في كل مشروب كارثي من المشروبات دي