اليبدیما «الوزمة الشحمية» مرض حديث أم مرض قديم .. أثار جدلا بالأوساط الطبية ؟!!
اليبدیما «الوزمة الشحمية» مرض حديث أم مرض قديم .. أثار جدلا بالأوساط الطبية ؟!!
بقلم: رؤى مصطفى
اليبدیما أو الوزمة الشحمية .. كم مره سمعتى واحده بتشكو إنها مهما إتبعت أنظمة غذائية ومارست رياضة جسمها بيخس من فوق لكن الدهون متراكمه بشكل سىء فى النصف السفلى للجسم؟؟ إنها اللبيديما.
عزيزتي، لو جسمك بيخزن الدهون بشكل غريب في الجزء السفلي—يعني رجلين وأرداف ومن غير سبب واضح—ومهما بتعملي دايت أو رياضة الدهون دي مش بتنزل، ممكن تكوني مش بدينة… ممكن تكوني مصابة بـ مرض اللبيديما، وده مش شائع لكنه مش نادر!
إيه هو مرض اللبيديما؟
اللبيديما هو مرض مزمن بيصيب تقريبًا 11٪ من النساء فقط، وبيتميز بتراكم غير طبيعي ومؤلم للدهون في النصف السفلي من الجسم (زي الأرداف، الفخذين، الساقين)، وأحيانًا في الذراعين. بيبدأ غالبًا وقت البلوغ، الحمل، أو انقطاع الطمث،مع إستخدام أقراص منع الحمل—يعني أوقات فيها تغيرات هرمونية.
بس هو مش سمنة؟
ده السؤال اللي كل ست بتتسأله، للأسف حتى من أطباء. الفرق إن السمنة بتأثر على الجسم كله، والدهون ممكن تقل مع الأنظمة الغذائية. لكن في اللبيديما، الدهون بتتراكم بشكل غير متناسق، ومابتروحش بالرياضة ولا بالدايت، وغالبًا بيكون في ألم واحتقان في الرجلين، وسرعة في ظهور الكدمات، وفى كثير من الأحيان تصاب المريضة بالإكتآب.
المشكلة إن التشخيص بيتأخر!
كثير من الستات بتعيش سنين وهي فاكرة إنها كسولة أو مش ملتزمة برجيم وإن التكتلات دى مجرد سيلوليت هى أهملته، وده بيدمر ثقتها بنفسها. لكن لما تعرفي إن ده مرض حقيقي وليه حلول، ده بيفرق 180 درجة.
طيب، أعمل إيه؟
1. التشخيص السليم: أول خطوة الذهاب لطبيب فاهم في الأمراض الليمفاوية أو دكتور تجميل متخصص.
2. العلاج مش دايت بس: في طرق زي:
-الجوارب الضاغطة لتحسين الدورة الليمفاوية.
-العلاج الطبيعي وتصريف السوائل يدويًا (المساچ) .
-التمارين البسيطة زي المشي والسباحة، لأنها بتساعد في تحسين الدورة الدموية.
-في بعض الحالات الشديدة، ممكن يتم اللجوء لشفط الدهون بطريقة طبية مخصوصة لمرضى اللبيديما.
3. الأكل مهم طبعًا!
التغذية بتفرق، مش عشان تخسي، لكن عشان تخففي الالتهاب وتحافظي على نشاطك ونشاط الدورة الدموية، وتصريف السوائل . قللي السكر والمقليات، وزودي أكلات مضادة للالتهاب زي السمك، الخضار الورقي، والفاكهة.
بس لحظة! فين كبسولة الڤيتامين؟
كبسولة ڤيتامين النهاردة بتقولك: “مفيش حاجة اسمها كسلانة، في حاجة اسمها جسمك بيصارع لوحده وانتِ محتاجة تدعميه مش تعاقبيه”.
وأخيرًا…
لو بتلاحظي إنك بتتغيري من تحت لفوق، مش بالعكس، لو عندك ألم في رجلك رغم إنك مش مصابة بدوالي، أو لو رجلك حجمها بيكبر في البنطلون بس الوسط بيقع… افتكري إن اللبيديما مش عيب، ده مرض لكنه محتاج وعي وتشخيص صح. وجسمك يستحق الفهم مش العقاب.
كاتبة المقال
أستاذة/ رؤي مصطفي
