انا وعائلتى فى رمضان

◾قبل رمضان بأيام قليلة يتصل ابى على الهاتف ويدور بيننا حوار طويل وممتع مليئ بالضحك والمحبة والفرحه ويقدم لى ولأسرتى التهنئة بمناسبة شهر رمضان وفى نهاية الحوار يذكرنى ابى متنسوش معادنا اول ايام الشهر الفضيل عشان نفطر سوى.

◾كانت هذه عادة ابى كل سنه منذ ان تزوجت ، ان نتجمع على مائده الفطار اول يوم فى شهر رمضان ، بصراحة كان احلى يوم بالنسبالى ، اروح لماما من الصبح بدرى عشان احضر معاها الفطار والحلويات ونقعد انا ومامتى حببتى نحضر كل ما لاذا وطاب من انواع الاكل اصل كلام بينى وبينكم بابا كانت ايده فرطة حبتين يحب يجيب كل حاجة بذياده قوى.

◾ كنت ببقى سعيده جدا اسعد بنوته فى العالم فى اليوم ده كنت ببقى عملة ذى الطفله فرحانه عشان شهر رمضان فرحانه بلمة بابا وماما واخواتى وزوجى واولادى فرحانه مش عرفة ليه يمكن عشان الطعام في شهر رمضان ولمة العيلة ليها مذاق خاص يمكن عشان روحانيات رمضان غير كل الايام المهم انه كان يوم مميز بالنسبه لى ، و بعد اذان المغرب نتجمع على مائدة الفطار والله كانت احلى لمه بابا وماما وزوجى واخواتى واولادى يااااااااه كانت ايام جميلة كلها فرح وسعاده ومش شايلة للدنيا هم .

◾ وعشان الايام الحلوه عمرها قصير ، اتوفت ماما حببتى ، القلب الابيض القلب الكبير الى بتحب تساعد الكل الغريب قبل القريب كانت ست لاكن من غير مبالغة ست بميت راجل ست تسد فى اى شئ ماما هى حب بابا الكبير الى عاش على ذكراها وكل لما تيجى سرتها امامه يبكى .. رحمة الله عليها ودى كانت الصدمة الاولى فى حياتى

◾ولحسن حظى انا واخواتى ان بابا كان اعظم واحن واطيب قلب كان انسان قريب من ربنا بشكل كبير لمنا حولية وبقى لينا الاب والام والصدر الحنين وفضل محافظ على طقوسنا الرمضانية ان اول ايام رمضان لازم نتجمع معاه كالعاده ، انا واخواتى و اولادنا ونفطر سوى
الى ان توفاه الله وكانت دى تانى صدمة فى حياتى ، كنت بحس ومن غير مبالغةان كل شئ حلو بيمر فى حياتى ناقص لان وجود بابا وماما فى حياتى كان هو الحياه بالنسبالى.

◾ بعدها حسيت انى عجزت بدرى راحت الايام الحلوه والاهل الطيبين الحنينين الى عمرهم ما هايتعوضوا ، لاكن بابا وماما عرفوا يربونا كويس قوى ، وكبرنا واحنا اخوات بنحب بعض ونقف جمب بعض فى كل احولنا المعيشية عصبة ايد واحده ربنا يبارك فى لمتنا

◾اول رمضان بعد فاة بابا
لقيت اخى بيتصل عليا وقالى ماتنسوش الفطار اول يوم رمضان عندى بكيت وضحكت فى نفس والوقت ، وتجمعنا انا واخواتى واولادى واولاد اولادى فى بيت اخى اول ايام رمضان وبقيت عاده اخدها اخوية عن ابى رحمة الله عليه حتى الان اول يوم لازم نتجمع و نفطر فى بيت اخى

◾وتتوالى العزومات طول الشهر فى منزل اخى الثانى ثم فى البيت عندى ثم فى منزل اختى ، وفى تلك الايام الى بنتجمع فيها نتذكر ابى وامى وحبهم الكبير لبعض واذاى كانوا ضهر وسند لبعض ونحكى لاولادنا عن النوادر الى كانت بتحدث بينى وبين اخوتى فى رمضان .

■ اول ايام رمضان بالنسبة لاولادى واولاد اخوتى بمثابة عيد ليهم بيلعبوا وبيفرحوا بهذا التجمع وبنقضى فيه وقت ممتع جدا وكلام بينى وبينكم احنا كمان بنجرى و بنلعب معاهم ولااا كمية الصواريخ الى بنفرقها بعد الفطار يااااااه فعلا يوم جميل جدا وبنقوى فيه صلة الرحم ما بنا ، يارب عاده متتقطعش العمر كله.

◾رحم الله ما كانوا سبب فى تجمعنا هذا
{رحم الله أبي وامى وصبحهم بجنة عرضها السماوات والأرض}
{ربى ارحمهما كما ربيانى صغيرا}
‎