انا يوم ما اروح بقلم “غرام”

أنا يوم ما أروح
عاوز وداع من غير كلام ولا أي نوح
أنا يوم ما أروح
اذكروني بدعوة صادقة تلئم جروح
وماتزعلوش عاللي بيمشي
أصل كله له ميعاد يوم حيمشي
طب هو يوم العرس برضه
حد يزعل عالعروسة أو العربس
هي بس بتبقى ذكرى
أكيد جميلة وماتتنسيش
أصل الحكاية بسيطة جدا
لاهي فلسفة ولا عاوزة شرح أبدا
دي كانت فترة اختبار
واللي عليك كان بس الاختيار
على قد فهمك وإيمانك
انت بتحدد مكانك
أوعى تغرك يوم حياة
حتى لو بنفوذ وجاه
وافتكر إن الكفن مالوش جيوب
وإن دي فرصتك تلحق تتوب
ده اللي خلق لك دنيتك
قادر في لحظة يسكتك
ويبقى يومك يوم دفنتك
باديء حياتك في آخرتك