انتبهوا ولا تفسدوا لحوم الاضاحي.
كيف تحافظ على لحم الاضحية؟
في كام نقطة كدا هانشرحلك ازاي تحمي لحوم الاضاحي من الفساد السريع حتى انها ممكن تبوظ يوم الذبح
1-مش هافكركم ان لحمة الاضحية ممكن تتحسد وان من دواعي الحسد ترك الدعاء بالبركة ..فسألوا الله ان يبارك لنا في لحوم اضاحينا ويحفظها من الفساد
2-اختار جزار محترف بلاش انت وبلاش كل اللي بيكتفوا البقرة او الجاموسة يقعدوا يشفوا مع الجزار لان كتر الايادي بتزود التلوث واحتمال الفساد..كفاية الجزار وصبيانه..ولازم نفكره بأنه ميفصلش الراس من الدبيحة علشان يديها فرصة ترفص وتنزل تلتين الدم اللي فيها علشان الدم فيها بيكون سبب من اسباب الفساد السريع
3-قبل الذبح هاتجهز اكياس تلج ..وليمون ..وحصيرة بتاعة زمان وملاية سرير مستغني عنها.وكيس ملح .وهاقولك ليه دلوقتي
4-هاتجيب الحصيرة تفرشها ع الارض وعليها الملايه ..وكل ما الجزار يشفي حته هاتحطها على الملاية وترتب اللحمة جنب بعضها مش فوق بعضها في طشت او طبق بلاستك كبير ….لان دا بيكتم اللحمة وهي سخنة.وطبعا الجو حر ومفيش اكسجين تقوم يظهر لها ريحة بسرعة ..انما طريقة الملاية والحصيرة بتخلى الدم والسوائل اللي بتنزل من اللحمة تنزل ع الارض مش لازقة ف اللحمة ومنغنغة بالدم اللي هايكون برضه سبب الفساد وطبعا برضه غلط كبير اني افرش مشمع كبير وعرفنا ليه..
5-هانجيب كل المراوح اللي عندنا مش مروحة السقف وبس لانها لوحدها مش كفاية ونسلطها على اللحمة اللي على الملاية علشان تبرد بسرعة
6-ممكن نجيب اكياس التلج ونحطها على اللحمة بكيسها علشان متخرش ميه ع اللحمة بس مش كتير بحيث هوا المروحة لما يعدي ع التلج يبرد ويبرد اللحمة ..وممكن احط بعض اكياس التلج تحت الملاية اللي ع الحصيرة او تحت الحصيرة
7-الكبدة تطلع وعلى التلاجة ع طول علشان مبتستحملش او احط تحتها وعليها كيس تلج
8-الكرشة والممبار بمجرد ميطلعوا نفضي اللي جواهم وتتغسل بسرعة وبعدين نحطها على طول في جردل ميه وعليها تلج ويفضل اعصر فيها ليمونتين بس وطبعا الكرشة ف جردل والممبار في جردل
9-كيس الملح هاترش منه كل شوية على الاورمة اللي الجزار بيقطع عليها كنوع من السيطرة على نمو البكتيريا ف اللحمة
10-نيجي بقى للنقل هاحط قماشة ف الشوال لو بلاستيك واكياس تلج ف الاول وبعدين لحمة ويبقى طبقة تلج وطبقة لحمة ..وف الاخر تلج
11-اول موصل البيت ياريت تتحط ف الديب فريزر الاول تتبرد شوية متهوية عن بعضها مش علي بعضها وبعدين افرق ولو مفيش امكانية “”يبقى التفريق بمنتهى السرعة علشان الجو حر وكل اللي مرضيناش نخليه يشفي هايروح يوزع بسرعة
12-من السنة اللي فاتت بنقول بلاش تفريق ف الاكياس البلاستك ونرجع تاني لورق اللحمة بتاع زمان ولو مالقيناهوش نجيب ورق عادي من عند بتاع الورقيات ..وعاوزكم دايما تفتكروا ان اللي بيبوظ اللحمة حاجتين مهمين هما الحر وكتم الهوا عن اللحمة فطول الوقت بقدر الامكان احافظ على التهوية والبرودة
ملحوظة::الناس اللي كانت بتوزع ف الاكياس وطبعا بتكتم التهوية عن اللحمة مع الحرارة كانت ممكن تشوف دم اسود ف الاكياس …لما اشوف الدم الاسود اعرف ان اللحمة بدأت تبوظ حتى لو مطلعش لها ريحة لسة..
12-اختم كلامي بالسلام عليكم ورحمة الله وبركاته وكل عام وانتم بخير وعيد سعيد علينا وعلى امة محمد اجمعين ..
تقبل الله منا ومنكم صالح اﻷعمال ..
