اول حب فى حياة النجمة زينات صدقى

الحب فى حياة زينات صدقى

كتبت / غادة العليمى

اول مرة تعرف زينات صدقي يعنى ايه حب .. كان عندها 13 سنة .. ووقتها وقعت فى غرام تلميذ نجيب أكبر منها بكام سنة.. واتعود أنه كل يوم الصبح يستناها فى الشارع اللى فيه المدرسة فى الانفوشي ومعاه الفطار .. وهى رايحه مدرستها

وكان الفطار عبارة عن حتة بسبوسة بنكلة العملة الموجودة فى عصرها

واثناء رجوعها يقف تانى وهى خارجة من المدرسة  يستناها بس من غير بسبوبسة .. لأن وجبة الغدا كانت عبارة عن لب وسوداني وسميطه وورقة فيها دقة..

ويوم بعد يوم زادت اللقاءات وتوسعت وبدأ الحبيب ياخد محبوبته فى جولة على الكورنيش.. وبعد ما اكتشف أن زينات بتتعب من المشى وبتقلع جزمتها وتمشى حافية على الكورنيش .. بقي يوميا يجيب معاه جورنال.. مش علشان يقراه لا سمح الله.. لكن علشان لما زينات تقلع الجزمة يلفها فى الجورنال علشان يحافظ عليها..

فضلت اللقاءات تتكرر والجزمة تتقلع والورق يتفتح ويطلع منه بسبوسة ودقة ولب وسودانى شهر وراء شهر لحد ما الزمن قالت كلمته ..

وراح كل واحد فيهم فى اتجاه .. ومرت سنين كتير بقت فيها زينات من النجمات الشهيرات وتصورت ان الموضوع خلص.. لكن فى يوم وهى ماشية فى الشارع ..واحد وقفها وقالها مش فاكرانى ؟.. فبصت شوية وبعدين قالت : لا مش فاكرك؟

كان الحبيب القديم فى الزمن الجميل اول حب فى حياة زينات صدقى وسر من اسرار شبابها اللى باحت بيها قبل رحيلها رحمة الله عليها