( بالعامية كلمتين من الاخر )
بقلم الاعلامية الدكتورة/ رشا الجندي
الناس اللي كبرت ونضجت بدري بدري لدرجة انها من كتر نضجها اللي حواليها ممكن ينسوا عمر الناس دي الحقيقي .. الناس دي شافت كتير اوي في حياتها بدري بدري والنضج بتاعها ما جاش بالساهل ،، الناس دي ممكن تكون اتغربت كتير، او طلعت للدنيا لقت مسؤوليات مش بتاعتها ولكن انسانيتها خلتها ما تقولش وانا مالي وده في الوقت اللي ناس كتير بتمل وتقرف وتخرج عن شعورها بسبب مسوءلياتها الاساسية 😒 تخيل بقا 😒 ، الناس اللي نضجت بدري دي ممكن تكون فعلا فاتحة بيوت من وهي في سن هي اللي المفروض يتصرف عليها فيه وما تشيلش هم ل اي حاجة ف الدنيا ، الناس دي ممكن يكون اتفرض عليها تشيل مسؤوليات ناس هم اللي المفروض يشيلوا مسؤولياتها او…او….. الخ ،، الناس دي ممكن تلاقوها اخر ناس ممكن تشتكي ، وفي عز همومها بتضحك وتضحكك عشان هم بيستمدوا طاقتهم اللي هايكملوا بيها من ضحكتك ،، لان هم مكملين برحمة ربنا مش اكتر وعشان انت تكون سعيد ،، الناس دي ممكن تكون في وظيفة مرموقة ولكن مسؤولياتهم اكبر من راتب الوظيفة فبيسعوا طول الوقت ويشتغلوا حاجات اضافية عشان يزودوا دخلهم بشرف ، وممكن يكونوا في وظيفة مرتبها عالي وكمان ييجي عليهم وقت كتير ما يكونش في جيبهم جنيه واحد لان كل مرتبهم رايح على المسؤوليات اللي ممكن كمان تكون مش بتاعتهم بس انسانيتهم منعاهم انهم يقولوا وانا مالي !! لان المسؤوليات اتعشمت فيهم خلاص ،، وانت عمرك ما هاتحس ب كده بالعكس انت هاتشوفهم انهم وااااو ، لان المواقف اللي مروا بيها في حياتهم علمتهم حاجات كتير اوي لسه بدري انك توصلها ..
الناس دي مرات كتير اوي بيتمنوا انهم يحسوا ولو مره انهم مسوءولين من حد ، وبيتمنوا كتير يحسوا انهم ليهم اصحاب بيفهموهم ،، الناس دي ممكن تلاقيها بتطبطب عليك في مشكلتك اللي ما تجيش واحد على مية من مشكلتها بس انت مش عارف عنها حاجة وانت تقول جواك انهم ( عبده الرايق ) ،، 😒 الناس دي انت لو عيشت ظروفهم ممكن تتكسف من نفسك اوي على انك شايف ظروفك صعبة ،، وقتها بس هاتعرف اد ايه انت متدلع ، واد ايه هاتتكسف من نفسك بجد انك قولتلهم كلمة وحشة في يوم من الايام او حملتهم فوق طاقتهم او ما قدرتش قيمتهم ..
الناس دي بيتمنوا كتير لو يلاقوا حد في سنهم بس يكون ناضج زيهم لان اغلب اصحابهم هاتلاقيهم اكبر منهم بكتير فظروفهم مختلفة عنهم مش بسهولة هايقدروا يقابلوهم او يشاركوهم اهتماماتهم وانشطتهم فبيحسوا بالوحدة وهم حواليهم ناس كتيييير ،، وانت تشوفهم من بعيد ويتهيألك انهم واااااو .. الناس اللي نضجوا بدري بيعانوا كتير وما حدش بسهولة ممكن يحس بيهم .. الناس دي بيكون جواها براءه حلوة لان النضج علمهم ان اجمل ما في الحياة هو الحفاظ على البراءة مهما كانت الضغوط ،، فانت بتحتار كتير فيهم هل هم ناضجين ام اطفال ؟ ام شباب ؟!!! الناس دي اما بييجوا يختاروا شريك حياة بيتعبوا اوي لان مين اللي هايكون مناسب ليهم في سنهم واهتماماتهم وفي نفس الوقت يعرف يحتوى النضج ده مع البراءة دي ؟!! صعبه اوي 😒 ،، اما بيحسوا انهم عاوزين يفضفضوا او يتكلموا مع حد يفهمهم بيعانوا برضه لان كل اللي حواليهم دايما متعودين ان الناضج ده هو اللي بيحتويهم يعني هايكون صعب عليهم كتير ان هم اللي يحتوه ..
غالباً الناس دي بالظروف دي مش بيكونوا محتاجين من اللي حواليهم فلوس ولا شكر ولا مدح ،، هم بس محتاجينك تكون مصدر طاقة ايجابية ، محتاجينك مبتسم ، محتاجينك تاخد بالك من نفسك لان هم امانهم من امان اللي حواليهم ،، مش محتاجين منك كلمة حلوة ولا حاجة ولكن كمان مش محتاجين يسمعوا كلمة مش حلوة ،، مش محتاجين منك تعملهم حاجة ولكن بس اعمل لنفسك عشان تكون بخير فهم يحسوا ان الدنيا لسه بخير وده بيعطيهم امل ويساعدهم انهم يكملوا ،، هم مش مستنيين منك تعطيهم من طاقتك ولكن ما تحملهمش فوق طاقتهم لانهم بيتضايقوا اوي اما يحسوا بقلة الحيلة تجاة اللي حواليهم .. الناس دي ممكن ما تكونش بتقدم للي حواليها كل اللي هم عاوزينه ولكن تاكد انها بتقدم لهم كل اللي يقدروا عليه ..
فاحمدوا ربنا لوفي واحد بس حواليكم من الناس دي وقدروا قيمتهم عشان لو بس بدأوا يفكروا في نفسهم بس ولو اسبوع فانتم اول ناس هاتندموا اوي لان حقيقي هاتلاقوا ان الدنيا طعمها اتغير اوي من غير الناس اللي لسه فيهم ذرة انسانية في عز ضغوط الحياة دي ..
( بالعامية كلمتين من الاخر )
اقرأ المزيد
أغاني المهرجانات وعلم نفس الواقع… محمد رمضان نموذجا
