بدرية طلبة تساند تامر حسني بعد انتقادات حلا شيحة له

كتبت:شروق ممدوح

نشرت الفنانة بدرية طلبة، عبر حسابها الشخصي على موقع التواصل الاجتماعي “الفيس بوك”، تمدح بأخلاق الفنان تامر حسني وتتذكر مواقف له بعد أزمته الأخيرة مع الفنانة حلا شيحة.

وعلقت قائلة:”أنا بحب كل زمايلي، وبحسهم أخواتي وولادي وأساتذتي، وفي النهاية بعد أي شغل بروح على بيتي وبتابعهم زي المتابع العادي، وبحب أقول كلمة حق في الزملا القريبين مني واللي اتعاملت معاهم عن قرب، ولازم اقولها في وقتها”.

مضيفة:”والنهاردة وقت كلمة حق في النجم تامر حسني، اللي بعرفه عن قرب، من يوم ما ظهر وانا بشوف منه مواقف محدش يعرفها ولا يصدقها، قد أيه هو بني أدم جبار، لكن يكفي أحكي لكم آخر موقف، يوم عملية زميلي وأخويا، شريف دسوقي والمكالمات اللي كل يوم بيتحايل فيها يشيل شريف دسوقي فى عنيه”.

متابعة حديثها: “لكن كان الريس سبقه، ولما ظهرت حالة شبه حالة شريف وتكلفتها عالية وطلبت منه يتدخل، قسما بجلال الله الموضوع ما موضوع فلوس، لكن لو تسمعوا نبرة صوته وعياطه وحزنه على الحالة، لما سمع الفويس بتاعها وهى فرحانة بالطرف الصناعي، هتعرفوا من نفسكم البني آدم دا من جواه إيه، وقد إيه إنسان مش بتاع شو”.

مختومة حديثها قائلة: “غير كل دا كواليسه كلها حب واحترام لزمايله، الصغير قبل الكبير، ومنتهى الإحترام والأدب، واستحالة يضايق أو يزعل حد، ربنا يجبر بخاطرك وتعلى كمان وكمان تستاهل كل خير”.

وجهت الفنانة حلا شيحة رسالة حادة لزميلها في الوسط الفني الفنان تامر حسني، وذلك بعد إعلان توبتها وتبرأها من مشاهد المصورة في أغنية “بحبك” من فيلم “مش أنا”.

حيث نشرت حلا شيحة صورة عبر حسابها الشخصي بمواقع تبادل الصور والفيديوهات الشهير “انستجرام” معلقة عليها قائلة: “إحنا يمكن نجحنا بمقاييس الدنيا بس صدقوني بمقاييس ربنا إحنا لم ولن ننجح، أنا عارفة ومتأكدة إن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي، الكليب ده ميرضيش ربنا، وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط ولازم نغلط، علشان إحنا بشر بس المصيبة إننا بنغفل وبننسى”.

وتابعت قائلة: “أنا مش هتكسف من حد أنا تبت من المشاهد دي وهي لا تصح، وأنا غلطت وبصلح وأهم حاجة إن ربنا يرضى عني لأن في الآخر ده اللي هينفعنا، مش الشهرة ولا النجاح، لا هو مش نجاح أصلا، علشان النجاح الحقيقي حاجة تانية خالص، إحنا أغلبنا ناسينها إلا القليلين منا”.

يذكر أن فيلم “مش أنا” من بطولة كل من: “تامر حسني، حلا شيحة، ماجد الكدواني، حجاج عبد العظيم، سوسن بدر، محمد عبد الرحمن، فايز المالكي ،عصام السقا، اياد نصار، اسما سليمان، محمد الجوهري” وإخراج سارة توفيق، سيناريو وحوار تامر حسني.