“بدون اسباب” قصيده للشاعره ساره ابو بدر

هاحكيلكوا حكايه بنت بسيطه
او يعنى الناس بتشوفها عبيطه
علشان بتحب
البنت مدب
حبت واحد وبدون اسباب
فتحلته الباب
راح كاسر بخاطرها
وعشان العشره والصحبه مابينهم
كان خايف يقتل مشاعرها
لما اعترفت انها بتحبه
كان قلبه تملى يدق لغيرها
لكن انكر
حبها كان دايما جواها بيكبر
جواها حنين
وحياتها مجرد مشهد ولا اتنين بيلفوا ف نفس الدايره
والدايره روتين
ومفيش حاجه بتتحول
مشهد اول ..
خلينا اخوات ..
كلمه اتقالت ووراها سكات
وف وقت مشاعر فيه ماتت
راجع يتحايل نبنى حاجات كانت سابت اراضينا وهاجرت
وقولوبنا هى اللى اتجرحت
وبحن ساعات .
لقلوب مش واضح يوم انها هاتحن
انا عمرت ماسبتك غير بعد ماشفت جراحى بتنزف دم
انا لازم ألم كرامتى واسافر
طول عمرى بفكر وبعافر على حد ماهوش شارى
وانا يعنى مانيش كافره ..انا بحلف بالله الغالى
انى محبتش ف يوم غيرك
انا عاشقه جداا تفاصيلك
بندهلك وبقولك فينك
مش قادره اعيش
وحياة الغالين عندك
وحياتك ماتسيبينيش.
ضعفت جداا
بمجرد لما تجيب سيرته ف قصتها
شايف نظرتها وكسرتها
ومهانش عليه
الشوق ف عنيه باين بوضوح
كان نفسى تبوح بحاجات كانت قصتها
كان نفسى تراجع قراراتها
علشان هتعانى
مشهد تانى ..
زى ماقالت وحياتك ماتسيبنيش
جبروتها بيكبر وتقوله ابعد خلينى اعيش
مانيش قصه وعزف كمان ..
هاسيبه عشان ..حياتى وعيشتى بوجوده
كما المنيكاان ..
كما الدخان..
بنفخه م الهوا يطيروا ..
عظااام هشه
كإنى غريقه بتعلق بكام قشه
كرامتى بتتكسر بالزوق ..
بفكر ف اللى مش غاوى
وناوى ف غربتى يبنى مابينا فروق ..
وحاول يبتعد بهدوء ..هاسيبه عشان ..بدأت افوق.
واعيد حساباتى من تانى
واحقق كل احلامى واعيش من بكره لكيانى
مفيش جانى… بيبحث عن جراح سببها ف مسيرته
انا سيبته …
وهو كمان رجع من تانى لحبيبته .
رجع للحزن وكأبته ..
يدور ع اللى مش غاويه ومش ناويه
تكون ف القصه دى حبيبته
تكون امه ..تكون بنته .
انا حبيته.. وكل كلامى كان سيرته
انا ….انا سيبته
ورغما عنى كلمته ..
بإسم صحاب ..
خلاص وجنيت على نفسى ..بقينا احباب ..
اخويا صديقى بحكيله ف كل جواب ..
عن اللى بيجرى ف حياتى
وهو يوماتى يحكيلى ..
يطبطب فوق جراح سيرى
وأهون عنه ف مشاكله ..
يجوز جداا ف افراحه اروح اشاكله
واحزانه بسب ف سلسبيل شكله
عن اللى بيعمله ف روحه
بيخلق م العدم احزان ..
وعايش يبنى ف جروحه
وعمره مااشتكى وحده
وطول ليله يحن لواحده
كات غيرى
وهو يوماتى بيجيلى ف احلامى
عايش ف الوهم وخيالى
خلاص ونسيت ..
انا حنيييت ..او اتجنيت .
ياريتنى لقيت ف بعدك حد يكفينى
بدور ع اللى مش عارف يعيش لو لحظه ف سنينى
يطول ليلى وافكر كل ده كان ليه
صعبت عليه !!!
يجوز ..يمكن ..
وكل القصه دى مسكن
مهوش ابدا علاج شافى
جراح كافى لبنت بنوت
كل اما تحاول تنسى
تحس بموت ..
سكوت صارخ ف اركانها
هاتنسى خلاص حاجات ماتت
هاتنسى الحب ده لازم وتبقى حياتها علشانها