المشكلة..
انا انسه 26سنه ومتقدملي واحد 30سنه هو انسان طيب وشاريني والده ووالدته متوفيين من هو صغير وكان متأثر جدا بهم ودخل فى أزمة نفسية بعدهم دلوقتي انا عرفت منه أنه بيتعالج مخ واعصاب من 5 سنين وبياخد علاج لازم يمشي عليه طول عمره عنده حاجه اسمها اضطراب وجدانى ثنائي القطبين ولو قطع العلاج بيتصرف تصرفات مش متزنة بس بيقولى انه بقاله سنه بيتحسن و متمسك بيا جدا وبيقول مش عاوز حاجه غيرى واهلى سايبنلي القرار لو رفضت خايفة اكسره اكتر ولو وافقت مش عارفه ايه عواقب مرض زي ده او ممكن اتعب معاه فى ايه ياريت اللى يعرف حاجه عن المرض ده يقولى وينصحنى وهل ممكن يتنقل للأبناء وهل ممكن يأثر على العلاقة الزوجية تعرفوا حد كان عنده المرض ده واتعالج ولا هو فعلا مزمن ومن ناحية الدين نحسبه على خير بس هو اتغير للأفضل كتير كمعاملة فى شغله وحياته لما اتكلمنا كم مره قبل ما يقولى بموضوع مرضه ولما كنت بعلق على حاجه فى تصرفاته بيغيرها لو شايف انى صح وبيقولى انا بتعلم منك كتير وأوقات يقولى عاوزك سند ليا من وقت ماعرفني وهو كويس انا كنت لسه ماخدتش القرار بالموافقه وبعد ماقالي بموضوع مرضه احترت اكتر واستخرت ومش عارفه ايه عواقب المرض وتأثيره لو وافقت
الحل..
متخديش اي قرار غير بعد ما تقعدي مع الدكتور المعالج ليه واساليه كل الاسئله دي واذا لاقيت نفسك ارتحتي بعد كلام الدكتور استخير ربنا مرة واتنين وتلاته وبعدها خدي قرار حياتك ما تاخديش قرارات فى حياتك علشان حد صعبان عليكي القرار مش سهل ابدا ده مصير حياتك فكري صح هتعيشي سعيده بإذن الله
