اعداد وحوار: ريهام طارق
بدأ العد التنازلي و نودع 2025 ، وهي سايبه وراها ذكريات كتير عشناها منها حب بدء ونهاية اتكتبت.. شفنا أيام مليانه فرح وليالي كانت كلها حزن وقلق ، عشنا فيها لحظات انكسار، ولحظات قوة، واجهنا الخذلان من اكتر ناس وثقت فيهم، وعوضنا ربنا بعدها بأشخاص قدمت لينا كل الدعم والمساندة.
فارقنا في 2025، اغلي الناس بس هيفضلوا عايشين جوانا، ودخلوا حياتنا ناس غيرهم حياتنا و أصبحوا اعز الناس.
خلصت 2025، و سابت لينا ذكريات صعب ننساها.. لكن عاش في قلب كل ذكرى منهم أغنيه… ارتبطت بيها وكانت شاهد علي تفاصيل حكايتها، و منقدرش ننكر إن 2025، كانت سنة استثنائية، سمعنا فيها عدد ضخم من الأعمال الموسيقية الناجحة اللي صنعت بصمة قوية في المشهد الفني العربي.
وتكريما لهذه الأعمال الموسيقية المتميزة نسلط، الضوء على أبرز وأهم عناوين الأغاني في 2025، لتكون دعوة مفتوحة لدخول العالم الخاص لكل فنان حقيقي لمع نجمه في 2025 وقدر انه يحقق حضور خاص، ونجاح كبير.
و حواري اليوم مع ملحن وشاعر الغنائي ومطرب من أجمل الاصوات الموجوده على الساحه حاليا وقريب جدآ هنسمع ألبومه الغنائي الجديد وهو الفنان المبدع بلال سرور صاحب الحضور المتميز في 2025 من خلال أجمل وأهم أعمال طرحت منها اغنية الاحتياج وحش للنجم تامر حسني، اغنية “زي الخطاف” للمطرب رامي جمال، واغنيه “يا مطنشنا” للمطربة بلقيس
بلال سرور فتح لنا قلبه و كشف عن جانب مختلف من شخصيته لم يراه جمهوره ومحبيه من قبل.
في البداية نرحب بالفنان بلال سرور في جريدة أسرار المشاهير ونشكره على إتاحة الفرصة لإجراء هذا الحوار:
تقول لمين أنت “حبيبي وابن حبيبي“؟
محمد القياتي.
خطفك.. “زي الخطاف” في 2025، و 2026 وكل وقت؟
هوايتي المفضلة..الصيد
كام مره قلت في 2025؟ “الاحتياج وحش” ؟
قولتها كتير.
شخص بعدت عنه في 2025 وبتقوله في نهايتها.. “كيفك علي فراقي“؟
طالما بعدت مش بهتم ايه بيحصل بعد كده.
مين اول حد جه في تفكيرك حالا و نفسك تعزمه علي.. “العنب الساقع“؟
الشاعر مصطفى حسن
امتى قلت في 2025 ده.. “هد حيل” ؟
لما جاء لي دور برد جامد.
مين اللي ودعنا من الوسط الفني في 2025 وبتقوله “فعلا مبيتنسيش“؟
محمد رحيم وسليمان عيد.
مين بتقوله وانت داخل 2026 “ميتعزش“؟
مفيش حد.
لو تم دعوتك لحضور “حفله تنكريه” تلبس اي شخصية من زمن الأبيض والأسود ؟
تشارلي شابلن
مين.. “بابا” المحال؟
الفنان المبدع والمتجدد ونسخه واحده بس.
تقول لمين أنت “سيد الناس” في 2025 وكل السنين إللي جايه؟
سيدنا محمد صلى الله عليه وسلم
مين كان “ضل حيطة” في حياتك في 2025؟
ما فيش.
مين اللي حلفت وقلت والله لاكون “عقده حياته” في 2026؟
مفيش.. سلامي النفسي أهم
مين “رقم واحد” في حياتك في 2026؟
الله سبحانه وتعالى.
عدي عليك وقت في 2025 وقلت الوسط الفني “خذلني“؟
اكيد وقت ازمه امال ماهر
كام مره اتقالك “اهدي” وأنت بتشتغل في 2025؟
ولا مره.
مين تقول له كل كلامك “كلام فارغ ” في 2025؟
دونالد ترامب وتركي الشيخ.
مين الشخص اللي بتقول لنفسك “مكرهتوش” بعد ما ودعته في 2025؟
كتير قوي.
شخص كان “بيستهبل” في حياتك 2025؟
النوعيه دي من البشر مش بسمح لهم بالدخول أصلا في حياتي.
تقول لمين “تيجي نحارب” في 2026؟
اقولها لنفسي.. بلال سرور.
مين في حياتك شايفها.. “ملكه جمال الكون “؟
اكيد أمي
مين بتحس معاه انك مطمن وتقوله “محتجالك احكيلك خوفي” ؟
امي
ايه التصرف اللي عملته في 2025 واعتبرته “خطيه” ؟
كل تنازل عن مبدأ خطيه وده حصل كثير بدون قصد
مين زعلته منك في 2025 وبتقوله “سوري” صافيه لبن قبل ما نبتدي 2026؟
الحمد لله مافيش حد زعلته.
مين هتقول له “صاحبي يا صاحبي” أنت معايا في 2026؟
الشاعر محمد القياتي.
مين اكتر ناس تعاملت معاهم في 2025 وكانوا ايقونه “الذوق العالي” ؟
سميرة سعيد
مين نفسك تشوفه قبل ما تنتهي 2025 وبتقوله “واحشني يا ابن اللذينا” ؟
اهلي في تونس.
قلت كام مره في 2025 محتاج ازور “دكتور“؟
ولا مره.. بعيد أوي الموضوع ده بالنسبة لي.
لو هترسم.. “احلى رسمه” لشخص واحد بس هيكون مين ؟
أمي.
حصل وقلت.. “حب تاني” لا في 2025؟
لا.
شخص صدمك في 2025 و خلاك تسأل وتقول.. “أنا تبيعني“؟
كتير من صحابي .
حسيت امتي انك محتاج صحابك وشفت ان.. “مفيش جدعنه خالص“؟
حسيتها كتير .
“خبر عاجل“.. نفسك تعلن عنه في 2026؟
اني بحضر لتحقيق حلم حياتي وهو تقديم نفسي للوسط الفني كمطرب و طرح ألبومي الغنائي.
“قرار شخصي” هتقوم تنفيذه فورا في بداية 2026؟
أحب نفسي اكتر شويه.
بتقول لمين في 2026.. “قبلت التحدي“؟
اقولها بلال سرور.
لو.. “لينا عمر” ايه أول حلم نفسك تحققه في 2026؟
ألبومي الغنائي يظهر للنور
في النهاية نشكر الفنان بلال سرور علي هذا الحوار الأكثر من رائع علي وعد بحوار آخر مع نجم جديد ونجاحات جديدة مع ريهام طارق.
نبذة عن الكاتب:
ريهام طارق صحافية مصرية من أصول لبنانية، متخصصة في الأخبار الفنية والثقافية، أجرت حوارات صحفية مع نخبة من أبرز نجوم الفن في الوطن العربي، وتشغل حاليًا منصب مساعد رئيس التحرير ورئيس قسم الفن بمؤسسة [اليوم للإعلام] التابعة للهيئة الوطنية للإعلام، والتي تضم عددًا من الإصدارات الصحفية، من بينها جريدة أسرار المشاهير، اليوم الدولي، أخبار مصر 24، وجريدة تريندات العالم في جمهورية مصر العربية.
انطلقت مسيرتها المهنية من المملكة العربية السعودية،عبر جريدة [إبداع] في الرياض، قبل أن تنتقل للعمل في عدد من المؤسسات الإعلامية الكبرى في الوطن العربي، من بينها جريدة [الثائر] وجريدة [المغرد] في لبنان، وجريدة [النهار] في المغرب، ومجلة [النهار] في العراق، ومجلة [المحور] في الكويت.
كتبت أيضا ريهام طارق عددًا من المقالات التحليلية المتخصصة في مجالات السياسة الدولية وأسواق المال الأمريكية والأوروبية، كما شغلت عضوية اللجنة الإعلامية للمهرجان القومي للمسرح المصري، وتعمل حاليًا على تقديم محاضرات متخصصة في الصحافة بمدينة مسقط، بسلطنة عمان.